បើទោះជាមានមុខសម្ដែងក្នុងរឿង ប៉ុន្តែអតីតសមាជិកក្រុម Big Bang T.O.P ពេលនេះត្រូវបានដកឈ្មោះចេញពីការផ្សព្វផ្សាយគ្រប់រូបភាពរបស់ភាពយន្តភាគ ‘Squid Game’ រដូវកាលទី ២ ។

ស្របពេលដែលក្រុមហ៊ុន Netflix កំពុងត្រៀមសម្រាប់ការចេញផ្សាយ ‘Squid Game’ រដូវកាលទី ២ នៅថ្ងៃទី ២៦ ខែធ្នូខាងមុខនេះ អ្នកគាំទ្រជាច្រើនបានបង្ហាញភាពងឿងឆ្ងល់អំពីអវត្តមានរបស់ T.O.P (Choi Seung Hyun) ពីផ្ទាំងរូបភាពសំខាន់ទីពីរ និងបញ្ជីតួសម្តែងផ្លូវការ ទោះបីជាកន្លងទៅមានការប្រកាសពីការចូលរួមរបស់លោកក៏ដោយ។
កាលពីថ្ងៃទី ២៧ ខែវិច្ឆិកា ក្រុមហ៊ុន Netflix បានបង្ហាញផ្ទាំងរូបភាពសំខាន់សម្រាប់ ‘Squid Game’ រដូវកាលទី ២ ដែលមានតួឯកគឺតារាសម្តែង Lee Jung Jae កំពុងនាំមុខអ្នកចូលរួមលេងហ្គេមមួយក្រុមរត់ទៅរកកន្លែងណាមួយ។

ទោះយ៉ាងណាក្នុងរូបនោះ T.O.P បែរជាត្រូវអវត្តមាន ហើយលើសពីនេះ បញ្ជីរាយឈ្មោះតួសម្តែងបានបង្ហាញឈ្មោះ Im Si Wan, Kang Ha Neul, Lee Jin Wook, Park Sung Hoon, Yang Dong Geun, Kang Ae Shim និង Jo Yu Ri ប៉ុន្តែឈ្មោះ Choi Seung Hyun មិនត្រូវបានរាប់បញ្ចូលនោះទេ។
ក្នុងបញ្ជីរាយនាមពេញដែលបានរាយនាមតារាផ្សេងទៀតដូចជា Lee Jung Jae, Lee Byung Hun, Wi Ha Joon, Park Gyu Young, Lee Seo Hwan, Chae Gook Hee, Lee Da Wit, Noh Jae Won, Won Ji An និង Gong Yoo ក៏មិនឃើញមានឈ្មោះ T.O.P ដែរ។
គួររំឭកថា T.O.P បានចុះឈ្មោះបំពេញកាតព្វកិច្ចយោធាដោយបម្រើការងារជាមន្ត្រីប៉ូលីសក្នុងខែកុម្ភៈ ឆ្នាំ ២០១៧ ប៉ុន្តែក្នុងពេលបំពេញកាតព្វកិច្ច ក៏មានការរកឃើញថាលោកធ្លាប់ជក់កញ្ឆាកាលពីឆ្នាំ២០១៦ ដែលនាំឱ្យលោកត្រូវបានកាត់ទោសដាក់ពន្ធនាគាររយៈពេល ១០ ខែជាមួយនឹងការព្យួររយៈពេល ២ ឆ្នាំ។ នៅខែមិថុនាឆ្នាំ ២០២២ លោកបានចាកចេញពីក្រុម Big Bang ជាផ្លូវការ។ រហូតដល់ខែមិថុនា ឆ្នាំ២០២៣ នៅពេលមានការប្រកាសថាលោកនឹងចូលសម្ដែងរឿង “Squid Game” អ្នកលេងអ៊ិនធឺណិតជាច្រើនបានបញ្ចេញមតិប្រឆាំង និងនាំគ្នាធ្វើពហិការមិនទស្សនារដូវកាលថ្មីនេះឡើយ។

សម្រាប់ភាពយន្តភាគ ‘Squid Game’ រដូវកាលទី ២ វិញ សាច់រឿងនឹងផ្តោតលើការប្រឈមគ្នារវាងតួអង្គ Gi Hun (សម្តែងដោយ Lee Jung Jae) ដែលត្រលប់មកស្វែងសងសឹកតាមរយៈការចូលរួមលេងហ្គេមម្ដងទៀត និងតួអង្គ Frontman (សម្តែងដោយ Lee Byung Hun) រួមជាមួយនឹងការចាប់ផ្តើមឡើងវិញនៃហ្គេមភ្នាល់ដាក់ជីវិត ៕























Account
Security
Favourite Content