“Marry My Husband” ជារឿងភាគកូរ៉េដែលទទួលបានការគាំទ្រយ៉ាងខ្លាំងនៅដើមឆ្នាំ ២០២៤។ តួសម្ដែងសំខាន់ៗទាំង ៤ រួមមាន Park MinYoung, Na In Woo, Lee YiKyung និង Song HaYoon សុទ្ធតែទទួលបានការគាំទ្រ និងសរសើរយ៉ាងខ្លាំងចំពោះការសម្ដែង។ អ្នកទាំង ៤ ក៏បានក្លាយជាតារាសម្ដែងដែលត្រូវបានគេចាប់អារម្មណ៍ខ្លាំង ដូចគ្នានៅដើមឆ្នាំនេះផងដែរ។
អ្វីដែលធ្វើឲ្យមហាជនភ្ញាក់ផ្អើល តារាស្រី Song HaYoon ត្រូវបានគេចេញមុខចោទប្រកាន់ថា នាងធ្លាប់ប្រើអំពើហិង្សាកម្រិតធ្ងន់ វាយធ្វើបាបអ្នកដទៃ កាលពីរូបនាងនៅរៀន។ កម្មវិធីទូរទស្សន៍របស់ JTBC គឺ Scandal Supervisor បានចេញផ្សាយពីការប្រើប្រាស់អំពើហិង្សាកម្រិតធ្ងន់មួយ ក្នុងឆ្នាំ ២០០៤ និងបានដាក់រូបជនបង្ក ដោយបិទបាំងមុខ។ រូបទាំងនោះ ត្រូវបានគេស្វែងរកឃើញថា ជាតារាស្រី Song HaYoon។
ជនរងគ្រោះបានរាយការណ៍ថា ហេតុការណ៍នោះកើតឡើងក្នុងខែ សីហា ឆ្នាំ ២០០៤ នៅពេលដែលតារាស្រី Song HaYoon រៀនថ្នាក់ទី ១២ ខណៈជនរងគ្រោះរៀនថ្នាក់ទី ១១។ ជនរងគ្រោះគឺជាមនុស្សប្រុស និងមានទំនាក់ទំនងសិស្សប្អូន និងសិស្សច្បងជាមួយ Song HaYoon។ ថ្ងៃមួយអំឡុងពេលបាយថ្ងៃត្រង់ នាងបានតេហៅរូបលោកមកជួប។ គ្រាន់តែលោកមកដល់ភ្លាម គឺនាងចាប់ផ្ដើមវាយធ្វើបាបលោក ស្របពេលដែលលោកមិនបានដឹងពីមូលហេតុ។ លោកត្រូវបានរូបនាងទះកំផ្លៀង និងវាយធ្វើបាបអស់រយៈពេល ៩០ នាទី។ Song HaYoon ត្រូវបានរាយការណ៍ថា ជាកំពូលអ្នកធ្វើបាបអ្នកដទៃក្នុងសាលា ទើបសិស្សសាលាដែលរៀនជាមួយនាង មានការខ្លាចរអាចំពោះទង្វើនាង។ រូបនាងធ្លាប់ធ្វើបាបអ្នកដទៃជាច្រើនដង រហូតត្រូវផ្លាស់ប្ដូរសាលារៀនទៅតំបន់ Gangnam វិញ។
បច្ចុប្បន្នជនរងគ្រោះកំពុងរស់នៅសហរដ្ឋអាមេរិក និងបានឃើញរូបនាងតាមរយៈការឡើងកម្មវិធីកម្សាន្ដមួយ។ លោកចង់ទទួលបានការសុំទោសចេញពីចិត្ដមួយ ពីតារាស្រីរូបនេះ ព្រោះលោកមិនទាន់ជាសះស្បើយពីការឈឺចាប់ដែលរូបនាងបានធ្វើចំពោះលោកឡើយ។ ដំណឹងនេះ បានក្លាយជាប្រធានបទក្ដៅក្នុងប្រទេសកូរ៉េខាងត្បូង ជាការឆ្លើយតបពីខាងក្រុមហ៊ុនគ្រប់គ្រងតារាស្រី Song HaYoon បានលើកឡើងថា សូមមហាជនកុំទាន់ជឿ ឬផ្សព្វផ្សាយចំពោះព័ត៌មានដែលចែកចាយដោយភាគីតែម្ខាង។ ខាងក្រុមហ៊ុនកំពុងតែតាមដាន ខណៈតារាស្រី Song HaYoon បានបដិសេដមិនបានស្គាល់ ឬពាក់ព័ន្ធឡើយ៕