ចាប់តាំងពីខែកុម្ភៈ ឆ្នាំ ២០២៥នេះ ប៉ូលីសបានចាប់អ្នកនិពន្ធស្រីវ័យចន្លោះ ២០ឆ្នាំជាង ៣០នាក់ ដោយចោទប្រកាន់ថា ប្រលោមលោកបុរសស្រឡាញ់បុរស ឬ BL បានធ្វើឱ្យភាគរយដែលស្ត្រីចង់បានកូនធ្លាក់ចុះ។

មេធាវីម្នាក់បានប្រាប់សារព័ត៌មាន BBC ថា យ៉ាងហោចណាស់ អ្នកនិពន្ធចំនួន ៣០ នាក់ ដែលស្ទើរតែទាំងអស់សុទ្ធតែជាស្ត្រីក្នុងវ័យ ២០ ឆ្នាំ ត្រូវបានប៉ូលីសចាប់ខ្លួននៅទូទាំងប្រទេសចាប់តាំងពីខែកុម្ភៈមក។ លោកបានឱ្យដឹងបន្ថែមថា ដ្បិតអ្នកនិពន្ធជាច្រើនកំពុងស្ថិតនៅក្រៅឃុំ រង់ចាំការកាត់ទោស តែមានអ្នកខ្លះទៀតកំពុងតែជាប់ឃុំ ស្របពេលដែលអ្នកជាប់ពាក់ព័ន្ធជាច្រើនរូបទៀត ក៏ទទួលបានការកោះហៅដើម្បីសួរចម្លើយដែរ។
ជាក់ស្ដែង អ្នកនិពន្ធទាំងនេះ គឺជាអ្នកសរសេររឿងស្នេហាបុរសស្រឡាញ់បុរស ដែលប្រទេសចិនស្គាល់ថាជា Danmei ដោយបានផ្សព្វផ្សាយស្នាដៃនេះនៅលើកម្មវិធីរបស់តៃវ៉ាន់ មានឈ្មោះថា Haitang Literature City។ ការចាប់ខ្លួនអ្នកនិពន្ធនេះ គឺស្ថិតនៅក្រោមការចោទប្រកាន់ថា បំពានច្បាប់ ផលិត និងចែកចាយមាតិកាអាសអាភាស ដោយអ្នកនិពន្ធដែលទទួលបានប្រាក់កម្រៃពីស្នាដៃនេះ នឹងត្រូវផ្ដន្ទាទោសឱ្យជាប់ពន្ធនាគារ។
ច្បាប់នេះកំណត់គោលដៅ ចំពោះតែការពិពណ៌នាអំពីសកម្មភាពផ្លូវភេទរវាងបុរស និងបុរស និងនិន្នការផ្លូវភេទផ្សេងទៀត ស្របពេលដែលស្នាដៃដែលមានបញ្ចូលនូវសកម្មភាពផ្លូវរវាងបុរស និងស្រ្តីដទៃទៀតមិនមែនជាបញ្ហា ក្នុងច្បាប់នេះឡើយ។ តួយ៉ាង ស្នាដៃរបស់លោក Mo Yan ដែលមានបញ្ចូលឈុតស្រើបស្រាលរវាងបុរស និងស្រ្តី ថែមទាំងទទួលបានពានរង្វាន់ណូបែលទៀតផង។

លោកបណ្ឌិត Liang Ge បានលើកឡើងថា ការត្រួតពិនិត្យរបស់រដ្ឋលើ Danmei បានចាប់ផ្តើមឡើង នៅពេលដែលដឹកនាំចិន Xi Jinping លើកទឹកចិត្តឱ្យមានការស្តារជាតិឡើងវិញ ស្របពេលដែលការរៀបអាពាហ៍ពិពាហ៍ និងអត្រាកំណើតធ្លាក់ចុះ ។
សាស្ត្រាចារ្យពីសាកលវិទ្យាល័យ University College London រូបនេះ មានប្រសាសន៍បន្ថែមថា៖ “រដ្ឋាភិបាលចិនចង់លើកកម្ពស់តម្លៃគ្រួសារបែបប្រពៃណី ហើយលើកឡើងថា ការចូលចិត្តប្រលោមលោក Danmei នេះ ចាត់ទុកថាជាកត្តាដែលធ្វើឱ្យស្ត្រីមិនសូវមានឆន្ទៈចង់មានកូន”។
មានឬសគល់ចេញពីប្រភេទរឿង Yaoi របស់ប្រទេសជប៉ុន Danmei បានចាប់ផ្ដើមមានកំណើតនៅក្នុងប្រទេសចិនកាលពី ទសវត្សរ៍ឆ្នាំ ១៩៩០ ជាមួយនឹងប្រជាប្រិយភាពបន្តកើនឡើងជារឿយៗ រហូតមានចំណងជើងខ្លះ បានក្លាយជាសៀវភៅលក់ដាច់បំផុតលំដាប់អន្តរជាតិទៀតផង។

