តារាចម្រៀងប៉ុបអាមេរិក Jennifer Lopez ត្រូវបានគេរាយការណ៍ថាទទួលបានប្រាក់ឈ្នួល ២ លានដុល្លារអាមេរិកសម្រាប់ការសម្តែងនៅក្នុងពិធីមង្គលការរយៈពេលបួនថ្ងៃរបស់កូនស្រីរបស់អ្នកជំនួញឥណ្ឌា Raj Ramalinga Mantena អ្នកនាង Netra និងសហគ្រិនបច្ចេកវិទ្យា Vamsi Gadiraju។


សារព័ត៌មាន Page Six បានរាយការណ៍ថា តារាចម្រៀងប៉ុបអាយុ ៥៦ ឆ្នាំរូបនេះបានសម្តែងបទចម្រៀងល្បីៗរបស់នាងជាច្រើន រួមទាំងបទ “Waiting for Tonight” និង “Get Right”។
នាងបានបង្ហាញខ្លួនដំបូងដោយស្លៀកឈុតសារីពណ៌ផ្កាឈូកស្រាល មុនពេលប្តូរទៅជាឈុតពណ៌ខ្មៅដើម្បីចាប់ផ្តើមការសម្តែងរបស់នាង។ ក្រោយមកក៏មានការផ្លាស់ប្តូរសំលៀកបំពាក់ពីរឈុតបន្ថែមទៀតគឺ ឈុតពណ៌មាសជាមួយនឹងអាវក្រៅ និងឈុត bodysuit ពណ៌ប្រាក់តុបតែងលម្អដោយត្បូងគ្រីស្តាល់ រួមជាមួយស្បែកជើងកវែងដល់ជង្គង់។



វីដេអូមួយដែលត្រូវបានចែកចាយលើបណ្ដាញសង្គមបានបង្ហាញសកម្មភាព Jennifer Lopez បិទការសម្តែងដោយលើកកែវអបអរសាទរដល់គូស្វាមីភរិយាថ្មីថ្មោង ដែលបានចូលរួមជាមួយខ្លួននៅលើឆាក និងបាននិយាយថា៖ “សូមឱ្យគ្រួសារអ្នករួបរួមគ្នានៅថ្ងៃដ៏អស្ចារ្យនេះ សូមព្រះប្រទានពរដល់យើងទាំងអស់គ្នា”។
ពិធីមង្គលការដែលបានប្រារព្ធឡើងនៅទីក្រុង Udaipur បានចាប់ផ្តើមនៅថ្ងៃទី ២០ ខែវិច្ឆិកា ហើយបានបញ្ចប់ដោយគូស្វាមីភរិយាបានផ្លាស់ប្តូរពាក្យសច្ចាប្រណិធាននៅថ្ងៃទី ២៣ ខែវិច្ឆិកា។ ក្នុងចំណោមបុគ្គលល្បីៗដែលបានចូលរួមក៏មានលោកប្រធានាធិបតីអាមេរិក Donald Trump Jr.។ នេះបើយោងតាម CNBC។


យោងតាមទស្សនាវដ្ដីពាណិជ្ជកម្ម Forbes India លោក Raj Ramalinga Mantena ដែលជាឪពុករបស់កូនក្រមុំបានផ្លាស់ទៅសហរដ្ឋអាមេរិកក្នុងទសវត្សរ៍ឆ្នាំ ១៩៨០ ដោយទទួលបានសញ្ញាបត្រផ្នែកវិទ្យាសាស្ត្រកុំព្យូទ័រពីសាកលវិទ្យាល័យបច្ចេកវិទ្យា Jawaharlal Nehru និងឱសថស្ថានគ្លីនិកពីសាកលវិទ្យាល័យ Maryland ។ លោកបានបង្កើតឱសថស្ថានមួយក្នុងចំណោមឱសថស្ថានដំបូងគេដែលផ្តោតលើជំងឺមហារីកនៅសហរដ្ឋអាមេរិកគឺ OncoScripts ហើយក្រោយមកបានបើកដំណើរការបណ្តាញជំងឺមហារីកអន្តរជាតិ (International Oncology Network) ដែលបច្ចុប្បន្នត្រូវក្រុមហ៊ុន AmerisourceBergen ទិញយក។
លោកក៏បានបង្កើតឱសថស្ថាន ICORE Healthcare ដែលត្រូវបានលក់ទៅឱ្យក្រុមហ៊ុន Magellan Health ក្នុងតម្លៃប្រហែល ២១០ លានដុល្លារអាមេរិកក្នុងឆ្នាំ ២០០៦ ហើយបច្ចុប្បន្នកំពុងគ្រប់គ្រង Ingenus Pharmaceuticals និងក្រុមហ៊ុនបច្ចេកវិទ្យាសុខភាព Integra Connect។
ចំណែកឯ កូនកំលោះ Gadiraju គឺជាសហគ្រិនបច្ចេកវិទ្យា ព្រមទាំងជាសហស្ថាបនិក និងជាប្រធានផ្នែកបច្ចេកវិទ្យានៃក្រុមហ៊ុនដឹកជញ្ជូនអាហារ Superorder។ លោកបានជាប់ឈ្មោះក្នុងបញ្ជី Forbes 30 Under 30 North America កាលពីឆ្នាំមុន ៕


























Account
Security
Favourite Content