ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
កាលពីម្សិលមិញនេះ អាជ្ញាធរជាតិអប្សរាបានប្រារព្ធពិធីភ្ជាប់ព្រះសិរ និងបើកព្រះនេត្រចម្លាក់ទេព ២ នៅខ្លោងទ្វារជ័យ នៃក្រុងអង្គរធំ ក្រោមយុទ្ធនាការ «ព្រលឹងត្រឡប់មកទីតាំងដើមវិញ» នៅខ្លោងទ្វារជ័យ នៃក្រុងអង្គរធំ។
ពិធីភ្ជាប់ព្រះសិរ និងបើកព្រះនេត្រចម្លាក់ទេព មានជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលនៃអាជ្ញាធរជាតិអប្សរា ដោយមានការនិមន្តចូលរួមពីសម្ដេចព្រះព្រហ្មរតនមុនី ពិន សែម, លោក Flavio BONETTI តំណាងអង្គការ UNESCO ប្រចាំកម្ពុជា, លោកស្រី Katherine Diop ប្រធានផ្នែកកិច្ចការសាធារណៈនៃស្ថានទូតអាមេរិកប្រចាំកម្ពុជា ថ្នាក់ដឹកនាំក្រសួងវប្បធម៌ និងវិចិត្រសិល្បៈ អគ្គនាយក អគ្គនាយករង តំណាងរដ្ឋបាលខេត្តសៀមរាប ថ្នាក់ដឹកនាំនៃអាជ្ញាធរជាតិអប្សរា និងមន្ត្រី-បុគ្គលិកជាច្រើនរូបទៀត។
រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានក្រុមប្រឹក្សាភិបាលនៃអាជ្ញាធរជាតិអប្សរា បានថ្លែងថា ពិធីភ្ជាប់ព្រះសិរ និងបើកព្រះនេត្រចម្លាក់ទេព ២ នៅខ្លោងទ្វារជ័យ នាក្រុងអង្គរធំថ្ងៃនេះ គឺមានអត្ថន័យយ៉ាងខ្លាំង សម្រាប់មហានគរខ្មែរ។
ពិធីនេះមានសារៈសំខាន់ ដោយបាននាំព្រលឹងរបស់ដូនតាខ្មែរ ឱ្យវិលត្រឡប់មកជួយថែរក្សាអង្គរឡើងវិញ ព្រមទាំងមានសន្តិភាព ដោយហេតុថា ខ្លោងទ្វារជ័យជាទីតាំងប្រវត្តិសាស្ត្រ ដែលព្រះមហាក្សត្រខ្មែរ រមែងប្រារព្ធធ្វើពិធីសំខាន់ៗ ដូចជាពិធីគ្រងរាជ្យ និងពិធីយាងទៅសមរភូមិ ជាដើម។ ជាមួយគ្នានេះដែរ ការរៀបចំឡើងវិញនូវព្រះសិរទេព និងអសុរទាំងនេះ គឺជាការបន្ថែមឲ្យមានសោភ័ណភាពស្រស់ស្អាត ដែលនឹងក្លាយជាផលិតផលថ្មី ដើម្បីទាក់ទាញភ្ញៀវទេសចរជាតិ និងអន្តរជាតិ ក៏ដូចជាអនុញ្ញាតឲ្យប្រជាពលរដ្ឋខ្មែរគ្រប់រូបបានទៅធ្វើសក្ការបូជាផងដែរ។
បណ្ឌិតសភាចារ្យ ភឿង សកុណា បញ្ជាក់ទៀតថា អត្ថន័យដ៏សំខាន់ គឺចម្លាក់ទេព និងអសុរទាំងអស់ ដែលនៅអមខ្លោងទ្វារជ័យ នៃក្រុងអង្គរធំនេះ បានឆ្លងកាត់ប្រវត្តិសាស្ត្រទាំងគ្រាលំបាក និងគ្រារុងរឿង ក៏ដូចជាឆ្លងកាត់សង្គ្រាមជាច្រើនជំនាន់មកហើយ ដោយនៅតែបន្តរួមសុខរួមទុក្ខជាមួយប្រជាពលរដ្ឋខ្មែរគ្រប់កាលៈទេសៈ បើទោះបីជាចម្លាក់ជាច្រើនមានការបាត់បង់ផ្នែកខ្លះនៃរាងកាយក៏ដោយក្តី។
