ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
នៅថ្ងៃទី៧ ខែមីនាកន្លងទៅនេះ ភាពយន្តភាគថ្មីពី Netflix រឿង When Life Gives You Tangerines កំពុងទាក់ទាញចំណាប់អារម្មណ៍របស់ទស្សនិកជន ក្រោយសាច់រឿងអាចធ្វើឱ្យអ្នកទស្សនានឹកគិតដល់ឪពុកម្ដាយរបស់ខ្លួន។
ដ្បិតទើបតែចេញបាន ៤ភាគក្ដី រឿង When Life Gives You Tangerines កំពុងទទួលបានការគាំទ្រខ្លាំងមិនថានៅក្នុងចំណោមទស្សនិកជនពីប្រទេសកូរ៉េខាងត្បូង និងទស្សនិកជនពីជុំវិញលើពិភពលោក ដោយមិនប៉ុន្មានថ្ងៃក្រោយរឿងនេះចេញ គេហទំព័រ FlixPatrol បានកត់ត្រាថា ភាពយន្តភាគថ្មីដែលបាន IU និង Park Bo-gum មកចូលរួមសម្ដែងនេះ បានឈរជើងក្នុងចំណាត់ថ្នាក់លេខ១ នៅក្នុងប្រទេសចំនួន ១០រួចទៅហើយ រួមមានប្រទេសកូរ៉េខាងត្បូង សិង្ហបុរី និងទីក្រុងហុងកុងជាដើម។ បន្ថែមពីនេះទៀត រឿងដដែលនេះ ក៏ជាកម្មវិធីទូរទស្សន៍ដែលទទួលបានប្រជាប្រិយភាពលំដាប់លេខ ៦ នៅលើពិភពលោកផងដែរ។
ជាក់ស្ដែង ភាគយន្តដែលមានសរុប ១៦ភាគមួយនេះ មានសាច់រឿងផ្ដោតសំខាន់ទៅលើជីវិតរបស់ស្ត្រីក្នុង ៣ជំនាន់ផ្សេងគ្នា ពោលគឺជីវិតរបស់ Ae-soon ដែលសម្ដែងដោយ IU រួមគ្នាជាមួយនឹងជីវិតរបស់តួអង្គម្ដាយ និងកូនស្រីរបស់ Ae-soon។ ដោយរៀបរាប់ពីប្រជាជនកូរ៉េខាងត្បូងនៅក្នុងរយៈពេល ៦៥ឆ្នាំ រាប់ចាប់តាំងពីទស្សវត្សរ៍ឆ្នាំ ១៩៦០ មកទល់នឹងពេលបច្ចុប្បន្ន រឿងនេះបានបង្ហាញពីការស៊ូទ្រាំរបស់ឪពុកម្ដាយបន្ទាប់ពីភ្លើងសង្គ្រាមកូរ៉េ (១៩៥០ -១៩៥៣) បានបញ្ចប់ ជាមួយនឹងក្ដីសង្ឈឹមចង់ឱ្យកូនៗមានជីវិតដែលប្រសើរជាងមុន។ ជាពិសេស គឹបង្ហាញពីជីវិតរបស់ស្ដ្រីដែលត្រូវលះបង់ខ្លាំងតាំងពីវ័យក្មេង ហើយនៅពេលពេញវ័យ ក៏ត្រូវបន្តអត់ធ្មត់ជាមួយនឹងជិវិតក្រោយរៀបអាពាហ៍ពិពាហ៍ផងដែរ។
យោងតាមសារព័ត៌មាន Korea Times បន្ទាប់ពីទស្សនារឿង When Life Gives You Tangerines ទស្សនិកជនមួយចំនួនបានផ្សារភ្ជាប់សាច់រឿងនេះ ទៅនឹងគ្រួសាររបស់ខ្លួនផ្ទាល់ ក៏ដូចជាបានរំលែកពីអារម្មណ៍ផ្ទាល់ខ្លួននៅលើអ៊ីនធឺណិតផងដែរ។ ជាក់ស្ដែង អ្នកប្រើប្រាស់បណ្ដាញទំនាក់ទំនងសង្គមជាច្រើនរូប បាននិយាយដូចគ្នាថា ភាពយន្តមួយនេះបានធ្វើឱ្យខ្លួនយំ ព្រោះនឹកគិតដល់ឪពុកម្ដាយរបស់ខ្លួន ស្របពេលដែលអ្នកខ្លះទៀត បានយល់ឃើញពីជីវិតដ៏លំបាករបស់មនុស្សស្រីនៅក្នុងសម័យមុន។
