ក្រោយជាប់ឃុំខ្លួនដោយសាររឿងក្ដីឆបោកប្រជាជន The Icon Group មកដល់ពេលនេះ តុលាការបានសម្រេចដោះលែងខ្លួន តារាសម្ដែងថៃ Min Phechaya និង Sam Yuranunt ពីការឃុំឃាំង ស្របពេលដែលពិធីករ Kan Kantathavorn នៅជាប់ឃុំនៅឡើយ ដោយសារហេតុផលតួនាទីផ្សេងគ្នា។
តាមរយៈការចុះផ្សាយរបស់សារព័ត៌មានភាសាថៃ Sanook នៅថ្ងៃទី៨ ខែមករានេះ គឺជាថ្ងៃបញ្ចប់នៃការកំណត់ឃុំខ្លួនរបស់បុគ្គលពាក់ព័ន្ទទាំង ១៧រូប ឯការឃុំខ្លួនរបស់ប្រធានក្រុមហ៊ុនលោក Paul Waratphon នឹងផុតកំណត់នៅថ្ងៃទី៩ ខែមករានេះ។ ក្នុងករណី ព្រះរាជអជ្ញាសម្រេចមិនចោទប្រកាន់បន្ថែម ឬធ្វើការពិចារណាមិនទាន់ចប់សព្វគ្រប់ នោះបុគ្គលទាំង១៨រូបនេះនឹងអាចមានសេរីភាពពីការឃុំខ្លួនសាជាថ្មី។
ជាក់ស្ដែង ព្រះរាជអជ្ញាសម្រេចមិនចោទប្រកាន់តារាសម្ដែង Min Phechaya និង Sam Yuranunt បន្តទេ តែនៅតែប្ដឹងបន្តទៅប្រធានក្រុមហ៊ុនដែលគេស្គាល់ថាជា Boss Paul និងក្រុមហ៊ុន The Icon Group ជាមួយនឹងគ្នីគ្នាសរុប ១៩រូប។
តាមរយៈប្រភពដដែល មូលហេតុនៃការដោះលែងខ្លួនរបស់តារាស្រីវ័យ៣៥ឆ្នាំ និងតារាប្រុសវ័យ៦៣ឆ្នាំ ដោយហេតុថាអ្នកទាំងពីរមិនបានជាប់ពាក់ព័ន្ធជាជនរួមគំនិតនៅក្នុងការឆបោកនេះទេ ព្រោះភស្តុតាងនៃកិច្ចសន្យា អ្នកទាំងពីឬគ្រាន់តែជា អ្នកផ្សព្វផ្សាយផលិតផលប៉ុណ្ណោះ និងមិនមានភស្តុតាងអ្វីបន្ថែមទាក់ទងនឹងការរួមគំនិតឆបោកឡើយ។
ផ្ទុយគ្នាវិញ សម្រាប់ករណីរបស់ពិធីករល្បីឈ្មោះ លោក Kan Kantathavorn គឺមានភស្ដុតាងបញ្ជាក់ថា លោកមានជាប់ពាក់ព័ន្ធនឹងការទទួលដឹងឮ បង្កើតក្រុមហ៊ុន The Icon Group។
ក្រោយពីទទួលបានសេរីភាពវិញ គ្រួសាររបស់នាង Min Phechaya បានមកទទួលនាងដោយផ្ទាល់។ ក្រោយឡើងឡានបម្រុងធ្វើដំណើរត្រឡប់ទៅផ្ទះវិញ តួសម្ដែងរូបនេះបានបើកកញ្ចក់ឡានប្រាប់ទៅអ្នកសារព័ត៌មានថា៖ “អរគុណដល់ប្រព័ន្ធយុត្តិធម៌ដែលបានមើលថែ Min បានយ៉ាងល្អ អរគុណអ្នកគាំទ្រដែលមិនបោះបង់ និងតែផ្ដល់កម្លាំងចិត្តឱ្យ Min រហូតមក”៕