ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
មិនមែនមនុស្សទាំងអស់សុទ្ធតែធំធាត់ឡើងក្នុងគ្រួសារកក់ក្ដៅ និងមានឳពុកម្ដាយមើលថែរក្សាឡើយ។ អ្នកខ្លះជួបរឿងមិនល្អ ត្រូវបាត់បង់ឳពុក ឬម្ដាយតាំងពីនៅវ័យក្មេង។ ជាក់ស្ដែង តារាសម្ដែងកូរ៉េល្បីប្រចាំប្រទេស ២ រូប ត្រូវបានឳពុកបង្កើតរបស់ខ្លួន បោះបង់ចោលតាំងពីតូច ខណៈតស៊ូពុះពារជាច្រើនឆ្នាំទើបមានឈ្មោះសំឡេងក្នុងពិភពសិល្បៈ ក្លាយជាតារាត្រូវបានគេស្រឡាញ់គោរពចូលចិត្ដ។
១.Kim SooHyun
Kim SooHyun ត្រូវបានគេចាត់ទុកជាតារាសម្ដែងប្រុសដែលមានភាពលេចធ្លោម្នាក់ក្នុងវិស័យសិល្បៈកូរ៉េ។ ភាពប៉ិនប្រសប់ក្នុងការសម្ដែង ធ្វើឲ្យលោកតែងត្រូវមហាជនជាច្រើនសរសើរមិនដាច់ពីមាត់។ ការខិតខំប្រឹងប្រែងរបស់លោក ធ្វើឲ្យលោកទទួលបានជោគជ័យផ្ទួនៗ និងក្លាយជាតារាសម្ដែងមានតម្លៃខ្លួនថ្លៃបំផុតម្នាក់ ក្នុងប្រទេសកូរ៉ខាងត្បូងនាពេលនេះ។ ប្រជាប្រិយភាពតារាវ័យ ៣៦ ឆ្នាំរូបនេះ កាន់តែកើនឡើងមួយកម្រិតទៀត ក្រោយបង្ហាញខ្លួនក្នុងរឿងភាគល្បី Queen Of Tears។ នៅពីក្រោយភាពជោគជ័យ SooHyun បានឆ្លងកាត់រឿងជាច្រើន និងមានម្ដាយរបស់លោកជាអ្នកគាំទ្រជំរុញទឹកចិត្ដ។ តារាប្រុស Kim SooHyun មិនមែនជាកូនអ្នកស្ដុកស្ដម្ភឡើយ ឳពុករបស់លោកគឺ Kim ChungHoon ជាតារាចម្រៀងម្នាក់ក្នុងប្រទេស។ ឳពុក និងម្ដាយរបស់លោកបានលែងលះគ្នា តាំងពីលោកនៅវ័យក្មេង។
ក្រោយឳពុកម្ដាយលែងលះគ្នា លោកបានរស់នៅជាមួយម្ដាយកម្សត់កម្រ តស៊ូជាមួយម្ដាយអស់រយៈពេល ២០ ឆ្នាំ ស្របពេលដែលឳពុកលោកបានចុះចេញពីផ្ទះទៅបង្កើតគ្រួសារថ្មី និងមានកូនស្រីម្នាក់ឈ្មោះ Kim JooNa។ ឳពុករបស់លោកជាបុគ្គលមិនដែលខ្វាយខ្វល់ពីសុខទុក្ខរបស់កូនប្រុស ស្រាប់តែលើកឡើងថា កូនប្រុសជាមូលហេតុធ្វើឲ្យលោកមានការតស៊ូ នៅពេលដែលតារាប្រុស Kim SooHyun មានឈ្មោះល្បីល្បាញក្លាយជាតារាជួរមុខម្នាក់ក្នុងប្រទេស។
