លោក Dominic Williams ឯកអគ្គរាជទូតអង់គ្លេស ទើបចូលកាន់តំណែង មកបំពេញបេសកកម្មនៅប្រទេសកម្ពុជា ពីឆ្នាំ ២០២២ រហូតមកដល់បច្ចុប្បន្ននេះ មិនទាន់ដល់ ១ឆ្នាំផង ប៉ុន្តែលោកជាទូតបរទេស ដែលសកម្មបំផុតក្នុងការផ្សព្វផ្សាយ វប្បធម៌ អុរិយធម៌ ម្ហូបអាហារ តំបន់ទេសចរណ៍ របស់ប្រទេសកម្ពុជា ទៅកាន់ពិភពលោក តាមរយៈទំព័រហ្វេសប៊ុកផេករបស់លោក។
តាមរយៈការបង្ហោះផ្សេងៗ លោក Dominic Williams មិនដែលចោលឡើយ នូវការសរសេរសំណេរជាអក្សរខ្មែរ ព្រមជាមួយរូបភាព និងវីដេអូផ្សេងៗពីប្រទេសកម្ពុជា។ ជាក់ស្ដែងលោកទើបបង្ហោះសារអបអរសាទរ ចំពោះរមណីយដ្ឋានបុរាណវិទ្យាកោះកេរ នៃអតីតរាជធានីលិង្គបុរៈឬឆោកគគ៌្យរ ដាក់បញ្ចូលទៅក្នុងបញ្ជីសម្បត្តិបេតិកភណ្ឌពិភពលោករបស់អង្គការយូណេស្កូ កាលពីថ្ងៃទី១៧ ខែកញ្ញា ឆ្នាំ ២០២៣នេះ។
ព្រមជាមួយគ្នានេះដែរ លោកបានទៅដល់ខេត្តកំពង់ស្ពឺ នឹងបានចេញជាវីដេអូមួយ និយាយជាភាសាខ្មែរ និយាយអំពីសារប្រយោជន៍ នៃដើមត្នោត ដែលមានដុះច្រើនជាងគេ នៅខេត្តមួយនេះ។ លោកបានរៀបរាប់ថា ត្នោតមានអត្ថប្រយោជន៍ជាច្រើន ដូចជាស្លឹកអាចយកធ្វើដំបូលប្រក់ផ្ទះ ដើមអាចធ្វើផ្ទះ ធ្វើទូក ហើយទឹកត្នោតអាចចម្រាញ់ធ្វើជាស្ករត្នោតយ៉ាងឈ្ងុយឆ្ងាញ់។
ទាំងនេះគ្រាន់តែជាការដកស្រង់សកម្មភាពមួយចំនួនតូចរបស់ឯកអគ្គរាជទូតអង់គ្លេស ប្រចាំប្រទេសកម្ពុជាប៉ុណ្ណោះ កន្លងទៅមិនថាលោកធ្វើដំណើរទៅដល់ខេត្តណាមួយនៃប្រទេសកម្ពុជានោះទេ លោកមិនដែលភ្លេចថតរូប និងសរសេរសារនានាផ្សព្វផ្សាយពីខេត្តទាំងនោះ ទៅកាន់ពិភពលោក៕