ជាការពិតក្នុងជីវិតគ្មានមនុស្សណាម្នាក់ដែលមិនប្រាថ្នាចង់រស់នៅក្នុងជីវិតមួយពោរពេញទៅដោយក្ដីសុខ ហើយមានរឿងរីករាយច្រើនជាងបញ្ហានោះទេ។ ចំពោះមូលហេតុដែលធ្វើឱ្យជីវិតជួបសេចក្ដីសុខនោះគឺមានច្រើនទៅតាមស្ថានភាពរបស់មនុស្សរៀងៗខ្លួន។ យ៉ាងណាមិញ ក្នុងចំណោមនោះក៏មានរបស់ ៣ យ៉ាងដែលមនុស្សគ្រប់គ្នាគួរតែមានហើយរក្សាឱ្យល្អ៖
១. ក្ដីស្រឡាញ់
មនុស្សយើងទោះរីករាយ ឬមានទ្រព្យសម្បត្តិច្រើនប៉ុណ្ណាក៏មិនរស់នៅដោយគ្មានក្ដីស្រឡាញ់បានដែរ។ កន្លងមកអាចនិយាយបានថាយើងប្រើពាក្យថាស្រឡាញ់ចំពោះអ្នកផ្សេងច្រើនជាជាងចំពោះខ្លួនឯង។ ដូច្នេះមុននឹងប្រគល់ក្ដីស្រឡាញ់ឱ្យអ្នកផ្សេង ត្រូវតែប្រាកដចិត្តថាយើងស្រឡាញ់ខ្លួនឯងគ្រប់គ្រាន់ហើយ មើលថែទាំខ្លួនឯងបានល្អហើយទើបមិនធ្វើឱ្យជីវិតជួបភាពលំបាកនៅពេលខាងមុខ។
២. ស្នាមញញឹម
ជឿជាក់ថាមិនមានអ្នកណាម្នាក់ដែលអាចញញឹមបានរៀងរាល់ថ្ងៃនោះទេ ពោលគឺត្រូវតែជួបបញ្ហារៀងៗខ្លួន។ ក្នុងបច្ចុប្បន្នមានមនុស្សជាច្រើនជួបប្រទះនឹងបញ្ហា ភាពតានតឹងច្រើនរហូតធ្វើឱ្យខ្លួនឯងភ្លេចបង្កើតស្នាមញញឹមទៅហើយ។ យ៉ាងណាត្រូវគិតបកមកវិញថាការបង្កើតស្នាមញញឹមបានច្រើនគឺរឿងដែលមានសិរីសួស្ដី ថែមទាំងអាចទាញយករឿងល្អៗចូលមកក្នុងជីវិតបានច្រើនទៀតផង។ ដូច្នេះទោះបីជាជួបឧបសគ្គខ្លាំងប៉ុណ្ណា ត្រូវរក្សាស្នាមញញឹមហើយតស៊ូជម្នះទៅមុខបន្ដទៀត។
៣. សុខភាព
ក្នុងការរស់នៅរបស់យើងជាពិសេសមនុស្សស្រី មិនថាក្នុងកាលៈទេសៈណាទេភាពស្រស់ស្អាតគឺអាទិភាពសំខាន់បំផុត។ ប៉ុន្តែមុននឹងដល់សម្រស់ ការថែទាំសុខភាពឱ្យបានល្អទើបជារឿងដ៏សំខាន់យ៉ាងពិតប្រាកដ។ ការថែទាំសុខភាពល្អ និងរក្សារូបសម្រស់ឱ្យបានស្អាតមិនមែនដើម្បីតម្រូវចិត្តអ្នកណាម្នាក់ឡើយ តែនេះគឺជាការឱ្យតម្លៃទៅជីវិតខ្លួនឯងឱ្យរស់នៅមានក្ដីសុខបានយូរអង្វែង៕