Billboard បានតែងតាំង Taylor Swift និងតារាផ្សេងទៀត ក្លាយជាតារាចម្រៀងអស្ចារ្យបំផុតប្រចាំសតវត្សទី ២១ ឬ Top Artist of the 21th Century ដោយយោងទៅតាមភាពជោគជ័យតាំងតែពីដើមឆ្នាំ២០០០ ដល់ចុងឆ្នាំ២០២៤។
កាលពីថ្ងៃទី៨ ខែមករាកន្លងទៅ Billboard ទើបតែបានបញ្ចេញនូវចំណាត់ថ្នាក់ Top Artist of the 21th Century ដោយបានតែងតាំងតារាក្នុងវិស័យចម្រៀងសរុបចំនួន១០រូប ផ្នែកទៅលើលទ្ធផលនៅលើ Billboard 200 និង Hot 100 គិតចាប់ពីថ្ងៃទី១ ខែមករា ឆ្នាំ២០០០ មកត្រឹមថ្ងៃទី២៨ ខែធ្នូ ឆ្នាំ២០២៤។
បើទោះបីជា Taylor Swift ទើបតែចូលប្រឡូកក្នុងវិស័យនេះកាលពីឆ្នាំ២០០៦ ក៏ពិតមែន ក៏ប៉ុន្តែអ្នកចម្រៀងវ័យ ៣៥ឆ្នាំទទួលបានប្រជាប្រិយភាពខ្លាំងតាំងតែស្នាដៃដំបូងៗ រហូតទទួលបានចំណាត់ថ្នាក់លេខ១ នៅលើ Billboard 200 រហូតដល់ទៅ ១៤ អាល់ប៊ុម និង ១២ដងទៀតជាមួយនឹងចម្រៀងចំណាត់ថ្នាក់តែមួយនេះនៅលើ Billboard Hot 100។ ជាក់ស្ដែង The Tortured Poets Department ដែលស្នាដៃអាល់ប៊ុមថ្មីចុងក្រោយបង្អស់ក៏ទទួលបានការពេញនិយមមិនតិចនោះដែរ។
បន្ថែមពីនេះទៀត អ្នកចម្រៀងប៉ុបរូបនេះក៏មានស្នាដៃចម្រៀងនៅតារាងកំពូលទាំង១០ របស់ Billboard Hot 100 រហូតដល់ទៅ៥៩បទ ដែលជាចំនួនច្រើនបំផុតសម្រាប់សិល្បករស្រី។ ក្រៅពីនេះ នាងក៏ជាតារាទោលដែលអាចឈរជើងបានយូរបំផុតនៅលើ Billboard 200 សរុប ៨៦សប្ដាហ៍ ស្របគ្នាជាមួយនឹងតំណែងជាតារាប្រចាំឆ្នាំ Year-end Top Artists ចំនួន ៤ដង ក្នុងឆ្នាំ២០០៩ ឆ្នាំ២០១៥ ឆ្នាំ២០២៣ និងឆ្នាំ២០២៤។
លទ្ធផលទាំងនេះ អាចនាំឱ្យ Taylor Swift ដណ្ដើមតំណែងជា តារាចម្រៀងអស្ចារ្យបំផុតប្រចាំសតវត្សទី ២១ បានយ៉ាងជោគជ័យ ទន្ទឹមគ្នានឹងសិល្បករផ្នែកចម្រៀងចំនួន ៩រូបទៀត ដែលទទួលបានចំណាត់ថ្នាក់ពីលេខ២ ដល់លេខ១០រៀងគ្នា រួមមាន Drake, Rihanna, Post Malone, Eminem, The Weeknd, Beyoncé, Justin Bieber, Bruno Mars និង Usher៕