នៅអមខ្លោងទ្វារជ័យ នៃក្រុងអង្គរធំ មានចម្លាក់ទេវ និងអសុរទាញព្រ័ត្រ សរុបទាំងអស់ ១០៨។ ដោយសារសង្គ្រាមជាច្រើនជំនាន់ មានការបំផ្លិចបំផ្លាញបានធ្វើឱ្យព្រះសិរចម្លាក់ដែលធ្វើពីថ្មភក់ទាំងនេះ បានបាត់បង់ស្ទើរទាំងស្រុង ដោយបែកខ្ញែកទៅកាន់ទីតាំងជាច្រើនផ្សេងៗគ្នា ក្នុងនោះមួយចំនួនស្ថិតនៅទីតាំងនានាក្នុងប្រទេសកម្ពុជា និងមួយចំនួនទៀតស្ថិតនៅបរទេសផងដែរ។
ប៉ុន្តែរយៈពេលជាច្រើនឆ្នាំមកហើយ អាជ្ញាធរជាតិអប្សរា ជាមួយក្រសួងវប្បធម៌ និងវិចិត្រសិល្បៈ ដោយមានការចូលរួមពីបណ្ដាប្រទេសជាមិត្ត មានដូចជា អង្គការ UNESCO ប្រទេសបារាំង ជប៉ុន និងសហរដ្ឋអាមេរិក ជាដើម បានប្រឹងប្រែងស្វែងរកប្រមូលព្រះសិរចម្លាក់ទេវ និងអសុរទាំងនេះត្រឡប់មកវិញ ដោយខ្លះបានពីការស្រាវជ្រាវធ្វើកំណាយរកឃើញមកវិញ ខ្លះរក្សាទុកនៅអភិរក្សដ្ឋានអង្គរ ខ្លះរក្សាទុកនៅសារមន្ទីរនានា និងមួយចំនួនទៀត បានពីការទាមទារពីបរទេស ដើម្បីយកមកតម្កល់នៅទីតាំងដើមវិញ។
បច្ចុប្បន្នយើងបានរកឃើញព្រះសិរ ដែលបាត់ស្ទើរតែគ្រប់វិញហើយ គឺនៅបាត់តែព្រះសិរ ៣ ទៀតប៉ុណ្ណោះ ដែលកំពុងតម្កល់នៅសារមន្ទីរនៅក្រៅប្រទេស ហើយយើងកំពុងខិតខំស្វែងរកនិងចរចា ដើម្បីសុំឲ្យបញ្ជូនត្រឡប់មកវិញនាពេលខាងមុខ។
សូមបញ្ជាក់ថា រឿងរ៉ាវពាក់ព័ន្ធការស្វែងរកនិងទាមទារវត្ថុបុរាណខ្មែរពីបរទេសនេះក៏ត្រូវបានចងក្រងនិងផលិតជាភាពយន្តឯកសារកម្រិតអន្តរជាតិមួយផងដែរដែលមានចំណងជើងថា “Loot: A story of crime and redemption” (ការវិលត្រលប់មកវិញនូវរតនសម្បត្តិវត្ថុកម្ពុជា)។ ដូច្នេះសម្រាប់ប្រិយមិត្តដែលចង់ដឹងកាន់តែលម្អិតពីដំណើរការស៊ើបអង្កេតជុំវិញបណ្ដាញរត់ពន្ធវត្ថុបុរាណជាច្រើនទៀតអាចរង់ចាំទស្សនាបាន ដោយភាពយន្តនេះនឹងមានចាក់បញ្ចាំងតាមបណ្ដារោងភាពយន្តនានាចាប់ពីថ្ងៃទី១៦ ខែតុលា តទៅ ៕
រូបភាព៖ Apsara National Authority
Account
Security
Favourite Content