ក្នុងពេលបច្ចុប្បន្នការរាប់អានមិត្តភក្ដិមិនអាចស្មានដឹងឡើយថាពួកគេស្រឡាញ់ចូលចិត្តយើងដោយស្មោះ ឬគ្រាន់តែជាការសម្ដែងនៅពីមុខ។ ពេលខ្លះមនុស្សមួយចំនួននៅពីមុខធ្វើហាក់ដូចជាស្រឡាញ់រាប់អានយើងខ្លាំងណាស់ ប៉ុន្តែនៅពីក្រោយខ្នងបែរជាពោរពេញទៅដោយល្បិចកលទៅវិញ។ ជាក់ស្ដែងប្រសិនបើមានមិត្តចូលចិត្តនិយាយពាក្យសម្ដីទាំង ៣ នេះគួរតែប្រញាប់រក្សាគម្លាតកាន់តែលឿនកាន់តែល្អ៖
១. និយាយកុហក
ការកាត់ផ្ដាច់មិត្តចូលចិត្តប្រើពាក្យកុហកបោកប្រាស់ គឺជាជម្រើសដ៏ត្រឹមត្រូវបំផុតមួយក្នុងជីវិត ដោយសារតែពួកគេប្រៀបដូចជាកំពុងលាក់កាំបិតមួយដើមពីខ្នងក្រោយ ដើម្បីចាក់យើងគ្រប់ពេលវេលា។ មនុស្សបែបនេះក៏ចូលចិត្តបំផ្លាញទឹកចិត្តអ្នកដទៃ និងបំភ្លើសរឿងមិនពិត ដើម្បីសម្រេចគោលដៅខ្លួនឯងទៀតផង។ ដូច្នេះការកាត់ផ្ដាច់មនុស្សប្រភេទនេះចេញពីជីវិតគឺលើសពីចំណេញខ្លាំងសម្រាប់សុខភាពផ្លូវចិត្តតែម្ដង។
២. និយាយត្អូញត្អែរមិនឈប់
ជាធម្មតាមនុស្សគ្រប់គ្នាគ្មានអ្នកណាម្នាក់ដែលមិនចេះត្អូញត្អែរឡើយ ប៉ុន្តែបើការត្អូញត្អែរនោះញឹកញាប់ពេលវានឹងក្លាយជារឿងអាក្រក់ទៅវិញ។ ជាងនេះទៅទៀតមនុស្សប្រភេទច្រើនតែមានលេសច្រើនមិនចេះចប់ ហើយក៏ចូលចិត្តទម្លាក់កំហុសឱ្យអ្នកដទៃ ហើយថែមទាំងនាំឱ្យមានរឿងស្មុគស្មាញដល់គេឯងផងដែរ។ ដូច្នេះហើយពេលដែលអាចរក្សាគម្លាតពីមនុស្សប្រភេទនេះបាន ប្រៀបបានដូចជាការដកខ្លួនឆ្ងាយពីបញ្ហាដូចគ្នា។
៣. និយាយពាក្យមិនសមរម្យ
អាចនិយាយបានថាការរាប់អានគ្នាស្និតស្នាលភាគច្រើនច្បាស់ណាស់ គឺយើងមិនអាចប្រកាន់ច្រើនឡើយ។ ប៉ុន្តែប្រសិនបើជាញឹកញាប់ មនុស្សម្នាក់នោះចូលចិត្តលេខសើចដោយប្រើពាក្យសម្ដីមិនសមរម្យនោះគឺស្មើនឹងការមិនឱ្យតម្លៃ ឬចង់បង្អាប់កិត្តិយសយើងនៅទីសាធារណៈតែម្ដង។ ការនៅជិតមនុស្សបែបនេះយូរទៅច្បាស់ណាស់អ្នកដទៃនឹងមើលមកក៏អាចស្មានដឹងថាយើងជាមនុស្សប្រភេទតែមួយជាមួយពួកគេជាមិនខាន។ ដូច្នេះការព្រងើយកន្ដើយជាមួយមនុស្សបែបនេះមិនត្រឹមតែចំណេញពេលវេលាទេ ថែមទាំងអាចរក្សាតម្លៃយើងបានទៀតផង៕