ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ពិធីបុណ្យហាឡូវីន ឬពិធីបុណ្យព្រលែងខ្មោច តែងតែត្រូវបានប្រារព្ធឡើងនៅថ្ងៃទី៣១ ខែតុលា។ ខណៈជាពិធីបុណ្យលោកខាងលិច ប៉ុន្តែប្រជាជនកម្ពុជា និងនៅអាស៊ីជាច្រើនក៏ចូលចិត្តពិធីបុណ្យនេះដែរ ដោយរៀងរាល់ឆ្នាំឱ្យតែដល់បុណ្យនេះ គឺនឹងមានពិធីជប់លៀង និងការតុបតែងខ្លួនជាមួយសំលៀកបំពាក់ខ្មោច ដើម្បីអបអរសាទរមិនខាន។ ប៉ុន្តែ ដឹងអត់ថាដើមកំណើតនៃបុណ្យ Halloween គឺគួរឱ្យខ្លាចជាងអ្វីដែលមនុស្សជាច្រើនគិត?
🎃 ប្រភពដើមនៃពិធីបុណ្យហាឡូវីន
ពិធីបុណ្យហាឡូវីនគឺជាពិធីបុណ្យមួយដែលគេតែងតែប្រារព្ធនៅអាមេរិក និងអឺរ៉ុប ដោយមានប្រភពដើមមកពីពិធីបុណ្យរបស់ជនជាតិ Celts បុរាណដែលប្រារព្ធឡើងរាប់ពាន់ឆ្នាំមកហើយដើម្បីអបអរការបញ្ចប់នៃរដូវក្តៅ។ ជនជាតិ Celts ក៏បានហៅបុណ្យនេះថាពិធីបុណ្យនៃអ្នកស្លាប់ផងដែរ ព្រោះគេជឿថាពិភពលោកបច្ចុប្បន្ន និងពិភពលោកនៃអ្នកស្លាប់គឺនៅជិតគ្នាបំផុតក្នុងថ្ងៃនេះ ដែលអនុញ្ញាតឱ្យវិញ្ញាណត្រូវបានដោះលែងពីពិភពលោកនៃអ្នកស្លាប់មកពិភពបច្ចុប្បន្នបាន។
សម្រាប់វិញ្ញាណបុព្វបុរសនឹងត្រូវបានស្វាគមន៍មកផ្ទះវិញ ខណៈពេលដែលវិញ្ញាណវង្វេង ឬវិញ្ញាណអាក្រក់ត្រូវបានបណ្តេញចេញ។ មនុស្សបុរាណជឿថាវិធីល្អបំផុតដើម្បីបណ្តេញវិញ្ញាណអាក្រក់គឺស្លៀកពាក់ និងតុបតែងមុខដូចខ្មោច។ វិធីនេះក៏ត្រូវបានប្រើដើម្បីក្លែងខ្លួនពីខ្មោច និងការពារខ្លួនពីគ្រោះថ្នាក់ផងដែរ។
ពីពិធីបុណ្យដែលប្រារព្ធឡើងដើម្បីបណ្ដេញវិញ្ញាណខ្មោចពីអតីត មកដល់បច្ចុប្បន្ន បុណ្យហាឡូវីន គឺជាពិធីបុណ្យដែលផ្ដោតលើភាពសប្បាយរីករាយច្រើនជាង ជាពិសេសសម្រាប់កុមារ ដែលទន្ទឹងរង់ចាំដោយអន្ទះសាចំពោះល្បែង Trick or Treats ដោយក្នុងល្បែងនេះក្មេងៗត្រូវស្លៀកពាក់ជាខ្មោច បិសាច ឬមេធ្មប់ ដោយកាន់ល្ពៅឆ្លាក់ ឬ Jack-o’-Lanterns គោះទ្វារ ហើយនិយាយថា “Trick or Treats” ដើម្បីសុំនំ ឬស្ករគ្រាប់។
ប្រសិនបើម្ចាស់ផ្ទះនិយាយថា “Tricks” នោះមានន័យថាពួកគេសុខចិត្តចុះចាញ់ ហើយត្រៀមខ្លួនផ្តល់ស្ករគ្រាប់ដល់ក្មេងៗតាមសម្រួល។ ក៏ប៉ុន្តែប្រសិនបើពួកគេនិយាយថា “Treats” នោះមានន័យថាក្មេងៗត្រូវតែរកវិធីដើម្បីបញ្ឆោតម្ចាស់ផ្ទះឱ្យផ្តល់ស្ករគ្រាប់ដល់ពួកគេ។
