ថ្មីៗនេះ J.Y Park ជាតារាចម្រៀង ផលិតករ និងស្ថាបនិកក្រុមហ៊ុន JYP Entertainment បានបរិច្ចាគប្រាក់ផ្ទាល់ខ្លួនចំនួន ១ ពាន់លានវ៉ុនប្រហែល ៧០ ម៉ឺនដុល្លារអាមេរិកជួយទៅដល់ថ្លៃព្យាបាលកុមារ និងក្មេងៗដែលកំពុងជួបប្រទះនឹងការខ្វះខាត។ រាប់ចាប់តាំងពីឆ្នាំ ២០២២ នេះគឺជាឆ្នាំទី ៣ ដែលស្ថាបនិករូបនេះបានរួមចំណែកធ្វើសកម្មភាពសប្បុរសធម៌មួយនេះដោយសរុបជាទឹកប្រាក់ចំនួន ៣ ពាន់លានវ៉ុនប្រហែលជាង ២ លានដុល្លារអាមេរិកដែលជាគម្រូដ៏រឹងមាំនៃការផ្ដល់សប្បុរសធម៌ជាប្រចាំ។
អំណោយមួយនេះនឹងត្រូវបែងចែកទៅកាន់មន្ទីរពេទ្យក្នុងតំបន់ចំនួន ៥ ក្នុងប្រទេសកូរ៉េរួមមានមជ្ឈមណ្ឌលវេជ្ជសាស្ត្រ Yonsei, មន្ទីរពេទ្យ Gangneung Asan, មន្ទីរពេទ្យសាកលវិទ្យាល័យជាតិ Chilgok Kyungpook, មន្ទីរពេទ្យ Busan Paik និងមន្ទីរពេទ្យសាកលវិទ្យាល័យជាតិ Jeju ដោយថវិកានឹងត្រូវបានប្រើប្រាស់សម្រាប់ជួយព្យាបាល និងការស្ដារនីតិសម្បទាដល់កុមារដែលមានជំងឺធ្ងន់ធ្ងរ និងជំងឺកម្រ។
កម្មវិធីបរិច្ចាគមួយនេះត្រូវបានធ្វើឡើងនៅស្នាក់ការកណ្ដាលរបស់ក្រុមហ៊ុន JYP Entertainment ដោយមានការចូលរួមដោយផ្ទាល់ពី J.Y Park និងអ្នកតំណាងមន្ទីរពេទ្យទាំង ៥ ផងដែរ។ ក្នុងកម្មវិធីស្ថាបនិក JYP Entertainment ក៏បានថ្លែងឱ្យដឹងថាក្នុងនាមជាឪពុករបស់កូនស្រី ២ នាក់ លោកពិតជាបានយល់យ៉ាងច្បាស់ពីទឹកចិត្ត និងការតស៊ូរបស់ឪពុកម្ដាយនៅពេលដែលកូនៗឈឺ ជាពិសេសនៅពេលមានបញ្ហាប្រឈមនឹងវិបត្តិហិរញ្ញវត្ថុ។ ដូច្នេះហើយលោកសង្ឃឹមថាអំណោយនេះនឹងផ្ដល់ជាការសង្រ្គោះមួយផ្នែក ហើយលោកនឹងបន្ដខំប្រឹងផ្ដល់ជំនួយបន្ថែមនាពេលអនាគត។
លើសពីការរួមចំណែកផ្ទាល់ J.Y Park ក៏បានដឹកនាំគំនិតផ្ដួចផ្ដើមទំនួលខុសត្រូវសង្គមជាច្រើនតាមរយៈ JYP Entertainment។ ក្រោមប្រធានបទ “Every Dream Matters!” ឬយុទ្ធនាការ EDM ក្រុមហ៊ុនបានដំណើរការកម្មវិធីសង្គមមួយចំនួនដូចជាគម្រោងជំនួយផ្នែកវេជ្ជសាស្រ្ត EDM និងគម្រោងការបំពេញបំណង EDM ដែលមានគោលបំណងផ្តល់ការគាំទ្រផ្នែកហិរញ្ញវត្ថុ និងផ្លូវចិត្តដល់កុមារដែលមានជំងឺធ្ងន់ធ្ងរ។ ជាក់ស្ដែងក្នុងឆ្នាំ ២០២៣ JYP បានបរិច្ចាគ ២៨៥០ លានវ៉ុន (ជិត ២ លានដុល្លារ) និង ១២ លានយ៉េន (ប្រហែលជិត ៨ ម៉ឺនដុល្លារ) ដើម្បីផ្គត់ផ្គងកុមារ ១ ៧០៦ នាក់នៅទូទាំងពិភពលោក។
បន្ថែមពីលើគម្រោងទាំងនេះក្រុមហ៊ុន JYP Entertainment ក៏បានរៀបចំការប្រកួតកីឡាបាល់បោះសប្បុរសធម៌មួយដោយថ្លៃសំបុត្រ និងទឹកប្រាក់បរិច្ចាគទាំងអស់នឹងត្រូវឧបត្ថម្ភទៅលើថ្លៃព្យាបាលសម្រាប់អ្នកជំងឺកុមារក្រីក្រ។ សម្រាប់ព្រឹត្តិការណ៍ប្រចាំឆ្នាំ “EDM Day” ដែលជាព្រឹត្តិការណ៍ចុងឆ្នាំដែលបង្ហាញពីការរួមចំណែកក្នុងសង្គមរបស់ក្រុមហ៊ុននឹងប្រព្រឹត្តទៅនៅថ្ងៃទី ២៤ ខែធ្នូ តាមរយៈឆាណែលយូធូបផ្លូវការរបស់ JYP ។
ការប្ដេជ្ញាចិត្តរបស់ JYP Entertainment ចំពោះនិរន្តរភាពក៏ត្រូវបានឆ្លុះបញ្ចាំងនៅក្នុង ESG (Environment, Social, and Governance) គឺបរិស្ថាន សង្គម និងអភិបាលកិច្ចរបស់ខ្លួនផងដែរ។ យោងតាមរបាយការណ៍និរន្តរភាពឆ្នាំ ២០២២ JYP បានក្លាយក្រុមហ៊ុនកម្សាន្តកូរ៉េដំបូងគេដែលទទួលបានចំណាត់ថ្នាក់ AA ក្នុងការវាយតម្លៃការគ្រប់គ្រង ESG ឆ្នាំ 2024 ដោយ Sustinvest។ ជាមួយគ្នានេះ នៅក្នុងខែធ្នូ ទស្សនាវដ្តី TIME បានចាត់ចំណាត់ថ្នាក់ JYP លេខបីនៅទូទាំងពិភពលោក និងលេខមួយនៅក្នុងប្រទេសកូរ៉េក្នុងចំណោម “ក្រុមហ៊ុនល្អបំផុតរបស់ពិភពលោកសម្រាប់កំណើនប្រកបដោយចីរភាពឆ្នាំ ២០២៥” ផងដែរ៕