ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ការទទួលបានសេចក្តីស្រឡាញ់ពីនរណាម្នាក់ ជួនកាលមិនមែនវាស់វែងដោយពាក្យសម្តីដ៏ផ្អែមល្ហែមនោះទេ ប៉ុន្តែវាអាចវាស់វែងបានតាមរយៈសកម្មភាពតូចតាចដែលកើតឡើងជារៀងរាល់ថ្ងៃ។ មនុស្សមួយចំនួនប្រហែលជាមិនពូកែនិយាយពាក្យផ្អែមល្ហែមចេញមកខាងក្រៅ ប៉ុន្តែពួកគេជ្រើសរើសបង្ហាញក្ដីស្រឡាញ់តាមរយៈសកម្មភាពសាមញ្ញៗតែបង្កប់នូវការយកចិត្តទុកដាក់។
សកម្មភាពទាំង ៥ ដែលអាចហៅថាជា “ភាសាស្នេហា” ខាងក្រោមនេះ គឺជាសកម្មភាពដែលបង្ហាញថា បុគ្គលម្នាក់នោះស្រឡាញ់អ្នកពិត មិនមែនត្រឹមតែជាពាក្យសម្ដី៖
១. ចងចាំរឿងរ៉ាវតូចតាច ដែលអ្នកដទៃមិនចាប់អារម្មណ៍
ជួនកាល គ្រាន់តែគេចាំថា “អ្នកមិនចូលចិត្តញ៉ាំអ្វី?” ឬ “ចូលគេងម៉ោងប៉ុន្មាន?” វាក៏ជារឿងរ៉ូមែនទិកមួយបាត់ទៅហើយ។ កាដែលគេចាំថា អ្នកចូលចិត្តអ្វី មិនចូលចិត្តអ្វី មានទម្លាប់បែបណា វាជាការបង្ហាញក្ដីស្រឡាញ់ និងការយកចិត្តទុកដាក់មួយ។
តួយ៉ាង នៅពេលដែលគេចងចាំថា អ្នកចូលចិត្តញ៉ាំកាហ្វេបែបណា មានកម្រិតស្ករប៉ុណ្ណា ហើយទិញ ឬធ្វើជូនអ្នកដោយចេញពីចិត្ត និងត្រឹមត្រូវដូចអ្នកធ្វើខ្លួនឯង នោះមានន័យថា បុគ្គលនោះចាំសង្កេតពីអ្នក ពេញដោយក្ដីស្រឡាញ់។ រឿងរ៉ាវតូចៗដែលពេលខ្លះអ្នកខ្លួនឯងក៏គិតថាមិនមានតម្លៃផងនោះ តែនៅពេលដែលមានមនុស្សម្នាក់ចងចាំ វាអាចធ្វើឱ្យអ្នកមានអារម្មណ៍ល្អ អធិប្បាយមិនត្រូវ។
២. រអ៊ូ ព្រោះបារម្ភ
នៅពេលដែលអ្នកញ៉ាំអាហារមិនល្អដល់សុខភាព ចូលគេងយឺត ឬធ្វើការហួសកម្លាំង ហើយមានមនុស្សម្នាក់ចាំប្រាប់អ្នកថា “ញ៉ាំរបស់អ៊ីចឹងល្មមៗបានហើយ ញ៉ាំបន្លែខ្លះទៅ” ឬ “យប់ជ្រៅហើយឈប់ធ្វើការ ហើយឆាប់ចូលសម្រាក” ពាក្យទាំងនេះអាចស្ដាប់ទៅជាការស្ដីបន្ទោស ប៉ុន្តែអត្ថន័យពិតដែលលាក់ពីក្រោយ គឺជាការបង្ហាញក្ដីព្រួយបារម្ភរបស់ម្ចាស់សម្ដីនោះ។
សកម្មភាពដែលបង្ហាញពីការព្រួយបារម្ភពិតប្រាកដ គឺជាសកម្មភាពសាមញ្ញៗធម្មតា ថែមពេលខ្លះស្ដាប់ទៅគួរឱ្យធុញ តែនេះជាសកម្មភាពដែលចេញពីចិត្ត ធ្វើឡើងព្រោះតែចង់ប្រាប់ថា “ស្រឡាញ់” ដោយមិនមានពាក្យថា “ស្រឡាញ់” នៅក្នុងនោះ។
៣. មិនមែនជាតួនាទី តែមានទឹកចិត្ត
ការជួយសម្រាលបន្ទុកពីការងារតូចតាចទាំងក្នុង និងក្រៅផ្ទះ គឺជាភាសាមួយដែលបញ្ជាក់ពីអារម្មណ៍របស់មនុស្សម្នាក់ ទៅកាន់មនុស្សម្នាក់ទៀត។ ដ្បិតមិនមានពាក្យនិយាយចេញមកខាងក្រៅ តែសកម្មភាពនេះបង្ហាញថា៖ “ខ្ញុំដឹងថាអ្នកហត់ ដូច្នេះខ្ញុំនឹងជួយសម្រាលបន្ទុករបស់អ្នក”។ ការជួយគ្នានេះ អាចចាប់ផ្ដើមពីរឿងរ៉ាវតូចតាចទូទៅ មិនថាការជួយលាងចាន សម្អាតផ្ទះ ឬសូម្បីតែការយកឡាន ម៉ូតូទៅលាងឱ្យនោះទេ។
