សំណួរដែលមនុស្សជាច្រើនតែងត្រូវបានគេចោទសួរនៅពេលដែលធំពេញរូបរាង គឺតែងជាសំណួរពេលណាទើបរៀបការ។ ជាពិសេស អ្នកដែលមានវ័យ ៣០ ជាង សំណួរមួយនេះតែងត្រូវគេសួរចាក់ដោតចំៗ ខ្លាំងជាងគេ។ មិនខុសពីមនុស្សទូទៅ តារាសម្ដែងស្រីហុងកុង Samantha Ko ឬមហាជនជាច្រើនស្គាល់ថា ជាតួស្រីក្នុងរឿង “រាជិនីសារព័ត៌មាន” ក៏ប្រឈមមុខត្រូវគេចោទសួរសំណួរមួយនេះជារឿយៗ ផងដែរ។



ថ្មីៗ តារាស្រីវ័យ ៣៧ ឆ្នាំរូបនេះ បាន live ជជែកកម្សាន្ដជាមួយអ្នកគាំទ្ររបស់ខ្លួនក្នុងបណ្ដាញសង្គម។ ស្រាប់តែមានមតិមួយចំនួន សួរនាងពីវេលាដែលនាងរៀបការ និងបង្កើតគ្រួសារ ថែមទាំងខ្លះទៀតបញ្ចេញមតិចង់ឲ្យនាងឆាប់រៀបការ។ អ្វីដែលធ្វើឲ្យអ្នកគាំទ្រភ្ញាក់ផ្អើលគឺនាងបានឆ្លើយតបបែបខឹងសម្បារថា៖ ហេតុអ្វីបានជាអ្នកគ្រប់គ្នា តែងសួរអំពីពេលវេលាដែលនាងរៀបការ? តើពេលណានាងរៀបការ? នាងបានបន្ថែមទៀតថា៖ ហេតុអ្វីនាងចាំបាច់ត្រូវរៀបការ? តើនាងមិនអាចរស់នៅដោយគ្មានមនុស្សប្រុសបានទេ ឬ?



មួយរយៈចុងក្រោយនេះ តារាស្រី Samantha Ko មានឈ្មោះបោះសំឡេងខ្លាំង បន្ទាប់ពីនាងលេចមុខក្នុងរឿងភាគល្បី “រាជនីសារព័ត៌មាន”។ ដូច្នេះតម្លៃខ្លួនរបស់នាងក៏ឡើងថ្លៃ និងមានការអញ្ជើញចូលរួមកម្មវិធីផ្សេងៗ ហើយរូបនាងក៏ចាប់ផ្ដើមក្លាយជាទីចាប់អារម្មណ៍របស់មហាជនដូចគ្នា។
គួរបញ្ជាក់ថា ចាប់តាំងពីបង្ហាញខ្លួនក្នុងពិភពសិល្បៈហុងកុងក្នុងឆ្នាំ ២០០៨ តារាស្រី Samantha Ko បានប្រកាសពីទំនាក់ទំនងស្នេហាជាផ្លូវការតែម្ដងប៉ុណ្ណោះ គឺជាមួយអ្នកនិពន្ធចម្រៀង Tang ChiWai។ ក្នុងឆ្នាំ ២០២០ អ្នកទាំងពីរបានប្រកាសចែកផ្លូវគ្នា ក្រោយសេពគប់គ្នាអស់រយៈពេល ៥ ឆ្នាំ។ ពាក្យចចាមអារ៉ាមជាច្រើនបានផ្សព្វផ្សាយថា អ្នកទាំងពីរដល់ដើរផ្លូវបញ្ចប់ដោយសារតែលោកបានក្បត់ចិត្ដរបស់នាងទៅលួចមានអ្នកថ្មី ៕
























































Account
Security
Favourite Content