ក្រឡេកមកមើលប្អូនស្រីម្ដាយខុសគ្នាតួប្រុសរឿង «សង្សារខ្ញុំជាមនុស្សភពផ្កាយ» បានលើកឡើងថា ខ្លួនមានទំនាក់ស្អិតល្មួតជាមួយបងប្រុសខ្លាំង អំឡុងពេលចូលរួមកម្មវីធីប្រកួត Produce 101 តែជាក់ស្ដែងអ្នកទាំង ២ មិនមានទំនាក់ទំនងជិតស្និទ្ធដូចការលើកឡើង Kim JooNa នោះឡើយ។ ការលើកឡើងរបស់ឳពុក និងប្អូនស្រី Kim SooHyun បានធ្វើឲ្យរូបលោកទទួលបានការរិះគន់យ៉ាងខ្លាំង ដោយត្រូវបានគេចង្អុលថា ជាមនុស្សគ្មានចិត្ត មិនទទួលស្គាល់ឳពុក និងប្អូនស្រី។ ជាមួយគ្នាដែរ តារាប្រុស Kim SooHyun ធ្លាប់បានចេញមុខ លើកឡើងថា រឿងដែលកន្លងហួសគឺលោកមិនចង់រំឮកពីវាទៀតឡើយ ដោយសារលោកមិនចង់ឲ្យម្ដាយរបស់លោកមិនសប្បាយចិត្ដ។
២.Song HyeKyo
តារាស្រី Song HyeKyo ត្រូវបានគេចាត់ទុកជាតារាស្រីកូរ៉េម្នាក់ដែលទទួលបានភាពជោគជ័យខ្លាំងនាពេលបច្ចុប្បន្ន។ ក្រោយបង្ហាញមុខក្នុងរឿងភាគ “The Glory” នាងកាន់តែទទួលបានឈ្មោះល្បីល្បាញខ្លាំង និងឈ្នះពានរង្វាន់ជាច្រើនហូរហែ។ តារាស្រីសាច់ចាំមិនព្រមចាស់តាមអាយុ ត្រូវបានមហាជនជាច្រើនលើកឡើងថា ជាខ្ញីដែលកាន់តែចាស់កាន់តែហឹរ។
Song HyeKyo នាងក៏ជាក្មេងម្នាក់ដែលធំធាត់ឡើងក្នុងគ្រួសារមិនពេញលេញម្នាក់ដែរ ឳពុកម្ដាយរបស់នាងបានលែងលះគ្នា ក្រោយរៀបការបាន ៩ ឆ្នាំ។ បន្ទាប់ពីឳពុកម្ដាយលែងលះតួឯកស្រីរឿង «បំណុលផ្ទះជំពាក់ស្នេហ៍» បានរស់នៅជាមួយម្ដាយ និងមានការជ្រោមជ្រែងផ្នែកហិរញ្ញវត្ថុពីជីតាបង្កើតរបស់នាង។ ការបែកបាក់របស់ ឳពុកម្ដាយតារាស្រីរូបនេះ ត្រូវបានគេសង្ស័យថា មកពីបញ្ហាហិរញ្ញវត្ថុ និងការរស់នៅមិនចុះសម្រុងគ្នា។
បន្ទាប់ពី Song HyeKyo មានឈ្មោះល្បីល្បាញ ឳពុកបង្កើតរបស់នាង ក៏បាននិយាយក្នុងបទសម្ភាសន៍ ព្រមទាំងលើកឡើងថាខ្លួនមានការស្ដាយក្រោយខ្លាំង ដែលអវត្ដមានពីក្នុងជីវិតរបស់នាង និងមិនបានឃើញនាងធំធាត់។ លោកថែមទាំងលើកឡើង ការស្ដាយក្រោយធ្វើឲ្យលោកមិនហ៊ានមើលរឿងដែលនាងសម្ដែងឡើយ ជាពិសេសលោកមានអារម្មណ៍ចង់យំនៅពេលដែលឃើញនាង។ ការលើកឡើងរបស់លោកក៏បានធ្វើឲ្យមហាជនជាច្រើនរិះគន់ និងបញ្ចេញមតិថា លោកនិយាយបែបនេះ ដោយសារតែឃើញកូនស្រីមានភាពល្បីល្បាញប៉ុណ្ណោះ។ ការរស់នៅដោយគ្មានឳពុកមើលថែទាំធ្វើឲ្យ Song HyeKyo ធំធាត់ឡើងក្លាយជានារីរឹងមាំម្នាក់ និងអាចតស៊ូពុះពាររហូតក្លាយជាតារាស្រីមានឈ្មោះល្បីលំដាប់ប្រទេស៕
Account
Security
Favourite Content