ក្នុងកំលុងពេលកិច្ចប្រជុំកំពូលហ្វ្រង់កូហ្វូនីលើកទី២០ ដែលកម្ពុជាធ្វើជាម្ចាស់ផ្ទះកាលពីថ្ងៃទី១៤ ដល់ទី១៦ ខែវិច្ឆិកា ឆ្នាំ២០២៦ វត្តមានរបស់ឯកឧត្តម Emmanuel Macron ប្រធានាធិបតីនៃសាធារណរដ្ឋបារាំង មិនត្រឹមតែជាព្រឹត្តិការណ៍នយោបាយការទូតដ៏សំខាន់សម្រាប់សហគមន៍ប្រទេសនិយាយភាសាបារាំងប៉ុណ្ណោះទេ ប៉ុន្តែក៏បានក្លាយជារូបភាពដ៏មានឥទ្ធិពលក្នុងការជំរុញ និងផ្សព្វផ្សាយវិស័យទេសចរណ៍ សិល្បៈ និងវប្បធម៌កម្ពុជាទៅកាន់ឆាកអន្តរជាតិផងដែរ។ កម្មវិធីនីមួយៗ បានរំលេចឡើងនូវចំណងមិត្តភាពដ៏យូរអង្វែង និងកិច្ចសហប្រតិបត្តិការប្រកបដោយផ្លែផ្កា រវាងប្រទេសទាំងពីរ គឺកម្ពុជា និងបារាំង។

ការទូតវប្បធម៌តាមរយៈសិល្បៈទស្សនីយភាព
សកម្មភាពដ៏គួរឱ្យកត់សម្គាល់ដំបូង គឺការអញ្ជើញចូលរួមរបស់ឯកឧត្តមប្រធានាធិបតី ក្នុងពិធីលៀងសាយភោជន៍ជាផ្លូវការ ដែលរៀបចំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដើម្បីស្វាគមន៍គណៈប្រតិភូជាន់ខ្ពស់នៃប្រទេសហ្វ្រង់កូហ្វូនី។ ក្នុងឱកាសនោះ ឯកឧត្តម Macron បានទស្សនាដោយផ្ទាល់នូវទស្សនីយភាពសិល្បៈដ៏វិចិត្ររបស់កម្ពុជា ដែលសម្តែងដោយសិល្បករសិល្បការិនីនៃនាយកដ្ឋានសិល្បៈទស្សនីយភាព។ ការសម្តែងទាំងនេះបានបង្ហាញពីអត្តសញ្ញាណជាតិ ភាពសម្បូរបែបនៃវប្បធម៌ និងព្រលឹងរបស់ខ្មែរ ដែលបានទាក់ទាញចំណាប់អារម្មណ៍ និងការកោតសរសើរយ៉ាងខ្លាំងពីសំណាក់ភ្ញៀវកិត្តិយសអន្តរជាតិទាំងអស់។ វាជាការចាប់ផ្តើមដ៏ល្អឥតខ្ចោះ ដែលបញ្ជាក់ពីសារៈសំខាន់នៃសិល្បៈក្នុងការទូត។





ដំណើរទស្សនកិច្ចនៅឧទ្យានអង្គរ និងការអភិរក្សបេតិកភណ្ឌ
បន្តពីកិច្ចប្រជុំនៅរាជធានីភ្នំពេញ ឯកឧត្តម Emmanuel Macron បានអញ្ជើញបន្តដំណើរទស្សនកិច្ចទៅកាន់ខេត្តសៀមរាប ដែលជាទីក្រុងប្រវត្តិសាស្ត្រ និងជាតំបន់បេតិកភណ្ឌពិភពលោក។ វត្តមានរបស់ឯកឧត្តមនៅមុខប្រាសាទអង្គរវត្តដ៏ល្បីល្បាញ បានក្លាយជារូបភាពដ៏មានអត្ថន័យក្នុងការផ្សព្វផ្សាយទេសចរណ៍។ មិនត្រឹមតែប៉ុណ្ណោះ ឯកឧត្តម ក៏បានបង្ហាញពីការគាំទ្រយ៉ាងពេញទំហឹងចំពោះកិច្ចខិតខំប្រឹងប្រែងអភិរក្សប្រាសាទបុរាណនានា ដែលជាស្នាដៃរបស់បុព្វបុរសខ្មែរ តាមរយៈកិច្ចសហប្រតិបត្តិការជាមួយប្រទេសបារាំង។ ដំណើរកម្សាន្តនេះ បានបញ្ជាក់ជាថ្មីថា កម្ពុជាគឺជាគោលដៅទេសចរណ៍វប្បធម៌លំដាប់ពិភពលោក ដែលមានសុវត្ថិភាព និងភាពទាក់ទាញ។




