កាលពីពេលថ្មីៗនេះ Nayeon សមាជិកក្រុមចម្រៀងនារីខេប៉ុប TWICE ត្រូវបានគេរាយការណ៍ថាបានទិញលំនៅដ្ឋានលំដាប់អភិជននៅក្នុងអគារ ‘Brighton N40’ ដែលមានទីតាំងនៅតំបន់ Nonhyeon-dong សង្កាត់ Gangnam-gu ទីក្រុងសេអ៊ូល។
សេចក្ដីរាយការណ៍ពី Allkpop បានឱ្យដឹងថា Nayeon បានទិញអាផាតមិនយូនីតទំហំ ១២៨ ម៉ែត្រការ៉េ ក្នុងតម្លៃប្រហែល ៤ ពាន់លានវ៉ុន (ប្រហែល ២,៧ លានដុល្លារ) ក្នុងខែឧសភា ឆ្នាំ ២០២៤ ។ រយៈពេលប្រាំថ្ងៃបន្ទាប់ពីការបញ្ចប់ការទិញ នាងទទួលបានអ្នកជួលម្នាក់ជាមួយនឹងប្រាក់កក់ ២៨០០ លានវ៉ុន (ប្រហែល ១,៩ លានដុល្លារ) ដែលមានន័យថានាងបានវិនិយោគអចលនទ្រព្យប្រកបដោយប្រសិទ្ធភាព ដោយចំណាយលុយត្រឹម ៨ សែនដុល្លារ។
សាងសង់ក្នុងឆ្នាំ ២០២២ គម្រោង ‘Brighton N40’ គឺជាអគារអាផាតមិនប្រណិតដែលមានអគារចំនួន ៥ ដែលមាន ១៤៨ យូនីត ចាប់ពីជាន់ទី ៥ ដល់ជាន់ទី ១០ និងត្រូវបានទទួលស្គាល់សម្រាប់ប្រព័ន្ធសុវត្ថិភាពខ្ពស់ជាងធម្មតាបីដង ដែលធានាបាននូវភាពឯកជន និងសុវត្ថិភាពសម្រាប់អ្នករស់នៅ។ អចលនទ្រព្យនេះត្រូវបានរចនាឡើងដោយស្ថាបត្យករដ៏ល្បីល្បាញលើពិភពលោក Jean-Michel Wilmotte ដែលបានរួមចំណែកក្នុងការរៀបចំទេសភាពផងដែរ។
អគារនេះបានទាក់ទាញអ្នករស់នៅលំដាប់អភិជន និងបុគ្គលល្បីជាច្រើននាក់រួមមានពិធីករ Yoo Jae Suk ដែលជាម្ចាស់ផ្ទះ Penthouse, Hoshi ក្រុម Seventeen តារាសម្ដែង Han Hyo Joo និង Oh Yeon Seo និង L ក្រុម Infinite ជាដើម ៕