រឿងភាគប្រវត្តិសាស្ត្រខ្មែរដំបូងបង្អស់ ចំណងជើងថា «អប្សរាមហាអង្គរ» ដែលជាស្នាដៃតែងនិពន្ធ និងជាការដឹកនាំរបស់លោក ហ្វៃ សំអាង បានរៀបចំពិធីក្រុងពាលីចេញថតយ៉ាងអធិកអធម កាលពីព្រឹកថ្ងៃទី២២ ខែកុម្ភៈ ឆ្នាំ២០២៣ ម្សិលមិញនេះ។
ក្នុងនោះ គេឃើញសិល្បករ-សិល្បការិនីចាស់ក្មេងជាច្រើនរូប បានបង្ហាញវត្តមានក្នុងពិធីក្រុងពាលីបើកកាមេរ៉ាចេញថតនេះ សូម្បីតារាសម្តែងល្បីឈ្មោះទសវត្សរ៍ ៨០-៩០ អ្នកស្រី នារី រ័ត្នគន្ធា ដែលហោះមកពីអាមេរិក ដើម្បីថតរឿងនេះ។ គួរឱ្យសោកស្តាយ អ្នកស្រី អម្ពរ ទេវី មិនបានចូលរួមកម្មវិធីនេះនោះទេ។
ក្រៅពីតារាសម្តែងល្បីៗទសវត្សរ៍ ៨០-៩០ ដូចជា លោក ទេព រិន្ទដារ៉ូ អ្នកស្រី អម្ពរ ទេវី និងអ្នកស្រី នារី រ័ត្នគន្ធា សូម្បីអ្នកស្រី អ៊ឹម សុវណ្ណផល្លា ក៏ត្រូវលោក ហ្វៃ សំអាង អញ្ញើញឱ្យចូលរួមសម្តែងក្នុងរឿងភាគខ្នាតធំនេះផងដែរ។ ជាក់ស្តែង ក្នុងថ្ងៃក្នុងពាលីម្សិលមិញនេះ អ្នកស្រី អ៊ឹម សុវណ្ណផល្លា ក៏បានចូលរួម និងបានថតរូបអនុស្សាវរីយ៍ជាមួយសិល្បករ-សិល្បការិនីរួមជំនាន់យ៉ាងសប្បាយរីករាយថែមទៀតផង។
យ៉ាងណាមិញ ពេលនេះគេនៅមិនទាន់មានដំណឹងថា តួអង្គ នាងនោ ក្នុងចម្រៀងខារ៉ាអូខេ ទុំទាវ ជំនាន់ឆ្នាំ ៩០ ជាង នឹងត្រូវសម្តែងជាតួអង្គអ្វីក្នុងរឿង «អប្សរាមហាអង្គរ» នោះទេ ព្រោះលោក ហ្វៃ សំអាង នៅមិនទាន់បញ្ជាក់នៅឡើយ គ្រាន់តែថាតារាសម្តែងល្បីឈ្មោះទសវត្សរ៍៨០-៩០ ជាច្រើនរូបដែលរៀបរាប់ខាងលើ នឹងត្រូវប៉ះគ្នាម្តងទៀតក្នុងរឿងនេះ ហើយលោក ទេព រិន្ទដារ៉ូ និងដៃគូចាស់ អ្នកស្រី អម្ពរ ទេវី នឹងមានឈុតឆាកស្នេហាផ្អែមល្អែមលើសជំនាន់មុនៗទៅទៀត។ ប៉ុន្តែពេលនេះមិនទាន់អាចទម្លាយសាច់រឿងទាំងអស់បានឡើយ។
ក្នុងវីដេអូ Live ជាមួយអ្នកស្រី នារី រ័ត្នគន្ធា មុនចាប់ផ្តើមពិធីក្រុងពាលី តួអង្គ នាងនោ និង តួអង្គ នាងទាវ បានបង្ហាញអារម្មណ៍សប្បាយរីករាយដែលបានចូលរួមសម្តែងក្នុងរឿងភាគបុរាណថ្មីនេះ ព្រោះអ្នកទាំងពីរចាកឆ្ងាយពីវិថីសិល្បៈជាច្រើនឆ្នាំណាស់មកហើយ ដូច្នេះការចូលរួមសម្តែងរឿងនេះគឺចង់ទុកជាស្នាដៃ និងជាអនុស្សវរីយ៍សម្រាប់ខ្លួនឯង និងអ្នកជំនាន់ក្រោយ។

ងាកទៅមើលការផលិតវិញ លោក ហ្វៃ សំអាង មិនបានបញ្ជាក់ថា ភាពយន្ដនេះត្រូវចំណាយទុនផលិតទាំងអស់ប៉ុន្មាននោះទេ តែលោកបង្ហើបថា គ្រាន់តែបើកកាមេរ៉ាចេញថតចាយអស់ជាង ២០ម៉ឺនដុល្លារទៅហើយ ខណៈគ្រឿងអលង្ការលើតួអង្គនីមួយៗ ម្នាក់មិនក្រោម ៥០០ ដុល្លារនោះទេ។
រឿង «អប្សរាមហាអង្គរ» ចំណាយពេលតែងនិពន្ធ៣ ឆ្នាំ ដោយលោក ហ្វៃ សំអាង និងលោក យូ សុភា និងបានសិក្សាស្រាវជ្រាវលើគ្រឿងអលង្ការរយៈពេល១ ឆ្នាំបន្ថែមទៀត ហើយសម្រាប់តួអង្គសម្តែង គឺមានរហូតដល់ជាង ១០០ នាក់។ រឿងនេះមានប្រមាណ ៥០ ភាគ ហើយតាមគម្រោងរឿងនេះ នឹងថតរយៈពេល ១ ឆ្នាំកន្លះ ហើយត្រូវថតនៅទីតាំងជាច្រើនកន្លែងក្នុងប្រទេសកម្ពុជា៕























Account
Security
Favourite Content