បន្ទាប់ពីបានចាប់ផ្តើមបង្ហាញមុខក្នុងភាពយន្តខ្នាតធំកាលពីឆ្នាំមុន តារាសម្ដែងចិន Wang Yibo ក៏បានទទួលជោគជ័យលើសលប់ ទាំងសម្រាប់ការវាយតម្លៃវិជ្ជមានចំពោះការសម្ដែង ការចែករំលែកលើអនឡាញ ក៏ដូចជាប្រាក់ចំណូលរបស់ភាពយន្តដែលឈានដល់រាប់រយលានដុល្លារ។ ជាក់ស្ដែងភាពយន្តរបស់គេចំនួន ៣ រឿងរបស់គេកាលពីឆ្នាំមុនបានជាប់ក្នុងចំណោមភាពយន្តរកចំណូលបានខ្ពស់ទាំង ១០ ក្នុងឆ្នាំ ២០២៣ នៅក្នុងប្រទេសចិន។
ជឿជាក់ថាកន្លងមកប្រិយមិត្តជាច្រើនប្រាកដបានស្គាល់ Wang Yibo តាមរយៈរឿងភាគល្បីៗដូចជា “The Untamed”, “Legend of Fei”, “Wind from Luoyang” និងរឿងជាច្រើនទៀត។ ប៉ុន្តែក្នុងឆ្នាំកន្លងទៅ តារាវ័យ ២៦ឆ្នាំរូបនេះបានសម្តែងក្នុងភាពយន្តខ្នាតធំដែលអាចរកចំណូលខ្ពស់បំផុតចំនួន៣ គឺរឿង “Hidden Blade” អាចរកបាន ១៣៩ លានដុល្លារ , ភាពយន្ត “Born To Fly” អាចរកបាន ១១៧ លានដុល្លារ និងភាពយន្ត “One and Only” អាចរកបាន ១២៦ លានដុល្លារ ខណៈរឿងមួយៗសុទ្ធតែលើកតម្កើងកេរ្តិ៍ឈ្មោះរបស់គេកាន់តែខ្លាំងក្នុងវិស័យភាពយន្ត។
ក្នុងនោះ ខ្សែភាពយន្ត “Hidden Blade” បានធ្វើឱ្យទស្សនិកជនមើលឃើញការសម្តែងរបស់ Wang Yibo ក្នុងឋានៈជាជនបង្កប់មុខពីរ ដែលទាមទារជំនាញសម្តែងដ៏ប៉ិនប្រសប់ ហើយការដែលត្រូវសម្តែងតទល់ជាមួយតារាល្បីៗលំដាប់អាស៊ីដូចជា Tony Leung ក៏មិនមានជារឿងងាយស្រួលនោះឡើយ។ ប៉ុន្តែ Wang Yibo ក៏បានពិសោធន៍ឱ្យអ្នកគាំទ្រ និងអ្នកស្រឡាញ់ភាពយន្តបានឃើញច្បាស់ថារូបគេអាចធ្វើវាបានល្អ និងគួរឱ្យពេញចិត្ត។
ទន្ទឹមនឹងនេះ ភាពយន្តនិយាយពីកងទ័ពអាកាស “Born To Fly” គឺជារូបភាពថ្មីមួយទៀតរបស់គេដែលបានទទួលការចាប់អារម្មណ៍យ៉ាងខ្លាំង ខណៈនៅក្នុង “One and Only” ក៏បានឆ្លុះបញ្ចាំងពីភាពលេចធ្លោរបស់គេក្នុងនាមជាក្មេងប្រុសដេញតាមចាប់ក្ដីស្រមៃដើម្បីក្លាយជាអ្នករាំដ៏អស្ចារ្យ។ ការសម្ដែងរឿងនេះ ក៏បានរំឭកគេពីជីវិតនៅកុមារភាពដែរ ព្រោះកាលពីមុន រូបគេគឺជាក្មេងប្រុសម្នាក់ដែលចូលចិត្តរាំ។
Wang Yibo ធ្លាប់បានផ្តល់បទសម្ភាសថា ការដែលអាចធ្វើការជាមួយអ្វីដែលខ្លួនចូលចិត្តទាំងពីរយ៉ាងនេះគឺជាពេលវេលាដ៏ល្អ និងមានក្ដីសុខបំផុត។ កាលនៅរៀនអនុវិទ្យាល័យ រូបគេធ្លាប់ចូលរៀនថ្នាក់រៀនរាំពេញមួយវិស្សមកាលរដូវក្ដៅដូចតួអង្គក្នុងរឿងដែរ គឺរៀនរាំតាំងពីព្រឹកដល់ល្ងាច ប៉ុន្តែក៏គ្មានអារម្មណ៍ហត់នឿយ។ គ្រាន់តែបានធ្វើអ្វីដែលខ្លួនពេញចិត្ត និងសប្បាយចិត្តគឺគ្រប់គ្រាន់ហើយសម្រាប់គេ។ នេះហើយជាមូលហេតុដែល Wang Yibo មានភាពសប្បាយរីករាយខ្លាំងក្នុងការថតរឿងនេះ។
អាចនិយាយបានថា ភាពយន្តទាំង ៣ នេះ គឺជាស្នាដៃដ៏សំខាន់ដែលអាចបញ្ជាក់ថា Wang Yibo គឺជាតារាជំនាន់ថ្មីដែលមានជំនាញសម្ដែងល្អ និងគួរឱ្យតាមដានតទៅទៀតថាតើឆ្នាំ២០២៤នេះ រូបគេនឹងមានគម្រោងភាពយន្តពិសេសៗអ្វីខ្លះសម្រាប់អ្នកគាំទ្របានទស្សនានាពេលអនាគត ៕