ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
កាលពីពេលថ្មីៗ កម្មវិធី Real Research Korea ដែលអនុញ្ញាតឱ្យពលរដ្ឋកូរ៉េបោះឆ្នោតលើប្រធានបទជាច្រើនក្នុងគោលបំណងប្រមូលទិន្នន័យសម្រាប់ការស្រាវជ្រាវ បានធ្វើការស្ទង់មតិប្រជាជនដើម្បីបោះឆ្នោតថាតើតារាកូរ៉េណាខ្លះដែលមានរឿងអាស្រូវធ្ងន់ធ្ងរហើយមិនគួរត្រូវបានអនុញ្ញាតឱ្យវិលត្រឡប់ចូលពិភពសិល្បៈវិញ ដោយអ្នកចូលរួមអាចបោះឆ្នោតឱ្យតារាលើសពីម្នាក់បាន។
បន្ទាប់ពីការបោះឆ្នោតពីអ្នកចូលរួមចំនួន ៣៥០៧ នាក់ លទ្ធផលក៏ត្រូវបានចែករំលែកដល់សាធារណជន។ ក្នុងចំណោមតារាទាំងអស់ បេក្ខភាព២រូបដែលជាប់ចំណាត់ថ្នាក់ខ្ពស់ជាងគេគឺ Seungri និង តារាចម្រៀង Go Young Wook ដែលអ្នកទាំងពីរទទួលបានពិន្ទុបោះឆ្នោតមិនចង់ឱ្យចូលសិល្បៈវិញចំនួន 66.4%។
Seungri ត្រូវបានមហាជនស្អប់ខ្លាំងតាមរយៈរឿងអាស្រូវក្លឹប “Burning Sun” ឬ “Burning Sun Gate” ដែលជារឿងអាស្រូវដ៏ធំបំផុតមួយនៅក្នុងវិស័យសិល្បៈកូរ៉េខាងត្បូង។ អតីតតារាចម្រៀងរូបនេះគឺជានាយកគ្រប់គ្រងនៅក្លឹប Burning Sun ជាកន្លែងដែលឧក្រិដ្ឋកម្មផ្លូវភេទជាច្រើនបានកើតឡើងក្នុងឆ្នាំ ២០១៩ ។ តារាកូរ៉េ និងមន្ត្រីប៉ូលីសជាច្រើននាក់ទៀតត្រូវបានរកឃើញពាក់ព័ន្ធក្នុងករណីនេះ ហើយ Seungri ត្រូវបានកាត់ទោសឱ្យជាប់ពន្ធនាគាររយៈពេល ១ ឆ្នាំកន្លះ។ រហូតដល់ពេលនេះរូបគេត្រូវបានដោះលែងហើយ ប៉ុន្តែក៏នៅតែលេចមុខលើសារព័ត៌មានរឿងយៗដោយសារទង្វើរបស់លោក។
Go Young Wook អាចនឹងមិនល្បីដូច Seungri នោះទេ ប៉ុន្តែលោកបានចូលរួមក្នុងឧក្រិដ្ឋកម្មដ៏ធំ។ លោកត្រូវបានកាត់ទោសពីបទរំលោភផ្លូវភេទលើអនីតិជនបីនាក់នៅចន្លោះឆ្នាំ ២០១០ និង ២០១២ ហើយត្រូវបានកាត់ទោសឱ្យជាប់ពន្ធនាគាររយៈពេល ២ ឆ្នាំកន្លះក្នុងឆ្នាំ ២០១៣។ លោកក៏ត្រូវពាក់ឧបករណ៍ត្រួតពិនិត្យនៅកជើងរយៈពេល ៣ ឆ្នាំក្រោយមក និងរក្សាឈ្មោះជាជនល្មើសផ្លូវភេទជាសាធារណៈសម្រាប់រយៈពេលប្រាំឆ្នាំ។ លោកត្រូវបានដោះលែងនៅឆ្នាំ ២០១៥ ហើយបានព្យាយាមត្រលប់ទៅប្រព័ន្ធផ្សព្វផ្សាយសង្គមវិញនៅឆ្នាំ ២០២០ ប៉ុន្តែត្រូវបាន Instagram បិទគណនីវិញយ៉ាងឆាប់រហ័សដោយសារតែគោលនយោបាយហាមឃាត់ជនល្មើសផ្លូវភេទបង្ហាញមុខនៅលើវេទិកា។ លោកបានព្យាយាមបើកឆានែល YouTube មួយកាលពីខែមុន ប៉ុន្តែក៏ត្រូវបានបិទដែរបន្ទាប់ពីមានប្រតិកម្មខ្លាំងពីអ្នកលេងអ៊ីនធឺណិត។
