នាដការរបាំព្រះរាជទ្រព្យ សាលី ស្រីមាស ដែលកំពុងខ្វះខាតថវិកា ព្យាបាលជំងឺធ្ងន់ធ្ងរ ពេលនេះមានសប្បុរសជនរ៉ាប់រងចំណាយលើការព្យាបាលទាំងស្រុង ដើម្បីអាចឱ្យកញញាអាចនៅបម្រើវិស័យសិល្បៈបុរាណខ្មែរបន្តទៀត។

តួអង្គអប្សរា សាលី ស្រីមាស និយាយទាំងទឹកភ្នែក អួលដើមករ ព្រមទាំងបានថ្លែងអំណរអរគុណទៅកាន់អ្នកឧកញ៉ា លាង ម៉េង និងលោកជំទាវដែលបានស្រោចស្រង់ជីវិតរបស់ខ្លួនឱ្យបានរួចផុតពីទុក្ខក្នុងគ្រាលំបាកនាពេលនេះ។ នាថ្ងៃទី២០ កុម្ភៈ ២០២៥ ក្នុងពិធីចួបសំណេះសំណាល និងសួរសុខទុក្ខដោយផ្ទាល់ ក្រោយសាកសួរ និងបានដឹងសព្វគ្រប់អំពីស្ថានភាពជំងឺរបស់នាដការី សាលី ស្រីមាស រួចមក អ្នកឧកញ៉ា លាង ម៉េង និងលោកជំទាវ បានប្រកាសទទួលរ៉ាប់រងការចំណាយទាំងស្រុងលើការព្យាបាលនាដការីរបាំ វ័យ ២៤ ឆ្នាំរូបនេះដើម្បីអាចឱ្យប្អូនស្រីនៅបន្តប្រឡូក និងបម្រើនៅក្នុងវិស័យសិល្បៈបុរាណខ្មែរបន្តទៀត។
ជាមួយគ្នានោះដែរ អ្នកឧកញ៉ា លាង ម៉េង ក៏បានលើកទឹកចិត្ត ក៏ដូចជាសម្ដែងនូវការកោតសរសើររាល់កិច្ចខិតខំកន្លងមករបស់ សាលី ស្រីមាស ក្នុងវិស័យសិល្បៈបុរាណខ្មែរទាំងក្នុង និងក្រៅប្រទេស។ ការជួយស្រោចស្រង់ជីវិតដែលស្ទើរតែមិនអាចដើរបន្តទៅមុខបានធ្វើឱ្យនាដកា សាលី ស្រីមាស ទប់ទឹកភ្នែកមិនជាប់ព្រោះមិនដឹងគួររកពាក្យណាមកបរិយាយនិងបង្ហាញពីការដឹងគុណមួយនេះមានតែម្រាមដៃដប់ប្រណមថ្លែងអំណរអរគុណព្រមទាំងសន្យានឹងមើលថែខ្លួនឱ្យបានល្អដើម្បីទទួលការព្យាបាលបន្ត។










មហាជនប្រាកដជាបានជ្រាបខ្លះៗហើយថា សាលី ស្រីមាស ជាតួអង្គឯកអប្សរា ដែលតែងបង្ហាញវត្តមានសម្ដែងក្នុងកម្មវិធីវប្បធម៌ក្នុងស្រុកជាច្រើននាពេលកន្លងមក។ នាដការរបាំ ដែលមកពីសាលា នរោត្តមបុប្ផាទេវី រូបនេះជានាដការីវ័យក្មេងដែលពោរពេញទៅដោយទេពកោសល្យ។ សាលី ស្រីមាស ជាក្មេងស្រី មានជីវិតកម្សត់ មានការតស៊ូខណៈខ្លួនជាក្មេងកំព្រាឪពុកតាំងពីតូច៕
រូបភាព៖ សមាគមសិល្បករខ្មែរ























Account
Security
Favourite Content