នៅក្នុងឆ្នាំ ២០២០ សាច់រឿងប្រភេទនេះមិនមានវត្តមានត្រឹមតែនៅលើក្រដាសសៀវភៅទៀតទេ តែប្រលោមលោកជាង ៦០ចំណងជើងត្រូវបានជ្រើសរើសផលិតចេញជាភាពយន្តកុន និងភាពយន្តភាគ ដោយស្នាដៃដែលលក់សិទ្ធផលិតបានថ្លៃបំផុត មានតម្លៃដល់ទៅ ៤០លានយន់ ឬប្រមាណ ៥.៦ លានដុល្លារអាមេរិក។
ដ្បិតមានរូបភាពវិជ្ជមានបែបនេះក្ដី តែការបង្ក្រាបនេះបានកើតឡើង នៅពេលដែលទីក្រុងប៉េកាំងប្រកាសពីយុទ្ធនាការបោសសម្អាតប្រព័ន្ធអ៊ឺនធឺណិត ដោយកាលពីឆ្នាំ ២០១៨ អ្នកនិពន្ធម្នាក់ ត្រូវបានកាត់ទោសឱ្យជាប់ពន្ធនាគារ ១០ឆ្នាំ ពីបទលក់ចេញប្រលោមលោក Danmei ចំណងជើង Occupy ចំនួន ៧ពាន់ច្បាប់។ អ្នកនិពន្ធល្បីឈ្មោះម្នាក់ទៀត ដែលរកចំណូលបានជាង ១.៨៥ លានយន់ ឬប្រមាណ ២៦ម៉ឺនដុល្លារអាមេរិក បានជាប់ពន្ធនាគារជិត ៥ឆ្នាំ ក្នុងការកាត់ក្ដីជាមួយនឹងអ្នកនិពន្ធ ៥០ នាក់ទៀត កាលពីចុងឆ្នាំ ២០២៤។

អ្នកនិពន្ធជាច្រើនបានចេញមកនិយាយ ក្នុងទិសដៅតែមួយថា ការចាប់ខ្លួននេះ បានបំផ្លាញជីវិតរបស់ខ្លួនតាំងតែពីវ័យក្មេង និងនាំយកភាពអាម៉ាស់ដល់ខ្លួនឯង និងគ្រួសារ។ អ្នកនិពន្ធម្នាក់រៀបរាប់ថា ខ្លួនត្រូវបានប៉ូលីសចូលទៅចាប់ ទាំងដែលកំពុងអង្គុយរៀននៅក្នុងថ្នាក់ ស្របពេលដែលអ្នកនិពន្ធម្នាក់ទៀត និយាយថា ប៉ូលីសបានបង្ខំឱ្យខ្លួនដោះខោអាវ ដើម្បីធ្វើការត្រួតពិនិត្យ។
ទន្ទឹមគ្នានេះ អ្នកនិពន្ធជាច្រើនរូបទៀតបានរៀបរាប់ពីការតស៊ូរបស់ខ្លួន ដែលខិតខំសន្សំពាក្យម្ដងមួយពាក្យៗ បង្កើតជាសាច់រឿង ដើម្បីរកចំណូល។ បុគ្គលម្នាក់ដែលបានធ្វើការជាអ្នកនិពន្ធប្រលោមលោកប្រភេទនេះអស់ពេលជាង ២០ឆ្នាំមកហើយ បានបង្ហាញជំហររបស់ខ្លួនថា៖ “នេះជាវិធីសាស្រ្តដែលខ្ញុំអាចស្វែងរកក្ដីសុខឱ្យខ្លួនឯង។ ខ្ញុំមិនអាចបោះបង់ចោលទំនាក់ទំនងដែលខ្ញុំបានកសាងជាមួយសហគមន៍នោះទេ”៕


























Account
Security
Favourite Content