លោកជំទាវអ្នកឧកញ៉ា ម៉ៅ ចំណាន បានបង្ហោះសារចែករំលែកគន្លឹះក្នុងការអប់រំកូនៗឱ្យចេះស្រលាញ់គ្នាព្រមទាំងបានចែករំលែកបទពិសោធន៍នាពេលកន្លងក្នុងនាមជាម្ដាយមួយរូប។ ឆ្លើយតបនឹងសំណួរ «តើធ្វើយ៉ាងណាទើបអាចចិញ្ចឹមកូនៗឱ្យចេះស្រលាញ់គ្នា?» លោកជំទាវអ្នកឧកញ៉ា ម៉ៅ ចំណាន បានបង្ហោះសាររៀបរាប់ដូចខាងក្រោមនេះ។

ក្នុងនាមជាម្ដាយម្នាក់ការមើលថែទាំគ្រួសារជារឿងចាំបាច់ខ្វះមិនបានជាពិសេសការអប់រំកូនឱ្យចេះស្ដាប់បង្គាប់ និងចេះស្រលាញ់គ្នាមិនមែនជាការងាយស្រួលនោះទេ។ ពិតណាស់ ភាពជាបងប្អូនចៀសមិនផុតទេពីការខ្វែងគំនិតគ្នា ដូច្នេះក្នុងនាមជាម្ដាយ លោកជំទាវអ្នកឧកញ៉ាតែងរំឭកកូនឱ្យចេះចែករំលែក អត់ឱន និងបន្តយកចិត្តទុកដាក់គ្នាទៅវិញទៅមកទោះបីឈ្លោះទាស់ទែងគ្នាក៏ដោយ។ បន្ថែមពីនេះលោកជំទាវតែងអប់រំកូនៗឱ្យចេះស្រលាញ់គ្នាទៅវិញទៅមកប្រៀបបីដូចជាមិត្តភ័ក្ដិដំបូង ដៃគូដំបូង និងជាកន្លែងដំបូងដែលផ្ដល់សុវត្ថិភាព ព្រមទាំងបង្រៀនឱ្យពួកគេនិយាយដោយបើកចំហអារម្មណ៍របស់ខ្លួនឱ្យគ្នាបានដឹង។




ក្នុងនាមជាបងប្អូនត្រូវតែយឹតយោងគ្នាទៅវិញទៅមករាល់ពេលជួបការលំបាក ត្រូវចេះការពារគ្នា លើកមុខមាត់គ្នា អភ័យទោសឱ្យគ្នា និងធ្វើល្អដាក់គ្នាទោះបីវាមិនមែនជារឿងងាយស្រួលក៏ដោយ។ បន្ថែមពីនេះ លោកជំទាវតែងធ្វើជាគំរូឱ្យកូនៗចេះសុំទោស និងសាទររាល់ពេលដែលពួកគេត្រូវគ្នា។

ចំពោះការចែករំលែកមួយនេះលោកជំទាវ ម៉ៅ ចំណាន ក៏បានបញ្ជាក់ដែរថាទាំងនេះមិនត្រឹមជាមេរៀនក្នុងការប្រៀនប្រដៅកូននោះទេ ប៉ុន្តែគឺជាមេរៀនជីវិត ពីព្រោះនៅពេលដែលក្មេងៗធំឡើងបានរៀនចេះប្ដូរពីជម្លោះទៅជាការផ្ដល់ក្ដីស្រឡាញ់ នោះពួកគេនឹងក្លាយជាមនុស្សដែលចេះរក្សាទំនាក់ទំនង ទោះបីជាជីវិតជួបការលំបាកយ៉ាងណាក៏ដោយ។ នេះគឺជារបៀបដែលយើងបង្រៀនឱ្យក្នុងចិត្តចេះផ្ដល់ស្រឡាញ់ ដោយមិនត្រឹមតែក្នុងគ្រួសារនោះទេ ពោលគឺសម្រាប់ជាទូទៅ៕
រូបភាព ៖ Lok Chumteav Neak Oknha Mao Chamnan























Account
Security
Favourite Content