សក់ ជាផ្នែកមួយដ៏សំខាន់ដែលអាចជួយលើកសម្រស់របស់បុគ្គលម្នាក់ៗបាន ជាពិសេសប្រភេទសរសៃសក់ដែលមានសុខភាពល្អ ក្រាស់ និងមានសភាពទន់រលោង។ ដោយឡែក មានសកម្មភាពខុសៗមួយចំនួនដែលមនុស្សទូទៅតែងតែធ្វើជាប្រចាំ នាំឱ្យមានផលប៉ះពាល់ដល់សុខភាពសក់ជារឿយៗ។ តួយ៉ាងគឺ ការកក់សក់តែម្ដង។

ជាធម្មតា មនុស្សមួយចំនួនធំតែងនិយមកក់សក់មុនពេញចេញទៅបំពេញភារកិច្ចនៅខាងក្រៅផ្ទះ អាចមកពីមូលហេតុដែលចង់ឱ្យសក់ស្អាត និងមានក្លិនល្អនៅពេលដែលជួបនឹងអ្នកដទៃ។ យ៉ាងណាមិញ ការកក់សក់មុនពេញចេញទៅក្រៅផ្ទះមិនមែនជារឿងដែលត្រឹមត្រូវទេ ព្រោះនៅពេលដែលអ្នកធ្វើបែបនេះ ប្រៀបបាននឹងអ្នកកំពុងតែយកស្បែកក្បាលដែលទើបតែសម្អាតហើយ ទៅជួបនឹងសារធាតុកខ្វក់នៅខាងក្រៅផ្ទះដូចគ្នាដែរ។ គួបផ្ស៊ំនឹងអាកាសធាតុដែលប្រែប្រួលជាប្រចាំផង ស្បែកក្បាលរបស់អ្នកនឹងអាចមានអាការរម៉ាស់ ឬកើតមានមុន ជាដើម។
ជំនួសគ្នាវិញ អ្នកគួរធ្វើការសក់នៅពេលដែលត្រឡប់មកដល់ផ្ទះវិញ ព្រោះការធ្វើបែបនេះ ប្រៀបបាននឹងការសម្អាតសារធាតុកខ្វក់ដែលអ្នកទទួលបានពេលចេញទៅខាងក្រៅចេញពីស្បែកក្បាល ដែលជាផលល្អដល់អនាម័យស្បែកក្បាល។ ក្រៅតែពីការកក់សក់ ការមើលថែដោយសារធាតុបំប៉ននានាក៏ជារឿងសំខាន់ដែរ។ ជាក់ស្ដែង នៅពេលដែលអ្នកផ្លុំសក់ឱ្យស្ងួត ស្បែកក្បាលរបស់អ្នកក៏ស្ងួតដូចគ្នាដែរ។ ហេតុដូចនេះហើយ ការប្រើប្រាស់ស្រ្ពេយ៍ ឬសេរ៉ូមរក្សាជាតិសំណើម និងប្រេងនៅលើស្បែកក្បាលជារឿងដែលអ្នកមិនគួររំលង។

ការប្រើប្រាស់ស្រ្ពេយ៍ ឬសេរ៉ូមទៀតសោត អ្នកគួរជ្រើសរើសផលិតផលណាដែលមិនតម្រូវឱ្យលាងទឹកចេញក្រោយប្រើប្រាស់ និងជាផលិតផលដែលអាចជួយការពារសរសៃសក់ពីកម្ដៅ។ ការប្រើប្រាស់ផលិតផលប្រភេទនេះនឹងជួយការពារសក់របស់អ្នកពីកម្ដៅនៃម៉ាស៊ីនផ្លុំសក់ ឬម៉ាស៊ីនកៀបសក់ ក៏ដូចជាកម្ដៅថ្ងៃដែលអាចធ្វើឱ្យខូច ឬឆេះសក់បាន។ លើសពីនេះទៀត ការប្រើប្រាស់សារធាតុបំប៉នដែលមិនតម្រូវឱ្យលាងទឹកចេញអាចជួយថែរក្សាសក់របស់អ្នកបានក្នុងរយៈពេលយូរ។ ជាក់ស្ដែង បើសិនជាអ្នកលាបប្រភេទសារធាតុបំប៉នទាំងនេះ រួចចូលគេងអស់ពេលមួយយប់ទៅហើយក្ដី ៥០ ទៅ ៦០ភាគរយនៃសារធាតុទាំងនោះនៅតែមានជាប់នៅលើសរសៃសក់របស់អ្នក ដែលនឹងបំប៉នសរសៃសក់ជារឿយៗ។
ក្រៅពីសកម្មភាពខាងលើ ចំណុចសំខាន់ និងចាំបាច់មួយទៀតនោះ គឺការដឹងពីប្រភេទនៃស្បែកក្បាល និងសរសៃសក់របស់ខ្លួនឯង ព្រោះវានឹងជួយឱ្យអ្នកអាចជ្រើសរើសផលិតផលដើម្បីសម្អាត និងបំប៉នបានត្រឹមត្រូវសមស្របទៅនឹងប្រភេទស្បែកក្បាល និងសរសៃសក់៕



























Account
Security
Favourite Content