ក្រសួងវប្បធម៌និងវិចិត្រសិល្បៈ បានប្រកាសរៀបចំ មហោស្រពល្ខោនយីកេទូទាំងប្រទេស ឆ្នាំ២០២៥ ក្រោមប្រធានបទ “គុណធម៌ និងកតញ្ញូ” ដែលនឹងប្រារព្ធឡើងចំនួន ០៤ ថ្ងៃ ចាប់ពីថ្ងៃទី២០-២៣ ខែវិច្ឆិកា ឆ្នាំ២០២៥ នៅសាលសន្និសីទចតុម្មុខ រាជធានីភ្នំពេញ ដោយនឹងមានការផ្សាយផ្ទាល់តាមហ្វេសប៊ុកផេកផ្លូវការរបស់ក្រសួងវប្បធម៌និងវិចិត្រសិល្បៈ។

ការរៀបចំព្រឹត្តិការណ៍វប្បធម៌នេះ គឺក្នុងគោលបំណងដើម្បីចូលរួមថែរក្សា លើកស្ទួយ អភិរក្សវប្បធម៌ប្រពៃណីជាតិ អត្តសញ្ញាណជាតិ និងលើកកម្ពស់កិត្យានុភាពជាតិ ជាពិសេសលើកទឹកចិត្តដល់ សិល្បករ ល្ខោនយីកេឱ្យមានលទ្ធភាពចូលរួមក្នុងសកម្មភាពវប្បធម៌ព្រមទាំងបានបង្ហាញនូវសមត្ថភាព និង ទេពកោសល្យរបស់ខ្លួនដល់មហាជនឱ្យបានស្គាល់ និងបានដឹងនូវតម្លៃសិល្បៈអរូបីមួយនេះ។
ដើម្បីចូលរួមអបអរសាទរ មហោស្រពល្ខោនយីកេទូទាំងប្រទេស ឆ្នាំ២០២៥នេះ ក្រសួងនឹងរៀបចំឱ្យសិល្បករ អង្គការ សមាគម សិល្បៈមហាជនទូទាំងប្រទេសដែលមានចំណេះជំនាញល្ខោនយីកេ បានចូលរួមប្រកួតប្រជែងក្នុងមហោស្រពដើម្បីស្វែងរកម្ចាស់ជ័យលាភីពានរង្វាន់ និងប្រាក់រង្វាន់លើកទឹកចិត្តជាច្រើន។
ព្រឹត្តិការណ៍វប្បធម៌ដ៏មានតម្លៃនេះដែរ បានទទួលការសហការរៀបចំ និងផ្សព្វផ្សាយពីក្រុមហ៊ុន APSARA MEDIA SERVICES (AMS) ដោយមានគោលបំណងពង្រីកការផ្សព្វផ្សាយឲ្យទូលំទូលាយ និងឈានដល់គ្រប់ស្រទាប់មហាជន។ កន្លងមក ក្រុមហ៊ុន AMS ក៏បានសហការនិងចូលរួមផ្សព្វផ្សាយព្រឹត្តិការណ៍មហោស្រពចាប៉ីដងវែងដែរកាលពីមុន ដែលទទួលបានការគាំទ្រយ៉ាងកក់ក្តៅពីថ្នាក់ដឹកនាំក្រសួង និងទស្សនិកជន។ ការជោគជ័យនោះ បានក្លាយជាចំណុចសំខាន់ក្នុងការជំរុញឲ្យបន្តសហការជាមួយព្រឹត្តិការណ៍វប្បធម៌ផ្សេងៗក្នុងអនាគត។
គួរបញ្ជាក់ថា យីកេ គឺជាល្ខោនមួយដែលមានប្រជាប្រិយភាពយ៉ាងខ្លាំងនៅក្នុងប្រទេសកម្ពុជាយើង។ ល្ខោននេះ គឺជាប្រភេទល្ខោនច្រៀងផង រាំផង និងប្រើប្រាស់ឧបករណ៍ស្គរជាចម្បងក្នុងមធ្យោបាយសម្តែងដែលមានចន្លោះពី២ ដល់ ១៣ស្គរ ទៅតាមទំហំតូច ឬធំរបស់ក្រុមល្ខោននីមួយៗ។
សម្រាប់សិល្បករ សិល្បការិនីល្ខោនយីកេ ដែលមានបំណងចូលរួមប្រកួតប្រជែងអាចទាញយកពាក្យចូលរួមតាមតំណភ្ជាប់ខាងក្រោម៖
>> https://drive.google.com/file/d/1Ao5HUraOrTNyRBL2nzKmJyOvR3RbC97l/view?usp=sharing
































Account
Security
Favourite Content