តារាចម្រៀងសំឡេងស្រទន់ គូម៉ា ដែលបានរៀបមង្គលការជាមួយតារាសម្ដែង ម៉ៅ គឹមធីតា កាលពីឆ្នាំមុន ត្រៀមទទួលសមាជិកបន្ថែមក្នុងគ្រួសារ។ ថ្មីៗនេះដែរម្ចាស់បទ «បំណងចុងក្រោយ» បានអបអរខួបស្នេហា ៨ ឆ្នាំដែលខ្លួន និងភរិយា ម៉ៅ គីមធីតា បានឆ្លងកាត់មកជាមួយគ្នា យ៉ាងផ្អែមល្ហែម។
ថ្មីៗនេះ គូម៉ា បានបង្ហោះរូប សម្រាប់ ៨ ឆ្នាំដែលចាប់ផ្ដើមស្រលាញ់ និងចាប់ដៃគ្នារៀបការសាងគ្រួសារដ៏មានសុភមង្គល។ ម្ចាស់បទ «សន្យាបានទេ គ្មានបងកុំយំ» បានសរសេរសារលើបណ្ដាញសង្គមថា “16.01.2017 ដល់16.01.2025 គឺ8ឆ្នាំហើយ រីករាយថ្ងៃកំណើតប្រពន្ធសម្លាញ់ បងសូមជូនពរអូន និងកូនក្នុងផ្ទៃ មានសុខភាពល្អ មានសម្រស់កាន់តែស្រស់ស្អាត ជួបតែសេចក្ដីសុខ ប្រាថ្នាអ្វីបានសម្រេចដូចបំណង អរគុណប្រពន្ធសម្លាញ់ដែលចូលរួមដំណើរក្នុងជីវិតជាមួយបងតាំងពីដំបូងរហូតមកដល់ពេលនេះ ហើយយើងនិងបន្តដើរទៅមុខជាមួយគ្នាបន្តទៀត កាដូដ៏ធំបំផុតសម្រាប់ពួកយើងពេលនេះ គឺកូនប្រុសយើង បាហ៊ូ ដែលត្រៀមនឹងសម្រាលក្នុងពេលឆាប់ៗខាងមុខនេះ ប្ដីអរគុណប្រពន្ធគ្រប់យ៉ាង បងស្រលាញ់អូនប្រពន្ធសម្លាញ់”។
អ្នកគាំទ្រ អបអរដល់ស្វាមីភរិយា ប៊ុត ជំនោ ហៅ គូម៉ា និង ម៉ៅ គឹមធីតា ទោះស្ងាត់មួយរយៈពីវិស័យសិល្បៈ ប៉ុន្តែនៅតែស្រសស្អាតដដែល។ គួរបញ្ជាក់ថា គូម៉ា ដឹកដៃគូស្នេហ៍ ម៉ៅ គឹមធីតា ដែលជាតារាសម្ដែង រៀបការតាមប្រពៃណីខ្មែរ នាព្រឹកថ្ងៃទី៣ ខែឧសភា ឆ្នាំ ២០២៤ កន្លងទៅនេះ។ អ្នកទាំង ២ បានពុះពារឧបសគ្គ ជាច្រើនទម្រាំបានរៀបការពេញមុខមាត់ តាមបែបប្រពៃណី។
ម៉ៅ គឹមធីតា ជាអតីតបេក្ខនារីពេជ្រកំពុងច្នៃ ឆ្នាំ ២០១៣ នៅ ស្ថានីយទូរទស្សន៍អាស៊ីអាគ្នេយ៍ផ្នែកដើរម៉ូដ និងជាប់ចំណាត់ថ្នាក់លេខមួយ។ ក្រោយជាប់ក្នុងកម្មវិធី ធីតា បានសម្ដែងរឿង ដើរបង្ហាញម៉ូដ និងថត MV បទចម្រៀងជាច្រើន៕
រូបភាព៖ Pom Pom