អាចនិយាយបានថា ត្រីខកំប៉ុងគឺជាជម្រើសអាហារដែលមនុស្សជាច្រើននឹកឃើញនៅពេលមិនដឹងថាត្រូវញ៉ាំអ្វី ឬមានថវិកាតិចតួច ប៉ុន្តែអាចនឹងមានមនុស្សជាច្រើនឆ្ងល់ដូចគ្នាដែរថាបរិភោគត្រីខកំប៉ុង ប៉ះពាល់សុខភាពអត់? គួរយកកម្ដៅសិន ឬញ៉ាំភ្លាមៗ…? ខាងក្រោមនេះ AMS នឹងប្រាប់ចម្លើយ!
ការកម្ដៅត្រីខកំប៉ុង៖
តាមពិតទៅ ត្រីខកំប៉ុងអាចបរិភោគភ្លាមៗបន្ទាប់ពីបើកកំប៉ុង ព្រោះត្រីខកំប៉ុងជាអាហារដែលបានចម្អិនរហូតដល់ឆ្អិនរួចទៅហើយ និងត្រូវបានសម្លាប់មេរោគដែលមាននៅក្នុងរោងចក្រ ដោយក្នុងដំណើរការផលិត គេបានប្រើកម្ដៅខ្ពស់ប្រហែល ១១៨ – ១២២ អង្សាសេ រយៈពេល ៦០ – ៧០ នាទី ធ្វើឱ្យត្រីកំប៉ុងអាចរក្សាទុកបានយូរដោយមិនខូច ទោះបីជាមិនដាក់ទូរទឹកកកក៏ដោយ។
ការកម្ដៅត្រីខកំប៉ុងមុនពេលញ៉ាំក៏អាចធ្វើទៅបានដែរ ដើម្បីបង្កើនឱជារស ដោយអ្នកអាចកម្ដៅត្រីខកំប៉ុងឡើងវិញតាមវិធីផ្សេងៗ ដូចជាកម្ដៅក្នុងមីក្រូវ៉េវ នៅលើចង្ក្រាន ឬនៅក្នុងឆ្នាំង។
ការកម្ដៅត្រីខកំប៉ុងក្នុងមីក្រូវ៉េវ អាចធ្វើបានដោយចាក់ត្រីខកំប៉ុងដាក់លើចានមួយ ហើយកម្ដៅវាក្នុងមីក្រូវ៉េវរយៈពេល ១ទៅ២នាទី ឬរហូតដល់ត្រីឡើងកម្ដៅសព្វ។
ការកម្ដៅត្រីខកំប៉ុងនៅលើចង្ក្រាន អាចធ្វើបានដោយចាក់ត្រីខកំប៉ុងចូលទៅក្នុងខ្ទះ ហើយកម្ដៅដោយប្រើភ្លើងមធ្យមរហូតដល់ត្រីក្ដៅសព្វ។
ការកម្ដៅត្រីខកំប៉ុងនៅក្នុងឆ្នាំង អាចធ្វើបានដោយចាក់ត្រីខកំប៉ុងចូលទៅក្នុងឆ្នាំងមួយហើយបន្ថែមទឹកបន្តិច និងប្រើភ្លើងមធ្យមរហូតដល់ត្រីក្ដៅសព្វ។
សារធាតុចិញ្ចឹមពីត្រីខកំប៉ុង៖
– សំបូរទៅដោយប្រូតេអ៊ីនដែលចាំបាច់សម្រាប់កសាង និងជួសជុលកោសិកាក្នុងរាងកាយ ហើយក៏ជាប្រូតេអ៊ីនដែលងាយរំលាយផងដែរ ដូច្នេះវាល្អសម្រាប់ប្រព័ន្ធរំលាយអាហារ។
-មានជាតិខ្លាញ់ទាប។ ត្រីកំប៉ុងភាគច្រើនមានជាតិខ្លាញ់ទាប ដូច្នេះវាសក្ដិសមសម្រាប់អ្នកដែលចង់គ្រប់គ្រងទម្ងន់ ឬកាត់បន្ថយជាតិខ្លាញ់ក្នុងខ្លួន។
-មានផ្ទុកអាស៊ីតខ្លាញ់មិនឆ្អែតដូចជា Omega-3 ដែលមានអត្ថប្រយោជន៍ជាច្រើនចំពោះសុខភាព ដូចជាកាត់បន្ថយហានិភ័យនៃជំងឺបេះដូង ដាច់សរសៃឈាមខួរក្បាល ជំងឺអាល់ហ្សៃមឺរ និងជំងឺរលាកសន្លាក់ជាដើម។
– មានកាល់ស្យូមខ្ពស់។ ត្រីកំប៉ុងមួយចំនួន ដូចជាត្រីសាឌីន មានជាតិកាល់ស្យូមខ្ពស់ ដែលចាំបាច់សម្រាប់ការកសាង និងការថែរក្សាឆ្អឹង និងធ្មេញ។
– ត្រីខកំប៉ុងក៏ជាប្រភពដ៏ល្អនៃវីតាមីន និងសារធាតុរ៉ែផ្សេងទៀតដូចជា វីតាមីន A វីតាមីន B12 និងជាតិដែក។
ទោះយ៉ាងណា ត្រីខកំប៉ុងក៏អាចបង្កគ្រោះថ្នាក់ដែរ ប្រសិនបើទទួលទានមិនបានត្រឹមត្រូវដូចខាងក្រោម៖
– ទទួលទានច្រើនពេក។ ត្រីកំប៉ុងមួយចំនួន ដូចជាត្រីសាឌីន មានជាតិសូដ្យូមខ្ពស់ ប្រសិនបើទទួលទានច្រើនពេក វាអាចបង្កើនហានិភ័យនៃជំងឺតម្រងនោម និងលើសឈាម។
– ត្រីខកំប៉ុងមួយចំនួនអាចមានជាប់ជាតិពុលដូចជា បារត សំណ និងអាសេនិច ដូច្នេះការទទួលទានត្រីទាំងនេះច្រើនពេកអាចមានឥទ្ធិពលអវិជ្ជមានដល់សុខភាពរបស់អ្នក។
– អ្នកដែលអាឡែស៊ីជាមួយអាហារសមុទ្រគួរតែជៀសវាងការទទួលទានត្រីខកំប៉ុង ដោយសារតែវាអាចបង្កឱ្យមានប្រតិកម្មដូចជាកន្ទួល រមាស់ ហើម និងពិបាកដកដង្ហើម។
– ដោយសារជាអាហារកែច្នៃប្រែរូប ត្រីខកំប៉ុងជាច្រើនមានដាក់សារធាតុរក្សាទុកបានយូរ ឬអំបិល (សូដ្យូម) ដែលអាចជះឥទ្ធិពលអវិជ្ជមានដល់សុខភាព។ ដូច្នេះ មិនគួរទទួលទានញឹកញាប់នោះឡើយ ៕