ការផាត់មុខតិច ឬច្រើនគឺពិតជាសំខាន់ខ្លាំងមែនទែនសម្រាប់មនុស្សស្រី។ ប៉ុន្តែក្នុងនោះយើងត្រូវការឱ្យមានតិចនិកផាត់មុខ ឬរបៀបនៃការជ្រើសរើសផលិតផលដែរ។ ស្របពេលនេះក៏មានចំណុចតូចៗមួយចំនួនទៀតដែលយើងបានធ្វើពេលផាត់មុខ ហើយធ្វើឱ្យចាស់លឿនដោយមិនដឹងខ្លួន៖
១. ប្រើកម្លាំងខ្លាំងពេលផាត់
មនុស្សមួយចំនួនយល់ថាការប្រើកម្លាំងផាត់ម្សៅខ្លាំងៗអាចធ្វើឱ្យម្សៅជ្រាប់ចូលមុខល្អ ប៉ុន្តែវាគឺកំហុសដ៏ធ្ងន់បំផុត។ ការប្រើកម្លាំងត្រដុសខ្លាំងៗបែបនេះមិនផ្ដល់ផលល្អដល់ស្បែកនោះទេ ថែមទាំងមិនធ្វើឱ្យសាច់ម្សៅស្មើគ្នាទៀតផង។ ដូច្នេះយើងត្រូវចេះប៉ាន់ស្មានពីកម្លាំង ជាពិសេសការជ្រើសរើសជក់ និងប៉ុងណាដែលទន់។
២. ប្រើម្សៅទ្រនាប់ដែលខុសពណ៌ស្បែកមុខ
ការជ្រើសរើសពណ៌ម្សៅទ្រនាប់ចាំបាច់គឺត្រូវតែប្រាកដចិត្តជាមុនសិនថាស្បែករបស់ខ្លួនមានពណ៌អ្វី។ មិនដូច្នោះទេវានឹងបណ្ដាលឱ្យស្បែកឡើងជា ស ពេក ឬស្រអាប់ពេលមិនខាន។ ជាក់ស្ដែងវានឹងមើលទៅហាក់ដូចជាតួត្លុកជាមិនខាន។
៣. ប្រើម្សៅក្រាស់ពេក
នៅពេលដែលយើងប្រើម្សៅក្នុងបរិមាណច្រើនពេកនឹងធ្វើឱ្យស្បែកមុខមើលក្រាស់ឃ្មឹក និងបន្ថែមអាយុផងដែរ។ ផ្ទុយទៅវិញការតុបតែងមុខឱ្យក្មេងជាងវ័យគឺតម្រូវឱ្យមានភាពស្រាលស្រទន់ និងមានភាពទាក់ទាញ។ ដូច្នេះហើយយើងមិនចាំបាច់ប្រើម្សៅច្រើនទេ បើអាចគ្រាន់តែប្រើជាឡេការពារកម្ដៅ ឬ cushion បន្តិចបន្តួចក៏ល្មមស្អាតហើយ។
៤. ការប្រើប្រាស់ម្សៅ Contouring
ទទួលស្គាល់ថាការប្រើប្រាស់ម្សៅ Contouring អាចជួយបង្រួមទម្រង់មុខឱ្យតូចហើយស្លីមជាងមុន។ ប៉ុន្តែសូមប្រយ័ត្នទៅលើបរិមាណដែលយើងប្រើប្រាស់ បើប្រើច្រើនជ្រុលវានឹងធ្វើឱ្យកកដុំៗ ហើយអណ្ដែតចេញមកលើមុខដែលបណ្ដាលឱ្យអាក្រក់មើលមែនទែន។
៥. មិនបានលាងសម្អាតឱ្យបានត្រឹមត្រូវ
មិនចាំបាច់ទាល់តែប្រើម្សៅក្រាស់ទើបតម្រូវឱ្យលាងសម្អាតឱ្យបានត្រឹមត្រូវនោះទេ សូម្បីតែការប្រើផលិតផលថែរក្សាស្បែកផ្សេងៗទៀតក៏ជារឿងសំខាន់ដែរ។ វាអាចនឹងបន្សល់ទុកនូវភាពកខ្វក់ និងកាកសំណល់របស់ផលិតផលជាដើមឱ្យស្ទះនៅក្នុងរន្ធញើសហើយបណ្ដាលឱ្យឡើងមុន មានស្នាមអុជខ្មៅ ឬជាំផងដែរ។ មិនតែប៉ុណ្ណោះ សារធាតុដែលនៅសល់ទាំងនោះក៏អាចបង្កើតឡើងមកជាស្នាមជ្រីវជ្រួញទៀតផង៕