ទោះជាយ៉ាងណាក៏ដោយ នៅទីបញ្ចប់ ចាស់ៗតែងតែចុះចាញ់នឹងភាពគួរឱ្យស្រលាញ់របស់ខ្មោចតូចៗទាំងនេះ ហើយមិនអាចធ្វើអ្វីបានក្រៅពីផ្តល់ស្ករគ្រាប់ដល់ពួកគេនោះទេ។ បន្ថែមពីលើពិធីបុណ្យហាឡូវីនដ៏ល្បីល្បាញលើពិភពលោក ក៏មានពិធីបុណ្យគួរឱ្យចាប់អារម្មណ៍ជាច្រើនទៀតពាក់ព័ន្ធអ្នកស្លាប់ ឬពិធីបុណ្យដែលទាក់ទងនឹងខ្មោច អារក្ស និងវិញ្ញាណ នៅជុំវិញពិភពលោកមានជាអាទិ៍ដូចជា៖
👻 ទិវានៃអ្នកស្លាប់ Day of the Dead
ទិវានៃអ្នកស្លាប់ គឺជាប្រពៃណីម៉ិកស៊ិកបុរាណដែលប្រារព្ធឡើងដើម្បីសុំពរជ័យ និងរំលឹកដល់មិត្តភក្តិ មនុស្សជាទីស្រលាញ់ ឬសមាជិកគ្រួសារដែលបានស្លាប់។ ពិធីបុណ្យនេះមិនពោរពេញដោយទុក្ខព្រួយ ឬការភ័យខ្លាចនោះទេ ប៉ុន្តែជាពិធីបុណ្យមួយដែលពោរពេញទៅដោយភាពសប្បាយរីករាយ ការប្រារព្ធពិធី ក្បួនដង្ហែ និងផ្នូរដែលតុបតែងយ៉ាងស្រស់ស្អាត ដែលផ្តល់នូវភាពផ្ទុយគ្នាទៅនឹងពិធីបុណ្យហាឡូវីន ដែលមានភាពគួរឱ្យខ្លាចជាង។
👻 ពិធីបុណ្យ Yokai
ជាពិធីបុណ្យជប៉ុនមួយដែលឧទ្ទិសដល់វិញ្ញាណ ខ្មោច និងអារក្ស។ យ៉ូកៃគឺខុសពីវិញ្ញាណធម្មតា ដែលមានទម្រង់ និងប្រភេទផ្សេងៗគ្នា។ ជនជាតិជប៉ុនជឿថាវិញ្ញាណខ្លះនាំមកនូវសំណាងអាក្រក់ដល់អ្នកដែលឃើញពួកវា ខណៈពេលដែលវិញ្ញាណខ្លះទៀតនាំមកនូវសំណាងល្អ។ ចំណុចលេចធ្លោនៃពិធីបុណ្យនេះគឺក្បួនដង្ហែ និងតួអង្គស្លៀកពាក់របស់យ៉ូកៃផ្សេងៗ ដែលប្រារព្ធឡើងរៀងរាល់ថ្ងៃអាទិត្យទីបីនៃខែវិច្ឆិកា។
👻 ពិធីបុណ្យភ្ជុំបិណ្ឌ
បុណ្យភ្ជុំបិណ្ឌ គឺជាពិធីបុណ្យនឹករលឹកសាច់ញាតិដែលបានស្លាប់របស់ជនជាតិខ្មែរ ដែលប្រារព្ធឡើងរៀងរាល់ថ្ងៃ ១រោច ដល់ថ្ងៃ ១៥រោច ខែភទ្របទ ចន្លោះ ខែកញ្ញា និង ខែតុលា។ នៅក្នុងប្រពៃណីរបស់កម្ពុជា ពិធីបុណ្យនេះត្រូវបានគេហៅថា “ពិធីសែនដូនតា” ដែលមានប្រវត្តិតាំងពី សម័យមុនអង្គរមកម៉្លេះ។ រៀងរាល់ខែភទ្របទ គេមានជំនឿថា ស្តេចយមរាជ និងបើកទ្វារឋាននរក ចំនួន ១៥ថ្ងៃ ដើម្បីដោះលែងពពួកប្រេត ឱ្យមកស្វែងរកអាហារ និងជាការជួបញាតមិត្ត និង កូនចៅ របស់ពួកគេផង ដើម្បីទទួលបាននូវកុសលផលបុណ្យ ដែលកូនចៅពួកគេបានធ្វើទានឧទ្ទិសបញ្ជូនមក ដូច្នេះហើយក្នុងពិធីបុណ្យភ្ជុំបិណ្ឌ ប្រជាពលរដ្ឋកម្ពុជាតែងរៀបចំម្ហូបអាហារ ដើម្បីសែនដូនតា ជូនសាច់ញាតិរបស់ខ្លួនដោយសេចក្ដីនឹករលឹក ៕
Account
Security
Favourite Content