ជាតារាសម្ដែងបន្ទាប់ពីសមត្ថភាព ទេពកោសល្យហើយ សម្រស់ក៏ជាចំណែកមួយដ៏សំខាន់ដែលមិនអាចមើលរំលងបាននោះទេ។ ដូច្នេះគឺត្រូវទាមទារឱ្យពួកគេចាំបាច់ត្រូវតែថែរក្សាស្បែករបស់ខ្លួនឯងឱ្យស ភ្លឺ ម៉ត់រលោង និងក្មេងជាងវ័យ។ ជាក់ស្ដែងថ្ងៃនេះ AMS នឹងប្រមូលនូវគន្លឹះថែរក្សាស្បែកខ្លះៗពីតារាសម្ដែងស្រីល្បីឈ្មោះ និងកំពុងពេញនិយមនៅប្រទេសកូរ៉េខាងត្បូង ៦ ដួងចែកជូនប្រិយមិត្ត៖
១. Park Gyu Young
ដើម្បីសម្ដែងជាតួស្រីនៅក្នុងខ្សែភាពយន្តកូរ៉េដែលកំពុងល្បីល្បាញមានចំណងជើងថា Celebrity តារាស្រី Park Gyu Young បានសម្រេចកាត់សក់របស់នាងឱ្យខ្លីជាងមុន។ នេះគឺជាគន្លឺះដែលជួយលើកសម្រស់ឱ្យតារាស្រីកើតឆ្នាំ ១៩៩៣ រូបនេះកាន់តែមានភាពទាក់ទាញ គួរឱ្យស្រឡាញ់ និងមើលទៅកាន់តែក្មេងជាងវ័យទៀតផង។ មិនតែប៉ុណ្ណោះ ម៉ូដសក់មួយនេះក៏គំពុងទទួលបានការពេញនិយមពីអ្នកគាំទ្ររបស់នាងជាច្រើន ហើយក៏មានតារាសម្ដែងគ្នាឯងទៀតផង។
២. Han So Hee
សម្រាប់ Han So Hee វិញបន្ទាប់ពីមានសមត្ថភាពខាងសម្ដែងខ្លាំងពូកែហើយ នាងក៏ត្រូវបានគេចាត់ទុកជាមនុស្សម្នាក់ដែលស្ថិតនៅក្នុងស្ដង់ដាស្រីស្អាតផងដែរ។ នៅក្នុងកិច្ចសម្ភាសមួយកាលពីឆ្នាំ ២០១៨ តារាស្រីរូបនេះបាននិយាយថាសម្រាប់នាងការគេងគឺមានសារៈសំខាន់ខ្លាំងបំផុតក្នុងការថែរក្សាសម្រស់ឱ្យបានស្អាតដូចនេះ។ នាងបានបន្តថាការគេងគឺជាចំណែកមួយដែលអាចជួយពង្រឹងសុខភាពស្បែកដែរ ដូច្នេះហើយទើបនាងព្យាយាមគេងឱ្យយ៉ាងតិច ៤ ម៉ោងក្នុងមួយថ្ងៃ។ ត្រឹម ៤ ម៉ោងក្នុងមួយថ្ងៃសម្រាប់មនុស្សធម្មតាអាចនឹងតិច ប៉ុន្តែសម្រាប់តារាសម្ដែងដែលមានកាលវិភាគមមាញឹកដូច Han So Hee គឺសមរម្យហើយ។
៣. Go Yoon Jung
ចំណែកឯវិធីថែសម្រស់របស់តួស្រីនៅក្នុងរឿង Alchemy of Souls គឺតារាស្រី Go Yoon Jung វិញក៏មិនមានអ្វីស្មុគស្មាញច្រើនដែរ។ ដោយជំហានដំបូងនាងបានប្រើប្រាស់ម៉ាសភក់ដើម្បីជួយស្រូបយកជាតិខ្លាញ់ ភាពកខ្វក់ និងកាកសំណល់គ្រឿងសម្អាងដែលនៅកកស្ទះក្នុងរន្ធញើស។ បន្ទាប់មកទើបនាងធ្វើការលាងសម្អាតមុខរួចសឹមយក toner មកជូតមុខដោយពេលខ្លះប្រើម្រាមដៃ ហើយពេលខ្លះប្រើសម្លី។ ជំហានបន្ទាប់សេរ៉ូម និងក្រែមលាបក្រោមភ្នែកដើម្បីជួយឱ្យស្បែកភ្លឺថ្លា និងបំបាត់ស្នាមអុជខ្មៅផងដែរ។ នាងមិនបានបញ្ជាក់អំពីម៉ាកផលិតផលច្បាស់លាស់នោះទេ ពោលគឺនាងជ្រើសរើសផលិតផលណាដែលមានសាច់ស្រាលស្រទន់ ហើយត្រូវជាមួយស្បែកមុខប៉ុណ្ណោះ។
