សេចក្ដីរាយការណ៍នាពេលថ្មីៗនេះបានបញ្ជាក់ថាម្តាយរបស់ Suga សមាជិកក្រុម BTS គឺជាម្ចាស់អគារពាណិជ្ជកម្មដ៏មានសក្តានុពលមួយនៅ Hannam-dong ដែលជាសង្កាត់ដ៏ប្រណីតបំផុតមួយរបស់ទីក្រុងសេអ៊ូល។


យោងតាមរបាយការណ៍អចលនទ្រព្យនានានៅថ្ងៃទី ៤ ខែធ្នូ បានឱ្យដឹងថាអគារពាណិជ្ជកម្មនេះត្រូវបានប៉ាន់ប្រមាណថាមានតម្លៃប្រហែល ១៧.៣ ពាន់លានវ៉ុន ស្មើនឹងប្រមាណ ១២.២ លានដុល្លារអាមេរិក។
កំណត់ត្រាបង្ហាញថាទីតាំងដី និងអគារដើមត្រូវបានក្រុមហ៊ុនសាជីវកម្ម ‘Na Geum Co., Ltd.’ទិញយកក្នុងខែធ្នូ ឆ្នាំ ២០២២ ក្នុងតម្លៃប្រហែល ១០.៨ ពាន់លានវ៉ុន (៧.៦ លានដុល្លារ)។ ក្រុមហ៊ុននេះត្រូវបានតំណាងដោយម្តាយរបស់ Suga គឺអ្នកស្រី Han Na Geum និងហាក់ដូចជាសាជីវកម្មឯកជនបែបគ្រួសារដែលគ្មានបុគ្គលិកផ្សេងទៀតនោះឡើយ។
បន្ទាប់ពីការទិញនោះ រចនាសម្ព័ន្ធដែលមានស្រាប់ត្រូវបានរុះរើ ហើយការសាងសង់អគារជំនួសទំនើបមួយបានចាប់ផ្តើមនៅឆ្នាំ ២០២៣ និងត្រូវបានបញ្ចប់នៅក្នុងខែមិថុនា ឆ្នាំនេះ ។ អគារថ្មីនេះមានជាន់ក្រោមដីពីរជាន់ ជាន់លើដីប្រាំមួយជាន់ និងរានហាលលើដំបូល ដែលគ្របដណ្តប់លើផ្ទៃដីសរុបជាង ១៨៦០ ម៉ែត្រការ៉េ។
បច្ចុប្បន្ន អគារនេះមានអ្នកជួលយ៉ាងមមាញឹករួចទៅហើយ។ ជាពិសេស ជាន់ទីមួយគឺជាទីទាំងភោជនីយដ្ឋាន Chompi ដែលដំណើរការដោយបងប្រុសរបស់ Suga លោក Min Geum Jae។ ភោជនីយដ្ឋាននេះបានក្លាយជាកន្លែងដ៏ពេញនិយមចាប់តាំងពីបើកសម្ពោធកាលពីខែមុន។ ពាក្យចចាមអារ៉ាមថាបងប្រុសរបស់ Suga តែងតែមានវត្តមានបានទាក់ទាញអ្នកគាំទ្រអន្តរជាតិយ៉ាងច្រើននៅចុងសប្តាហ៍ ដោយមនុស្សជាច្រើនត្រូវបានគេឃើញថតរូបនៅខាងក្រៅអគារ។ អ្នកជួលផ្សេងទៀតរួមមានភោជនីយដ្ឋានមួយនៅជាន់ក្រោមដី និងហាងកាត់សក់នៅជាន់ទីបី។
របាយការណ៍បង្ហាញថា Suga ផ្ទាល់ទើបតែបានទៅទស្សនាទីតាំងនេះ ដោយត្រួតពិនិត្យបរិស្ថានជុំវិញដើម្បីធានាថាសំឡេងសំណង់មិនរំខានដល់អ្នកជិតខាង។
អ្នកជំនាញអចលនទ្រព្យជឿថាការទិញនេះគឺជាជំហានមួយដើម្បីទាញយកអត្ថប្រយោជន៍ពីការអភិវឌ្ឍឡើងវិញដ៏ធំដែលកំពុងកើតឡើងនៅក្នុងសង្កាត់ Hannam 3 នៅក្បែរនោះ។ តំបន់នេះកំពុងស្ថិតក្នុងគម្រោងអភិវឌ្ឍន៍ឡើងវិញដ៏ធំបំផុតក្នុងប្រវត្តិសាស្ត្រកូរ៉េ ដែលមានតម្លៃជាង ៥.៦ ពាន់លានដុល្លារ និងត្រូវបានគេរំពឹងថានឹងធ្វើឱ្យសង្កាត់ពាណិជ្ជកម្មនេះមានភាពរស់រវើកឡើងវិញ។
ជាក់ស្ដែង ការវិនិយោគនេះទទួលបានផលចំណេញយ៉ាងច្រើនរួចទៅហើយ។ យោងតាមវេទិកាវាយតម្លៃអចលនទ្រព្យ Zip Poom តម្លៃអចលនទ្រព្យបានកើនឡើងជាង ៦ ពាន់លានវ៉ុន (៤,២ លានដុល្លារ) ក្នុងរយៈពេលត្រឹមតែបីឆ្នាំប៉ុណ្ណោះ ចាប់តាំងពីការទិញយក។
គួរបញ្ជាក់ដែរថា Hannam-dong គឺជាលំនៅដ្ឋានរបស់បុគ្គលល្បីៗនៅកូរ៉េខាងត្បូងជាច្រើន ដូចជាសមាជិក BTS ផ្សេងទៀតគឺ Jin និង Jimin ត្រូវបានគេរាយការណ៍ថារស់នៅក្នុងសង្កាត់នេះ រួមជាមួយតារាល្បីៗដូចជា G-Dragon និង Bae Yong Joon ៕























Account
Security
Favourite Content