សមិទ្ធផលនៃកិច្ចសហប្រតិបត្តិការ៖ ការសម្ពោធប្រាសាទមេបុណ្យខាងលិច
ចំណុចកំពូលនៃដំណើរទស្សនកិច្ចជាប្រវត្តិសាស្ត្ររបស់ឯកឧត្តមប្រធានាធិបតី គឺព្រះរាជពិធីសម្ពោធប្រាសាទមេបុណ្យខាងលិច ដែលបានបើកទទួលភ្ញៀវទេសចរជាថ្មីក្រោយការជួសជុលដ៏លំបាករយៈពេល ១៤ឆ្នាំ និងចំណាយថវិការហូតដល់ ១២ លានដុល្លារ។ ឯកឧត្តម Macron បានអញ្ជើញចូលរួមជាមួយ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា ជាសាក្សីប្រវត្តិសាស្ត្រនៃជោគជ័យនៃកិច្ចសហប្រតិបត្តិការស្មើភាពគ្នារវាងអាជ្ញាធរជាតិអប្សរា និងសាលាបារាំងចុងបូព៌ា (EFEO)។ គម្រោងនេះ មិនត្រឹមតែបានជួយសង្គ្រោះមរតកវប្បធម៌ដ៏ថ្លៃថ្លាប៉ុណ្ណោះទេ ប៉ុន្តែថែមទាំងបានបង្កើតផលិតផលទេសចរណ៍ថ្មីមួយទៀតនៅក្នុងបារាយណ៍ទឹកថ្លា ដែលទាក់ទាញភ្ញៀវទេសចរឱ្យមកទទួលយកបទពិសោធន៍ទស្សនាមហាស្ថាបត្យកម្មខ្មែរមួយទៀតនៅកណ្តាលទឹក។



អ្វីដែលពិសេសដែរនោះ គឺខណៈចាកចេញពីកម្ពុជា ទំព័រ Facebook ផ្លូវការរបស់លោកប្រធានាធិបតី Macron បានបង្ហោះវីដេអូខ្លីមួយអមដោយបទចម្រៀង «Time To Rise» របស់វណ្ណដា និងព្រឹទ្ធាចារ្យ គង់ ណៃ ដើម្បីថ្លែងអំណរគុណយ៉ាងជ្រាលជ្រៅចំពោះការទទួលស្វាគមន៍យ៉ាងកក់ក្តៅពីសំណាក់កម្ពុជា។ ការជ្រើសរើសបទចម្រៀងដែលលាយឡំរវាងតន្ត្រីសម័យ និងឧបករណ៍បុរាណចាប៉ីដងវែងនេះ មកផ្សព្វផ្សាយជាមួយរូបភាពនៃស្នាមញញឹម ប្រាសាទបុរាណ និងវប្បធម៌ខ្មែរលើបណ្តាញសង្គមរបស់មេដឹកនាំពិភពលោក បានបង្ហាញពីការឱ្យតម្លៃខ្ពស់បំផុតចំពោះសិល្បៈច្នៃប្រឌិតរបស់យុវជនខ្មែរ ព្រមទាំងជួយផ្សព្វផ្សាយពីកម្ពុជាទៅកាន់ពិភពលោកថាជាទឹកដីនៃសន្តិភាព ភាពរស់រវើក និងភាពសម្បូរបែបនៃវប្បធម៌។
សរុបមក វត្តមានរបស់ប្រធានាធិបតីបារាំង Emmanuel Macron ក្នុងឱកាសកិច្ចប្រជុំកំពូលហ្រ្វង់កូហ្វូនីឆ្នាំ២០២៦ បានបន្សល់ទុកនូវរូបភាពជាវិជ្ជមានយ៉ាងជ្រាលជ្រៅ។ តាមរយៈសកម្មភាពការទូតវប្បធម៌ ការចុះទស្សនកិច្ចនៅតំបន់ទេសចរណ៍សំខាន់ៗ និងការសម្ពោធសមិទ្ធផលជួសជុលប្រាសាទ គឺសុទ្ធតែបានចូលរួមចំណែកយ៉ាងសកម្មក្នុងការលើកកម្ពស់កិត្យានុភាពនៃសិល្បៈ វប្បធម៌ និងវិស័យទេសចរណ៍កម្ពុជា ព្រមទាំងពង្រឹងចំណងមិត្តភាព និងកិច្ចសហប្រតិបត្តិការទ្វេភាគីឱ្យកាន់តែរឹងមាំ និងយូរអង្វែង ៕























































Account
Security
Favourite Content