ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ការបែកបាក់គ្នារវាងតារាចម្រៀងចាស់វស្សា យ៉ែម សំអូន និងភរិយាអ្នកនាង យ៉ាន លីនដា កាលពីឆ្នាំ ២០១៥ ធ្វើឲ្យអ្នកគាំទ្រ សោកស្ដាយ និងតែងតែបន់ឲ្យអ្នកទាំង ២ ត្រូវគ្នាវិញ។ ទីបំផុតគូស្នេហ៍ទាំង ២ បានត្រឡប់មកត្រូវរ៉ូវគ្នាវិញម្ដងទៀត ក្រោយលែងលះគ្នាជិត១០ ឆ្នាំ ដោយម្នាក់រស់នៅខ្មែរ និងម្នាក់ទៀតត្រឡប់ទៅរស់នៅអូស្ត្រាលី។
ក្រោយបែកគ្នាទាំង យ៉ែម សំអូន និង យ៉ាន លីនដា សុទ្ធតែគ្មានអ្នកថ្មីណាមកជំនួសកន្លែងគ្នាឡើយ ដោយអ្នកទាំង ២ នៅលីវរៀងៗខ្លួន និងបន្តចិញ្ចឹមកូនស្រីតែមួយរួមគ្នា គឺ យ៉ែម វីរ៉ូនី។ បើទោះជាអ្នកទាំង ២ បែកគ្នា ហើយខាងស្រីបានទៅរស់នៅអូស្ត្រាលីវិញក៏ដោយ តែអ្នកនាង យ៉ាន លីនដា បានឡើងចុះមកស្រុកខ្មែរជាញឹកញាប់ ដើម្បីជួបជុំមិត្តចាស់ៗ។
កាលពីអំឡុងខែ ៥ កន្លងទៅនេះ អ្នកនាង លីនដា ក៏បានត្រឡប់មកខ្មែរ និងបន្តជួបជុំស្វាមីម្ដងទៀត ក្នុងឱកាសខួបកំណើតកូនស្រីបណ្ដូលចិត្ត។ នាឱកាសនោះ មិត្តរួមអាជីពដែលស្និទ្ធស្នាលនឹងគ្រួសារ យ៉ែម សំអូន ពិតជារីករាយ ដោយឃើញអ្នកទាំង ២ អាចវិលមកស្រលាញ់គ្នា និងរួមរស់ជាប្ដីប្រពន្ធគ្នាម្ដងទៀត។
រហូតមកដល់ថ្ងៃទី១៦ ខែសីហា កន្លងទៅ តារាចម្រៀង និងជាម្ចាស់ Dara Entertainment បានសុំតារាចម្រៀងស្រីសម្បុរសណ្ដែកបាយ យ៉ាន លីនដា រៀបការម្ដងទៀត ក្រោបរិយាកាសរ៉ូមែនទិក។ ដោយកម្មវិធី គឺត្រូវបានខាងប្រុសរៀបចំ surprise និងអញ្ជើញមិត្តស្និទ្ធស្នាលចូលរួមធ្វើជាសាក្សីស្នេហ៍ ព្រមជាមួយកូនស្រី។ ថ្ងៃសុំរៀបការម្ដងទៀតនោះ គឺ លីនដា និង សំអូន ត្រូវថតសម្អាងការឲ្យមិត្តភ័ក្ដិអ្នកទាំង ២ ស្រាប់ដែរ ហើយនិងមានបន្ថែមកម្មវិធីបែបខ្មែរមួយចំនួនទៀត។
សម្រាប់អ្នកនាង យ៉ាន លីដាន ពិតជារំភើបខ្លាំង ពេលបានឃើញស្វាមីគឺលោក យ៉ែម សំអូន នៅតែ sweet និងយកចិត្តទុកដាក់លើខ្លួនដដែល ធ្វើឲ្យទឹកភ្នែកស្រក់ ព្រោះក្ដីអំណរ។ អ្វីកាន់តែរំភើបចិត្តចំពោះអ្នកនាង យ៉ាន លីនដា ក្រោយសុំរៀបការហើយនោះ ល្ងាចឡើងមានកម្មវិធីជួបជុំ និងញ៉ាំអាហាររួមមិត្តភ័ក្តិ មើលទៅគឺជាមង្គលការម្ដងទៀត។ អ្នកនាង យ៉ាន លីនដា នៅតែស្រស់ស្អាតគ្មានប្រែឡើយ បើទោះជាមានកូនស្រីធំប៉ុនខ្លួនក៏ដោយ។ ក្រោយវិលមករួមរស់ជាមួយតារាប្រុសរូបសង្ហា យ៉ែម សំអូន តារាស្រីរូបនេះ ក៏បន្តសកម្មភាពសិល្បៈពេញលេញលើងវិញផងដែរ ទាំងការសម្ដែងតាមស្ថានីយទូរទស្សន៍ និងច្រៀងតាមកម្មវិធីផ្សេងៗ៕
Account
Security
Favourite Content