តារាបន្ទាប់មកទៀតនៅក្នុងបញ្ជីនេះគឺ Steve Yoo ឬ Yoo Seung Jun ជាអ្នកចម្រៀងដ៏មានប្រជាប្រិយក្នុងទសវត្សរ៍ឆ្នាំ ១៩៩០ និងដើមទសវត្សរ៍ឆ្នាំ ២០០០ ដែលទទួលបានពិន្ទុ 55.8% លើការស្ទង់មតិ។ ហេតុផលដែលលោកត្រូវបានប្រជាជនកូរ៉េបដិសេធគឺខុសពីតារាពីររូបខាងលើ ប៉ុន្តែក៏នៅតែធ្ងន់ធ្ងរ។ បន្ទាប់ពីធ្វើការសន្យាជាសាធារណៈថានឹងចូលបំពេញកាតព្វកិច្ចយោធាជាច្រើនដង ចុងក្រោយលោកបែរជាប្ដូរសញ្ជាតិអាមេរិក ដើម្បីចៀសវាងចូលបំពេញកាតព្វកិច្ចនេះ។ ដោយសារតែការគេចវេះនេះ លោកត្រូវបានគេនិរទេសចេញពីកូរ៉េខាងត្បូង ហើយត្រូវបានហាមឃាត់ជាអចិន្ត្រៃយ៍មិនឱ្យចូលប្រទេសឡើយ។ បច្ចុប្បន្ន លោកនៅតែបន្តតស៊ូជាមួយរដ្ឋាភិបាលកូរ៉េរហូត ដើម្បីព្យាយាមវិលត្រឡប់ទៅប្រទេសកំណើតវិញ។
អ្នកទី ៤ នៅក្នុងការស្ទង់មតិនេះគឺតារាចម្រៀង G.NA ជាតារាស្រីតែមួយគត់នៅជាប់ក្នុងចំណាត់ថ្នាក់កំពូលទាំងប្រាំជាមួយពិន្ទុ 40.8% ។ ក្នុងឆ្នាំ ២០១៦ នាងត្រូវបានគេបង្ហាញថាបានចូលរួមក្នុងរឿងអាស្រូវជួញដូរផ្លូវភេទ ដោយនាងត្រូវបានចោទប្រកាន់ថាបានទទូលប្រាក់ប្រហែល ២៦ ៤០០ ដុល្លារ ដើម្បីរួមភេទជាមួយអ្នកជំនួញមិនស្គាល់អត្តសញ្ញាណនៅសហរដ្ឋអាមេរិក។ នាងត្រូវបានតុលាការសម្រេចឱ្យបង់ប្រាក់ពិន័យ ១ លានវ៉ុន ស្មើនឹងជាង ១៥០០ ដុល្លារអាមេរិកសម្រាប់ករណីនេះ។
អ្នកចុងក្រោយក្នុងបញ្ជីគឺតារាចម្រៀង MC Mong ដែលទទួលបានពិន្ទុ ៣៧.៦%។ ដូចតារាចម្រៀង Steve Yoo ដែរ លោកត្រូវបានចោទប្រកាន់ពីបទព្យាយាមជៀសវាងការចូលបម្រើយោធា តាមរយៈការដកធ្មេញដែលមានសុខភាពល្អមួយចំនួន បន្ទាប់ពីពន្យារពេលការចូលបម្រើទ័ពរបស់គាត់អស់រយៈពេលប្រាំពីរឆ្នាំ។ ដោយសារតែការព្យាយាមគេចវេះកាតព្វកិច្ចនេះ សាធារណជននៅតែបន្តធ្វើពហិការលោក បើទោះបីជាលោកទទួលបានជោគជ័យនៅលើតារាងចម្រៀងក៏ដោយ ៕
Account
Security
Favourite Content