បន្ទាប់ពីបានបង្កើតភាពភ្ញាក់ផ្អើលខ្លាំងជាមួយបញ្ជីឈ្មោះតារាកំពូលៗដែលនឹងរួមគ្នាសម្ដែងក្នុងរឿងថ្មីរបស់អ្នកដឹកនាំម្ចាស់ពានអូស្កា Christopher Nolan ទីបំផុតគម្រោងនេះក៏បានបង្ហាញព័ត៌មានលម្អិតឱ្យទស្សនិកជនកាន់តែរំភើបថែមទៀត។ ផ្អែកតាមរបាយការណ៍ចុងក្រោយ ភាពយន្តថ្មីនេះនឹងមានចំណងជើងថា “The Odyssey” ជាខ្សែភាពយន្តនិយាយអំពីរឿងរ៉ាវកើតឡើងក្នុងប្រទេសក្រិកសម័យបុរាណកាលពីប្រហែល ៨០០ ឆ្នាំមុន ដោយប្រើបច្ចេកទេសផលិត IMAX ចុងក្រោយបង្អស់។
“The Odyssey” ប្រាប់រឿងរ៉ាវនៃការធ្វើដំណើរត្រលប់ទៅផ្ទះវិញរយៈពេល ១០ ឆ្នាំរបស់វីរបុរសក្រិកឈ្មោះ Odysseus ដែលបានជួបប្រទះគ្រោះថ្នាក់ផ្សេងៗជាច្រើន បន្ទាប់ពីចុងបញ្ចប់នៃសង្រ្គាម Trojan និងការដួលរលំនៃទីក្រុង Troy។ សាច់រឿងនេះដែរបានក្លាយជាបទកំណាព្យដ៏ល្បីមួយដែលត្រូវបានគេចាត់ទុកថាជាគ្រឹះដ៏សំខាន់សម្រាប់អក្សរសិល្ប៍ទំនើបរបស់លោកខាងលិច។ ដូច្នេះហើយអ្នកគាំទ្រកាន់តែរំភើបថែមទៀតនៅពេលដឹងថាសាច់រឿងនេះនឹងបានរំលេចខ្លួនលើផ្ទាំងសំពត់សតាមរយៈស្នាដៃអ្នកដឹកនាំរឿង Christopher Nolan ដែលធ្លាប់ទទួលបានភាពល្បីល្បាញតាមរយៈការផលិតខ្សែភាពយន្តដ៏អស្ចារ្យជាច្រើនដូចជា Oppenheimer, Interstellar, The Dark Knight, Inception និង Dunkirk ។
យោងតាមរបាយការណ៍កន្លងមក គម្រោងភាពយន្តមួយនេះនឹងមានការចូលរួមពីតារាសម្តែងល្បីៗរួមមាន Tom Holland, Matt Damon, Anne Hathaway, Zendaya, Robert Pattinson, Lupita Nyong’o និង Charlize Theron ប៉ុន្តែថាតើអ្នកណានឹងដើរតួអង្គអ្វីខ្លះនោះ គឺមិនទាន់មានការបញ្ជាក់លម្អិតនៅឡើយទេ ស្របពេលដែលកាលបរិច្ឆេទចេញបញ្ចាំងតាមរោងភាពយន្តត្រូវបានកំណត់នៅថ្ងៃទី ១៧ ខែកក្កដា ឆ្នាំ ២០២៦។ ចង់ដឹងថាគម្រោងភាពយន្តនេះនឹងអស្ចារ្យយ៉ាងណានោះមានតែរង់ចាំតាមដានទាំងអស់គ្នា ៕