ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
មាតិកាអប់រំ លើកទឹកចិត្ត ការបញ្ជ្រាបសាវិជ្ជមាន និងចំណេះដឹងល្អៗ គឺពិតជាមានសារៈសំខាន់បំផុត នៅលើបណ្ដាញសង្គមនានា ដែលជះឥទ្ធិពលបែបវិជ្ជមានទៅដល់យុវជន ជាពិសេសយុវជនវ័យក្មេងដែលជាធនធានមនុស្សរបស់ប្រទេសជាតិ។ ដូច្នេះនៅថ្ងៃនេះ AMS-Infotainment សូមលើកយកអ្នកផលិតមាតិកាអប់រំ លើកទឹកចិត្ត ល្បីៗ ៥ រូប ដែលពួកគេមានស្នាដៃល្អៗជាច្រើន ចូលរួមចំណែកលុបបំបាត់មាតិកាអវិជ្ជមាននៅលើបណ្ដាញសង្គម ដែលអាចជះផលអាក្រក់ដល់យុវជន។ បុគ្គលទាំង ៥ ដែលយើងលើកមកនិយាយពេលនេះរួមមាន៖
១.លោក នឹម ឈុន្នី
បុគ្គលទី១ ដែលយើងលើកមកនិយាយនៅពេលនេះ គឺជាគ្រូបណ្ដុះបណ្ដាល និងជាអ្នកអប់រំផ្លូវចិត្តដ៏ល្បីមួយរូបនៅកម្ពុជា។ ជារឿយៗលោកតែងតែបង្ហាញមុខនៅលើវេទិកានានាដែលពាក់ព័ន្ធនឹងកម្មវិធីចែករំលែកចំណេះដឹង ការអប់រំ និងការលើកទឹកចិត្ត។ ស្ថាបនិកក្រុមហ៊ុនបណ្ដុះបណ្ដាលវិបស្សនារូបនេះក៏តែងផលិតនូវមាតិកាល្អៗ បង្ហោះនៅលើបណ្ដាញសង្គមរបស់លោកមិនថាជាវីដេអូ ឬជាសំណេរ ឃ្លា ប្រយោគនោះទេ។
ការប្រើប្រាស់ភាសានិយាយផ្អែមស្រទន់ ពោរពេញដោយអត្ថន័យ ផ្សាភ្ជាប់នឹងបញ្ហារស់នៅរបស់មនុស្សក្នុងសង្គម ធ្វើឱ្យអ្នកស្ដាប់ទទួលបាននូវចំណេះដឹងល្អៗ ពាក្យពេចន៍ល្អៗ ដែលអាចជួយឱ្យអារម្មណ៍បានធូរស្បើយពីបញ្ហាដែលកំពុងជួបប្រទះ។ រាល់ការចែករំលែករបស់លោកប្រៀបដូចជាពន្លឺជួយបំភ្លឺដល់អ្នកកំពុងជួបបញ្ហា ទុក្ខលំបាក ឱ្យទទួលបានគំនិតថ្មីៗ និងបណ្ដុះឱ្យមានស្មារតីតស៊ូ ពុះពារនៅក្នុងជីវិតបន្តទៅមុខទៀត។
២.កញ្ញា នុត ក្លារ៉ា
ស្ត្រីខ្មែរវ័យក្មេងរូបនេះវិញ មិនត្រឹមតែមានរូបសម្បត្តិស្រស់សោភាប៉ុណ្ណោះទេ ប៉ុន្តែគាត់គឺជាបុគ្គលពោរពេញដោយចំណេះដឹង និងបទពិសោធពេញខ្លួន។ ជារឿយៗកញ្ញា នុត រដ្ឋា ឬអ្នកគ្រប់គ្នាស្គាល់តាមរយៈបណ្ដាញសង្គម នុត ក្លារ៉ា តែងបង្ហាញមុខនៅលើវេទិកាជាច្រើន ដែលទាក់ទងនឹងការបណ្ដុះបណ្ដាល ការអប់រំ លើកទឹកចិត្តទៅដល់យុវជន តាមរយៈការរៀបចំពីស្ថាប័នពាក់ព័ន្ធផ្សេងៗ។
ក្រឡេកមកមើលបណ្ដាញសង្គមរបស់នាយិកាប្រតិបត្តិនៃក្រុមហ៊ុន Apsara Media Service រូបនេះវិញ ក៏តែងតែចែករំលែកចំណេះដឹងល្អៗដ៏សម្បូរបែប ក្នុងគោលបំណងឱ្យអ្នកទស្សនាទទួលបាននូវគំនិតល្អៗជាច្រើន យកមកត្រិះរិះពិចារណា ធ្វើយ៉ាងណាឱ្យការរស់នៅកាន់តែល្អប្រសើរ។ ការប្រើប្រាស់ពាក្យពេចន៍ល្អៗ ងាយយល់ ងាយទទួលបាន គឺជាអ្វីដែលនាំឱ្យមនុស្សជាច្រើនចូលចិត្តស្ដាប់ការចែករំលែករបស់ កញ្ញា ក្លារ៉ា។ ជាពិសេសប្រធានបទ និងខ្លឹមសារ ដែលទាក់ទងនឹងជីវិតរស់នៅប្រចាំថ្ងៃ ជាអ្វីដែលគ្រប់គ្នាចង់ដឹង។
