ផាសិន ឬក្រូចវល្លិជាផ្លែឈើរដូវក្តៅដែលមានការពេញនិយមដែរ។ នៅខែដែលសម្បូរផ្លែផាសិន វាមានទាំងរសជាតិឆ្ងាញ់ និងតម្លៃថោក អ្នកគួរតែទាញយកអត្ថប្រយោជន៍ពីផ្លែឈើនេះមកធ្វើជាភេសជ្ជៈ។ ការទទួលទានទឹកផាសិនមួយកែវក្នុងមួយថ្ងៃ មិនត្រឹមតែនាំមកនូវរសជាតិប៉ុណ្ណោះទេ ថែមទាំងបន្ថែមសារធាតុចិញ្ចឹមដល់រាងកាយ ជួយបំប៉នស្បែក ប្រឆាំងភាពចាស់ និងរក្សារាងស្លីម។
១. ទឹកផាសិន និងស្វាយក្រឡុក

គ្រឿងផ្សំ ៖ ផាសិន ២ ផ្លែ, ស្វាយទុំ ១ ផ្លែ, ទឹកដោះគោសាប ២០០ មីលីលីត្រ, យ៉ាអួរគ្មានជាតិស្ករ ១ ប្រអប់។
វិធីធ្វើ ៖ ចិតសំបកស្វាយទុំរួចហាន់ជាចំណិតតូចៗ។ ផាសិនកាត់ជាពាក់កណ្តាលឆ្កឹះយកគ្រាប់។ ដាក់ផ្លែស្វាយ ទឹកដោះគោសាប យ៉ាអួរចូលក្នុងម៉ាស៊ីន រួចចុចក្រឡុក។ ចំពោះផាសិន បើអ្នកមិនចូលចិត្តគ្រាប់ទេ អាចយកទៅត្រងយកតែទឹកបានហើយ។
២. ទឹកផាសិន និងចេកក្រឡុក

គ្រឿងផ្សំ ៖ ផាសិន ២ ផ្លែ, ចេក ២ ផ្លែ, យ៉ាអួរគ្មានជាតិស្ករ ១ កំប៉ុង, និងទឹកដោះគោសាប ២០០ មីលីលីត្រ។
វិធីធ្វើ ៖ បកសំបកចេកហើយកាត់ជាដុំតូចៗ។ កាត់ផាសិនជាពាក់កណ្តាល ឆ្កឹះយកគ្រាប់ដាក់មួយឡែក។ ដាក់គ្រឿងផ្សំទាំងអស់ចូលក្នុងម៉ាស៊ីនហើយក្រឡុក។
៣. ទឹកផាសិនក្រឡុកជាមួយយ៉ាអួរ

គ្រឿងផ្សំ ៖ ផាសិន ២ ទៅ ៣ ផ្លែ, យ៉ាអួរ ១ ទៅ ២ កំប៉ុង, ទឹកដោះគោសាប ១០០ មីលីលីត្រ, និងទឹកឃ្មុំ ១ ទៅ ២ ស្លាបព្រាកាហ្វេ។
វិធីធ្វើ ៖ ពុះផាសិនជាពាក់កណ្តាល ឆ្កឹះយកគ្រាប់ដាក់ដោយឡែក។ ដាក់ផាសិន ទឹកដោះគោ យ៉ាអួរ និងទឹកឃ្មុំចូលក្នុងម៉ាស៊ីន រួចក្រឡុក។
អត្ថប្រយោជន៍សុខភាពមួយចំនួនដែលទទួលបានពីផ្លែផាសិន៖
- ជួយឱ្យស្បែកស្អាត
ផ្លែផាសិនផ្តល់នូវបរិមាណវីតាមីន A ច្រើនក្រៃលែង។ នេះគឺជាសារធាតុចិញ្ចឹមដ៏សំខាន់ដែលមិនត្រឹមតែល្អសម្រាប់ភ្នែកប៉ុណ្ណោះទេ ថែមទាំងផ្តល់អត្ថប្រយោជន៍ផ្នែកសម្រស់សម្រាប់ស្បែកផងដែ។ សារធាតុប្រឆាំងអុកស៊ីតកម្មនៅក្នុងផ្លែផាសិន ដូចជា វីតាមីន C, Riboflavin, carotene ក៏ជួយលើកកម្ពស់សុខភាពស្បែក និងបន្ថយដំណើរការនៃភាពចាស់ផងដែរ។
- ជំរុញការសម្រកទម្ងន់
ផ្លែផាសិនមានកាឡូរី ខ្លាញ់ និងសូដ្យូមទាប។ នៅក្នុងផ្លែផាសិន ១០០ ក្រាមមានកាឡូរីត្រឹមតែ ៩៧ កាឡូរីប៉ុណ្ណោះ ប៉ុន្តែមានជាតិសរសៃច្រើន។ វានឹងជួយបំពេញក្រពះ ធ្វើឱ្យឆាប់ឆ្អែត កាត់បន្ថយការឃ្លាន។ ហេតុនេះហើយ ទើបផាសិនអាចជួយសម្រកទម្ងន់បាន។ លើសពីនេះ ទឹកមួយកែវដែលមានផ្លែផាសិន ២៥ ក្រាមអាចផ្តល់ជាតិសរសៃ ២ ក្រាមហើយភាគច្រើនជាជាតិសរសៃរលាយ។ ជាតិសរសៃរលាយដើរតួជាថ្នាំបញ្ចុះលាមក ជួយសម្រួលចលនាពោះវៀន ការពារការទល់លាមក និងកាត់បន្ថយកូលេស្តេរ៉ុលបាន។
- កាត់បន្ថយភាពតានតឹង
ផាសិនមានប៉ូតាស្យូម និងហ្វូឡាត ដែលជួយពង្រឹងដល់សុខភាពខួរក្បាល និងភាពធុញថប់។ ប៉ូតាស្យូមមានប្រសិទ្ធភាពគ្រប់គ្រងចរន្តឈាម និងបង្កើនការយល់ដឹង។ ទន្ទឹមនឹងនេះ សារធាតុ Folate ក៏ជួយបង្កើនការចងចាំផងដែរ។
- ជួយឱ្យគេងលក់ស្រួល
អ្នកដែលមានបញ្ហាដំណេកគួរតែញ៉ាំផ្លែផាសិនជាប្រចាំ។ វាផ្ទុកសារធាតុអាល់កាឡូអ៊ីតដែលជួយរម្ងាប់អារម្មណ៍ បំបាត់ការឈឺចាប់ កាត់បន្ថយភាពធុញថប់ ហើយធ្វើឱ្យគេងលក់ស្កប់ស្កល់៕


























Account
Security
Favourite Content