ជាការពិត មតិរបស់ទស្សនិកជន គឺសមស្របទៅចំណងជើងរបស់រឿង When Life Gives You Tangerines ដែលអ្នកនិពន្ធ Im Sang-chun បានបកប្រែចំណងជើងនេះពីឃ្លាមួយរបស់គ្រាមភាសាលើកោះ Jeju ដែលមានន័យថា “អ្នកខិតខំធ្វើការយ៉ាងខ្លាំង”។ ទន្ទឹមគ្នានេះ វាក៏ដូចគ្នាទៅនឹងសម្ដីរបស់អ្នកដឹកនាំរឿង Kim Won-seok ដែលចង់ឱ្យទស្សនិកជនស្ញប់ស្ញែងពីជីវិតឪពុកម្ដាយរបស់ខ្លួនផងដែរ។
យ៉ាងណាមិញ នេះមិនមែនជារឿងកូរ៉េខាងត្បូងទី១ទេ ដែលបាននិយាយពីជីវិតក្រោយភ្លើងសង្គ្រាម ក៏ប៉ុន្មាន When Life Gives You Tangerines មានលក្ខណៈពិសេសខុសគេ ដែលអាចធ្វើឱ្យទស្សនិកជនមានអារម្មណ៍ជ្រួលជ្រាបបាន។ ជាក់ស្ដែង ភាពយន្តប្រភេទនេះ ដូចជា Chief Detective 1958 និង Uncle Samsik ជារឿងដែលផ្ដោតលើមនុស្សដែលមានឋានៈ មានកេរ្តិ៍ឈ្មោះ និងទាក់ទងពីភាពចលាចលផ្នែកនយោបាយ ខណៈដែរ When Life Gives You Tangerines មានសាច់រឿងពីការប្រើប្រាស់ជីវិតប្រចាំថ្ងៃរបស់ឪពុកម្ដាយ និងកូន ដែលជាសាមញ្ញជននៅលើកោះ Jeju។
លោក Kim Heon-sik សាស្ត្រាចារ្យផ្នែកវិទ្យាសាស្ត្រសង្គមនៅសាកលវិទ្យាល័យ Jungwon បាននិយាយថា ខុសប្លែកពីរឿង Uncle Samsik ដែលមានសាច់រឿងស៊ីជម្រៅ ស្មុគស្មាញ និងផ្ដោតលើភាពជាបុរស រឿង When Life Gives You Tangerines បានបង្ហាញពីភាពកក់ក្ដៅក្នុងគ្រួសារ ដែលមនុស្សគ្រប់ជំនាន់អាចទទួលយកបាន។
បន្ថែមពីនេះ លោក Yoon Seok-jin សាស្ត្រាចារ្យផ្នែកអក្សរសាស្ត្រកូរ៉េនៅសាកលវិទ្យាល័យជាតិ Chungnam បាននិយាយថា៖ “រឿងភាគថ្មីៗជាច្រើននិយមនិយាយពីរឿងរ៉ាវរបស់គ្រួសារអ្នកមាន ដែលឃ្លាតឆ្ងាយពីការពិត នៃជីវិតរបស់មនុស្សសាមញ្ញ។ ស្នាដៃនិពន្ធរបស់ Im Sang-chun មានភាពរស់រវើក ព្រោះតែមានការលាយបញ្ចូលគ្នារវាងការច្នៃប្រឌិត និងរំលេចពីបញ្ហាប្រឈមក្នុងជីវិតពិត តាមរយៈសាច់រឿងដែលទស្សនិកជនអាចផ្សារភ្ជាប់នឹងជីវិតរបស់ខ្លួនឯងបាន”៕
Account
Security
Favourite Content