នៅសល់មិនដល់ ១ អាទិត្យទៀតនោះទេ ពិព័រណ៍សៀវភៅកម្ពុជាលើកទី ១០ ឆ្នាំ ២០២៣ នឹងមានវត្តមានជាថ្មីម្តងទៀត នៅកោះពេជ្រ រយៈពេល ៤ ថ្ងៃជាប់គ្នាតែម្តង។
ពិព័រណ៍សៀវភៅកម្ពុជាលើកទី១០ ឆ្នាំ ២០២៣នេះ នឹងប្រារព្ធធ្វើឡើងក្រោមប្រធានបទ «សរសេរចំណាន អានចំណាប់ ចាប់យកចំណេះ» ចាប់ពីថ្ងៃទី១៤ រហូតដល់ ថ្ងៃទី១៧ ខែធ្នូ នៅសួនច្បារខាងមុខសាលាបុរីកោះពេជ្រ ចាប់ពីម៉ោង ៨:០០ ព្រឹក ដល់ម៉ោង ៨:០០ យប់។
ស្តង់ដែលមាននៅក្នុងពិព័រណ៍សៀវភៅកម្ពុជា ឆ្នាំ២០២៣នេះ មានរហូតដល់ទៅ ២២៩ ស្តង់ ដែលក្នុងនោះ មានការចូលរួមពីគ្រឹះស្ថានបោះពុម្ពផ្សាយ និងអ្នកនិពន្ធល្បីៗជាច្រើន រហូតដល់ ១៥២ ស្ថាប័ន។ ចំណែកឯ ប្រភេទសៀវភៅមានគ្រប់ប្រភេទដែលបានដាក់តាំងលក់តាមស្ដង់នីមួយៗ មានដូចជា សៀវភៅបែបប្រលោមលោក សៀវភៅទស្សនវិជ្ជា និងចិត្តវិទ្យា សៀវភៅសម្រាប់កុមារ សៀវភៅប្រវត្តិវិទ្យា និងភូមិវិទ្យា សៀវភៅទាក់ទងនឹងសាសនានិងសិល្បៈ ជាដើម។ អ្វីដែលកាន់តែពិសេសនោះ តាមស្ដង់នីមួយៗ នឹងមានការបញ្ចុះតម្លៃពិសេសរហូតដល់៥០% និងមានការចែកជូនសៀវភៅដោយឥតគិតថ្លៃ ព្រមទាំងកាដូពិសេសៗផងដែរ។
មិនតែប៉ុណ្ណោះ ពិព័រណ៍សៀវភៅកម្ពុជា ក៏បានរៀបចំសកម្មភាព លេងល្បែងកំសាន្តជាមួយនឹងអ្នកចូលរួមដើម្បីឈ្នះរង្វាន់ផ្សេងៗ ការប្រគំតន្ត្រី ដែលចូលរួមសម្ដែងដោយតារាចម្រៀងល្បីៗ។ បន្ថែមពីលើនោះទៀត អ្នកចូលរួមអាចមកទិញសៀវភៅផង ជួបជាមួយអ្នកនិពន្ធផ្ទាល់ ជាវវត្ថុអនុស្សាវរីយ៍ជាមួយនឹងក្រុមការងារ និងបានថតរូបលេងកម្សាន្តផងដែរ៕