៤. Bae Suzy
ងាកមកមើលពីតារាស្រី Bae Suzy ឯណេះវិញដោយវិធីនៃការថែរក្សាសុខភាពស្បែករបស់នាងមិនខុសពីតារាស្រី Go Yoon Jung ប៉ុន្មាននោះទេ ថែមទាំងងាយហើយលឿនជាងទៀតផង។ នាងបានប្រើនូវក្បួនលាងសម្អាតស្បែកមុខ ៤-២-៤ ដែលមានន័យ៖
- ការប្រើប្រាស់ពេល ៤ នាទីសម្រាប់ការម៉ាស្សាលើស្បែកថ្នមៗជាមួយប្រេងលាងសម្អាតមុខ។
- ការប្រើប្រាស់ពេល ២ នាទីសម្រាប់ម៉ាស្សាជាមួយហ្វូមលាងសម្អាតមុខ។
- ជាចុងក្រោយគឺការប្រើប្រាស់ពេល ៤ នាទីដើម្បីលុបលាងមុខជាមួយទឹកក្ដៅឧណ្ហៗ និងទឹកត្រជាក់។
នាងបានអនុវត្តក្បួនលាងសម្អាតមុខមួយនេះដោយប្រើទឹកត្រជាក់ព្រោះទីមួយវាជួយបង្រួមរន្ធញើសហើយបន្តឹងស្បែកមុខ និងទីពីរជួយសម្រួលចលនាចរន្តឈាមលើផ្ទៃមុខ។
៥. Lim Ji Yeon
Lim Ji Yeon ជាតារាស្រីដែលបានសម្ដែងជាតួចិត្តអាក្រក់នៅក្នុងរឿង The Glory ក៏បានចែករំលែកអំពីទម្លាប់នៃការថែសម្រស់របស់នាងងាយៗដោយគ្រាន់តែផ្ដោតលើទម្លាប់នៃការរស់នៅប្រចាំថ្ងៃ។ ជារៀងរាល់ថ្ងៃនាងបានញ៉ាំតែផ្កាដោយសារនាងយ់ថាវាអាចជួយបន្សាបជាតិពុលក្នុងរាងកាយ និងការពារភាពចាស់ផងដែរ។ លើសពីនេះ នាងក៏បានបន្តថាយើងមិនគួរប្រើកន្សែងមកជូតលើផ្ទៃមុខនោះ។ ចំពោះការប្រើប្រាស់ផលិតផលថែរក្សាស្បែកវិញនោះគឺនាងបានផ្ដោតទៅការរក្សា និងបន្ថែមជាតិសំណើមឱ្យបានច្រើន។
៦. Shin Hye Sun
ចំពោះតារាស្រី Shin Hye Sun បានផ្ដល់អាទិភាពខ្លាំងទៅលើផលិតផលថែរក្សាសម្រស់ដោយនាងបានប្រើម៉ាសធម្មជាតិសម្រាប់បិតក្រោមភ្នែក និងព្យាយាមមិនប្រើប្រាស់ផលិតផលណាដែលណាមានផ្ទុកនូវសារធាតុប៉ារ៉ាបេន និង formaldyh។ ប្រសិនបើមានកាលវិភាគមមាញឹកពេក ភាគច្រើននាងប្រើប្រាស់តែសេរ៉ូម និងឡេលាបមុខពេលយប់ប៉ុណ្ណោះ។ ក្រៅពីការថែរក្សាពីខាងក្រៅហើយ នាងក៏មិនភ្លេចការថែរក្សាស្បែកពីផ្នែកខាងក្នុងដែរ។ នាងតែងតែជ្រើសរើសយកការញ៉ាំផ្លែឈើជាអាហារសម្រន់ដោយវាគឺជាចំណែកមួយដែលអាចជួយឱ្យសុខភាពស្បែកល្អ។ ហើយនាងក៏មិនដែលចោលការផឹកទឹកខូឡាជែនដើម្បីពន្យឺតភាពចាស់ផងដែរ៕