នារាត្រីថ្ងៃទី ១៧ ខែតុលា ឆ្នាំ ២០២៥ កន្លងទៅ មហោស្រពភាពយន្តខ្លីចតុមុខ ហៅកាត់ថា CSFF លើកទី ១៤ បានរៀបចំការបើកជាផ្លូវការនូវកម្មវិធីរបស់ខ្លួន ដើម្បីត្រៀមបង្ហាញស្នាដៃផលិតខ្សែរឿងដែលលេចធ្លោ និងសក្ដិសមជាម្ចាស់ជយលាភីក្នុងជំនាន់ថ្មីនេះ។


មហោស្រពភាពយន្តខ្លីចតុមុខ បានវិលត្រឡប់មកជាថ្មីម្ដងទៀតក្នុងឆ្នាំ ២០២៥ ជាមួយស្នាដៃភាពយន្តពីបណ្ដាផលិតករជំនាន់ក្រោយដែលហូរហៀរដោយសមត្ថភាព និងគំនិតច្នៃប្រតិដ្ឋ។ គួរបញ្ជាក់ឱ្យដឹងថា នៅក្នុងជំនាន់ថ្មីនេះ CSFF ទទួលបានស្នាដៃភាពយន្តរហូតដល់ទៅ ១៩៦ រឿងពីអ្នកផលិតទាំងក្នុងនិងក្រៅស្រុក។
ដោយឡែក ភាពយន្តសរុប ៧៧ រឿងត្រូវបានជ្រើសរើសសម្រាប់ចាក់បញ្ចាំង ដោយក្នុងនោះ ៤១ រឿងត្រូវបានដាក់ចូលប្រកួត (២០ រឿងក្នុងស្រុក និង ២១ រឿងបរទេស) ។ យ៉ាងណាមិញ ទោះបីជាចំនួនស្នាដៃសរុបមានការថយចុះបន្តិចបន្តួចក៏ដោយ តែគុណភាពផលិតកម្មត្រូវបានកែលម្អគួរឱ្យកត់សម្គាល់។ ភាគច្រើននៃស្នាដៃរបស់ផលិតករដែលបានដាក់ស្នាដៃចូលរួមប្រកួតមានលក្ខណៈចម្រុះបែបជារឿងរ៉ាវផ្ទាល់ខ្លួន និងមានការសង្កត់ធ្ងន់ខ្លាំងលើរឿងរ៉ាវដែលទាក់ទងជីវិត និងសុខភាពផ្លូវចិត្ត។
គួរបញ្ជាក់បន្ថែមថា ក្រោយបញ្ចប់ការបើកជាផ្លូវការទស្សនិកជនអាចចូលរួមទស្សនាដោយឥតគិតថ្លៃនៅតាមទីតាំងនិងកាលបរិច្ឆេទចាក់បញ្ចាំងដែលមានការអាប់ដេតជាបន្តបន្ទាប់នៅលើផេកផ្លូវការរបស់ Chaktomuk Short Film Festival ៕






រូបភាព ផ្ដល់ជូនដោយ Chaktomuk Short Film Festival

























Account
Security
Favourite Content