យោងតាមការសិក្សារបស់ Harvard Study of Adult Development ដែលតាមដានជីវិតប្តីប្រពន្ធជាង ៨០ ឆ្នាំ បានរកឃើញថា ទំនាក់ទំនងដែលនៅស្រឡាញ់គ្នាយូរអង្វែង តែងតែកើតចេញពីការមើលថែគ្នាទៅវិញទៅមកក្នុងរឿងតូចតាចប្រចាំថ្ងៃដូច្នេះឯង។
៤. សួរសំណួរសាមញ្ញៗ ប៉ុន្តែធ្វើឱ្យចិត្តកក់ក្តៅ
“ថ្ងៃនេះហត់ទេ?” “ញ៉ាំបាយហើយឬនៅ?” “បានសម្រាកខ្លះនៅ?” សំណួរទាំងនេះអាចមើលទៅសាមញ្ញៗ តែសំណួរនេះបង្ហាញការយកចិត្តទុកដាក់ដែលអាចធ្វើឱ្យអ្នកដែលទទួលបានសំណួរទាំងនេះមានអារម្មណ៍ថា កក់ក្ដៅក្នុងចិត្ត។
សំណួរទាំងនេះ គឺជាសញ្ញាដែលថា អ្នកមានសារៈសំខាន់គ្រប់គ្រាន់ដែលធ្វើឱ្យបុគ្គលនោះចង់ដឹងពីជីវិតរបស់អ្នក មិនមែនត្រឹមតែក្នុងថ្ងៃដែលល្អទេ ប៉ុន្តែរួមទាំងថ្ងៃដែលអ្នកហត់នឿយផងដែរ។
៥. អ្នកតែងតែមានវត្តមានក្នុងគម្រោងរបស់បុគ្គលនោះ
មិនថាជារឿងតូចតាច គម្រោងប្រចាំថ្ងៃ ឬគោលដៅជីវិត នៅពេលដែលអ្នកតែងតែមានវត្តមាន ជាមនុស្សដែលបុគ្គលនោះនឹកដល់រាល់ពេលដែលគេចង់ធ្វើអ្វីមួយ នោះមានន័យថា អ្នកមិនមែនជាមនុស្សដែលគ្រាន់តែនៅក្បែររាងកាយប៉ុណ្ណោះទេ តែអ្នកក៏ជាមនុស្សដែលនៅក្នុងការគិតរបស់បុគ្គលនោះដែរ។
ការមានវត្តមាននៅក្នុងគម្រោងរបស់នរណាម្នាក់ មានន័យថាបុគ្គលនោះ ត្រៀមខ្លួនរួមរស់ជាមួយនៅក្នុងថ្ងៃអនាគត និងតែងតែគិតគូរទុកជាមុន ពីជីវិតដែលមានអ្នកនៅក្នុងនោះ។
៦. ក្នុងថ្ងៃដែលអ្នកមិនសប្បាយចិត្ត បុគ្គលនោះតែងតែនៅទីនេះសម្រាប់អ្នកជានិច្ច
ការដែលមាននរណាម្នាក់ចាំនៅក្បែរ មិនបោះបង់អ្នកនៅក្នុងថ្ងៃដែលអ្នកមានបញ្ហា វាគឺជារឿងមួយដ៏សំខាន់នៅក្នុងជីវិតគូ។ ជួនកាល នៅក្នុងថ្ងៃដែលពិបាកបំផុត អ្នកអាចមិនត្រូវការពាក្យណែនាំ ឬពាក្យលួងលោមអ្វីទេ តែអ្វីដែលអ្នកត្រូវការនោះ គឺជាមនុស្សម្នាក់ដែលអង្គុយក្បែរអ្នកដោយស្ងប់ស្ងាត់ ទទួលដឹងឮពីបញ្ហារបស់អ្នក។
ទំនាក់ទំនងមួយដែលល្អ អាចមិនមែនជាទំនាក់ទំនងមួយដែលពេញព្រៀបទៅដោយពាក្យពេចន៍ផ្អែមល្ហែមទេ ប៉ុន្តែទំនាក់ទំនងរឹងមាំមួយត្រូវការ សកម្មភាពសាមញ្ញៗដែលកើតឡើងដដែលៗជារៀងរាល់ថ្ងៃ។ ជួនកាល សកម្មភាពទាំងនោះហើយ ដែលកំពុងប្រាប់អ្នកថា បុគ្គលដែលនៅក្បែរអ្នកនោះ នៅតែស្រឡាញ់ នៅតែយកចិត្តទុកដាក់ ដោយមិនចាំបាច់និយាយពាក្យថា “ស្រឡាញ់” សូម្បីតែមួយម៉ាត់៕
Account
Security
Favourite Content