កាលពីថ្ងៃទី២៣ ខែមិថុនា កន្លងទៅ Suga បានធ្វើការបរិច្ចាគប្រាក់ចំនួន ៥ពាន់លានវ៉ុន ឬប្រមាណ ៣.៦លានដុល្លារអាមេរិក ដើម្បីជួយដល់កុមារ និងមនុស្សវ័យជំទង់ដែលកើតជំងឺអូទីស្សឹម។ ទន្ទឹមគ្នានេះ ក្រុមអ្នកគាំទ្ររបស់តារាប្រុសផ្ទាល់ ក៏បានចូលរួមបន្ថែមដែរ ដោយចំនួនបរិច្ចាគសរុបបានហក់ឡើងដល់ ២០០លានវ៉ុន ឬប្រមាណ ១៤.៦ម៉ឺនដុល្លារអាមេរិក។

ជាក់ស្ដែង សមាជិក BTS រូបនេះបានបរិច្ចាគប្រាក់ ដើម្បីបង្កើតមជ្ឈមណ្ឌលមួយក្រោមឈ្មោះពិតរបស់លោក គឺ មជ្ឈមណ្ឌល Min Yoon-gi ទៅកាន់មជ្ឈមណ្ឌលវេជ្ជសាស្ត្រ Yonsei នៃមន្ទីរពេទ្យ Severance សម្រាប់ការព្យាបាល ផ្នែកភាសា សតិអារម្មណ៍ និងអាកប្បកិរិយារបស់អ្នកជំងឺអូទីស្សឹម។
បន្ទាប់ពីដំណឹងនេះបានផ្សព្វផ្សាយ អ្នកគាំទ្រទាំងក្នុង និងក្រៅស្រុកក៏បានបង្ហាញគោលបំណងចូលរួមចំណែកផងដែរ ជាហេតុដែលធ្វើឱ្យមជ្ឈមណ្ឌលវេជ្ជសាស្ត្រ Yonsei បើកទទួលការបរិច្ចាគពីសាធារណជន។ ជាក់ស្ដែង ត្រឹមរយៈពេល ៦ម៉ោងដំបូង ក្រុមអ្នកគាំទ្របានប្រមែប្រមូលគ្នាមកបរិច្ចាគជាទឹកប្រាក់រហូតដល់ ១០០លានវ៉ុន ឬ ៧៣ ៣០០ ដុល្លារអាមេរិក និងហក់ឡើងទ្វេរដងក្នុងពេលត្រឹមតែមួយថ្ងៃ។

មជ្ឈមណ្ឌលវេជ្ជសាស្ត្រ Yonsei បានរំពឹងថា ទឹកប្រាក់សប្បុរសអាចនឹងហក់ឡើងបន្ថែមទៀត ស្របពេលដែលខាងមជ្ឈមណ្ឌលកំពុងតែរៀបចំបង្កើតប្រព័ន្ធផ្ទេរប្រាក់អន្តរជាតិ សម្រាប់ ARMY ដែលរស់នៅខាងក្រៅប្រទេសកូរ៉េខាងត្បូង។
គួរឱ្យដឹងដូចគ្នាថា បន្ថែមពីឈ្មោះជាអ្នកបរិច្ចាគ Suga ក៏បានចូលរួមដោយផ្ទាល់ក្នុងការព្យាបាលកុមារ និងមនុស្សវ័យជំទង់ដែលកើតជំងឺអូទីស្សឹមផងដែរ។ ជាក់ស្ដែង តារាប្រុសវ័យ ៣២ឆ្នាំបានសហការជាមួយនឹងអ្នកជំនាញផ្នែកចិត្តសាស្រ្តកុមារ Cheon Geun-ah ដើម្បីចូលរួមក្នុងការព្យាបាលតាមរយៈតន្ត្រី ជាពិសេសគឺ ហ្គីតាដល់អ្នកជំងឺជារៀងរាល់ចុងសប្ដាហ៍ ក្នុងពេល ៧ខែជាប់គ្នា ៕
























Account
Security
Favourite Content