៣.លោក ប៉េងអាន
ដោយឡែកមកដល់យុវជនវ័យក្មេងរូបនេះវិញ លោកក៏ជាអ្នកជំនាញផ្នែកផ្លូវចិត្តមួយរូបនៅប្រទេសកម្ពុជា។ ប៉េងអាន តែងផលិតនូវមាតិកាល្អៗជាច្រើនរាប់មិនអស់ មិនថាទាក់ទងនឹងបញ្ហាការងារ ទំនាក់ទំនង ស្នេហា គ្រួសារ បញ្ហាហិរញ្ញវត្ថុ និងជាពិសេសវីដេអូបែបលើកទឹកចិត្ត។ រាល់វីដេអូនីមួយៗរបស់កំលោះសង្ហារូបនេះ សុទ្ធតែជាប្រធានបទសំខាន់ៗដែលទាក់ទងនឹងជីវិតប្រចាំថ្ងៃ។ អត្ថន័យនៃវីដេអូ និងមាតិកានានារបស់គេ គឺក្នុងន័យឱ្យអ្នកទស្សនាទទួលបានគន្លឹះល្អៗ ដើម្បីដោះស្រាយបញ្ហាផ្សេងៗ ឬជាសាល្អៗនាំឱ្យអ្នកគ្រប់គ្នា ទទួលបានអារម្មណ៍ល្អប្រសើរបន្ទាប់ពីស្ដាប់ការចែករំលែករបស់គេ។
៤.អ្នកនិពន្ធ គឹម ឌីណា
អ្នកនិពន្ធប្រលោមលោកវ័យក្មេង សម្រស់ស្រស់សោភា គឹម ឌីណា ក៏ជាបុគ្គលគន្លឹះមួយរូប ដែលតែងតែចែករំលែកនូវមាតិកាល្អៗជាច្រើន។ ម្ចាស់ស្នាដៃសៀវភៅលើកទឹកចិត្ត «មនុស្សបាក់ទឹកចិត្ត» តែងរិះរកប្រធានបទសំខាន់ៗដែលទាក់ទងនឹងការរស់នៅរបស់មនុស្សគ្រប់រូប។ ជាពិសេសប្រធានបទដែលផ្សាភ្ជាប់នឹងបញ្ហារស់នៅ ទំនាក់ទំនង បញ្ហាស្នេហា គ្រួសារជាដើម។ ភាគច្រើនការចែករំលែកទាំងនោះ កើតចេញពីបទពិសោធដែលនាងបានឆ្លងកាត់ ហើយវាគឺជាសាល្អៗឱ្យអ្នកគ្រប់គ្នាទទួលបាននូវគន្លឹះល្អៗដើម្បីយកមកអនុវត្ត។ ពាក្យពេចន៍ច្បាស់ៗ បង្កប់ដោយអត្ថន័យ និងខ្លឹមសារយ៉ាងជ្រាលជ្រៅ គឺជាអ្វីដែលនាំឱ្យមនុស្សជាច្រើនចូលចិត្តមាតិការបស់អ្នកនិពន្ធ គឹម ឌីណា។
៥.កញ្ញា សេង ហ្គិចលី
មកដល់យុវតីវ័យក្មេងចុងក្រោយដែលយើងលើកយកមកនិយាយពេលនេះ គឺកញ្ញា សេង ហ្គិចលី ដែលអ្នកគ្រប់គ្នាស្គាល់នាងតាមរយៈទំព័រហ្វេសប៊ុកផេក Seng Gechly។ យុវតីរូបនេះក៏ជាអ្នកនិពន្ធសៀវភៅបែបអប់រំ និងលើកទឹកចិត្តមួយរូបដែលកំពុងមានឈ្មោះល្បីក្នុងស្រទាប់យុវជនវ័យក្មេងនាបច្ចុប្បន្ននេះ។ ក្រៅពីជាអ្នកនិពន្ធរូបនាងបានផលិតនូវមាតិកាល្អៗជាច្រើន ដែលសុទ្ធតែមានអត្ថប្រយោជន៍ដល់អ្នកទស្សនា ជាពិសេសយុវជនវ័យក្មេង។ ប្រធានបទរបស់ ហ្គិចលី សុទ្ធតែជារឿងសំខាន់ៗ ដែលជាសាដាស់តឿន គន្លឹះល្អៗ ជុំវិញការស់រស់នៅ ការសិក្សា បញ្ហានានាដែលកើតឡើងក្នុងជីវិតមនុស្សម្នាក់ៗ។ ក្រោយទស្សនានូវមាតិកាទាំងនោះ យើងអាចទទួលបាននូវសារអប់រំ លើកទឹកចិត្ត និងចំណេះដឹងដ៏ទូលំទូលាយ៕
Account
Security
Favourite Content