សាស្ត្រាចារ្យ Koichi Shimizu នៃសាកលវិទ្យាល័យ Osaka ប្រទេសជប៉ុន បានចែករំលែកថា ប្រសិនបើឪពុកម្តាយចិញ្ចឹមកូនបានល្អ នោះពួកគេនឹងអាចរកប្រាក់ចំណូលបានខ្ពស់ និងមិនមានភាពភ័យខ្លាចចាញ់ក្នុងការប្រកួតប្រជែងផ្នែកហិរញ្ញវត្ថុឡើយ។ អាស្រ័យហេតុនេះ លោកក៏បានចង្អុលបង្ហាញនូវជំនាញសាមញ្ញៗតែសំខាន់ចំនួន ៣ ដែលឪពុកម្តាយត្រូវបង្រៀនកូនរបស់ពួកគេឱ្យបានឆាប់ ដើម្បីជាអត្ថប្រយោជន៍ជាប់ខ្លួនពួកគេនៅពេលក្រោយ។
១. បង្រៀនកូនឱ្យចេះម្ចាស់ការខ្លួនឯង
ប្រសិនបើកុមារអាចគ្រប់គ្រងខ្លួនឯងបាន ពួកគេនឹងអាចធ្វើការសម្រេចចិត្តសមស្រប និងដោះស្រាយបញ្ហាស្ត្រេសក្នុងជីវិតប្រចាំថ្ងៃតាមរបៀបដ៏ល្អបំផុតដើម្បីទទួលបានលទ្ធផលវិជ្ជមាន។
ឪពុកម្តាយគួរជួយកូនបង្កើតទម្លាប់ល្អ ចាប់ពីការស្លៀកពាក់ ហូបចុក ចូលគេង និងភ្ញាក់ពីគេងទាន់ពេល… ដើម្បីឱ្យពួកគេមានម្ចាស់ការលើខ្លួនឯងតាំងពីក្មេងទៅ។ សាស្ត្រាចារ្យ Shimizu ក៏បានចង្អុលបង្ហាញថា អាកប្បកិរិយា ការនិយាយ និងរបៀបដើររបស់ឪពុកម្តាយមានឥទ្ធិពលយ៉ាងខ្លាំងទៅលើអាកប្បកិរិយា ទម្លាប់របស់កូន។ ដូច្នេះ មាតាបិតាគួរធ្វើជាគំរូល្អសម្រាប់កូនៗទាំងអាកប្បកិរិយា របៀបគ្រប់គ្រងកំហឹង និងការនិយាយស្ដី។
២. បង្រៀនកូនឱ្យចេះសន្សំ
ការសន្សំគឺជាទម្លាប់សំខាន់បំផុតក្នុងជីវិត។ ឪពុកម្តាយគួរតែចិញ្ចឹមកូនៗរបស់ពួកគេដោយទម្លាប់នៃការសន្សំ និងការដឹងគុណចំពោះលុយ ក៏ដូចជាកម្លាំងពលកម្មរបស់មនុស្សគ្រប់គ្នាតាំងពីតូចមក។ ដូច្នេះហើយ កូនៗនឹងជៀសផុតពីការចាយវាយខ្ជះខ្ជាយ សប្បាយហួស ខ្ជិលធ្វើការ និងទម្លាប់ដែលចង់តែទទួល តែមិនចង់ផ្តល់។
កុមារដែលមានទម្លាប់សន្សំប្រាក់នឹងដឹងពីរបៀបខិតខំប្រឹងប្រែង និងប្រើប្រាស់សមត្ថភាពរបស់ពួកគេដើម្បីធ្វើការ និងលះបង់ខ្លួនឯង។ មិនតែប៉ុណ្ណោះ ការសន្សំក៏ជួយឱ្យកុមារបង្កើន ស្មារតីរឹងប៉ឹងដែលមិនចុះចាញ់ពេលជួបនឹងការលំបាកផងដែរ។
៣. បង្រៀនកូនឱ្យចេះអត់ធ្មត់
សេដ្ឋវិទូ Gary Baker មានពាក្យមួយឃ្លាថា ទ្រព្យសម្បត្តិបង្រៀនមនុស្សឱ្យវិនិយោគពេលវេលា និងភាពអត់ធ្មត់។ ពោលគឺ ភាពក្រីក្រកើតចេញពីការមិនអត់ធ្មត់ ដែលធ្វើឱ្យមនុស្សមិនមានការតស៊ូគ្រប់គ្រាន់ដើម្បីខំប្រឹងធ្វើការ រៀនសូត្រ ឬកែប្រែខ្លួនឱ្យល្អប្រសើរទេ។
នៅក្នុងក្រសែភ្នែកមនុស្សដែលគ្មានការអត់ធ្មត់ ពិភពលោកតែងតែភ្ជាប់ជាមួយនឹងពាក្យថា “បោះបង់” នៅពេលណាដែលវាត្រូវការពេលយូរជាងការរំពឹងទុក។ បាត់បង់ការអត់ធ្មត់ ពួកគេក៏បាត់បង់ឱកាសជាច្រើនក្នុងជីវិតផងដែរ។ ដូច្នេះហើយ បើចង់ឱ្យកូនៗរបស់អ្នកទទួលបានជោគជ័យនៅថ្ងៃអនាគត និងមានអាជីពមានស្ថេរភាព ឪពុកម្តាយគួរតែបង្ហាត់កូនឱ្យចេះអត់ធ្មត់ ៕