Liu Yifei ទម្លាយថា ការថែរក្សាសម្រស់ឱ្យក្មេងជាងវ័យរបស់នាង មានមួយផ្នែកធំមកពីការហាត់ប្រាណ ខណៈតារាស្រីវ័យ ៣៨ឆ្នាំបានចែករំលែកបន្តថា នាងព្យាយាមធ្វើលំហាត់ប្រាណឱ្យក្លាយជាទម្លាប់ ជៀសវាងការដាក់សម្ពាធលើខ្លួនឯងជ្រុល។


យោងតាមទស្សនាវដ្ដី ELLE China តារាសម្ដែងជនជាតិចិនរូបនេះបានចែករំលែកថា នាងតែងតែចាប់ផ្ដើមព្រឹកថ្ងៃថ្មីជាមួយនឹងការធ្វើ Aerial Yoga ដែលជាលំហាត់ប្រាណយូហ្គាមួយប្រភេទ ជួយឱ្យរាងកាយអាចបត់បែនបានងាយស្រួលជាងមុន បង្កើនភាពរឹងមាំនៃសាច់ដុំ និងជួយធ្វើឱ្យលំហូរនានានៅក្នុងរាងកាយមានភាពប្រសើរឡើង។ បន្ថែមពីនេះ លំហាត់ប្រាណខាងលើក៏អាចជួយទៅលើរូបសម្រស់ឱ្យមានរូបរាងស្លីម និងស្បែកភ្លឺថ្លាផងដែរ។
លោកវេជ្ជបណ្ឌិត Zhang Wen ពី Shanghai Health and Recovery Center បានឱ្យដឹងបន្ថែមថា៖ “Aerial Yoga នេះ មានគុណសម្បត្តិអាចជួយដុតកាឡូរីក្នុងរាងកាយតាមបែបធម្មជាតិ តែមិនធ្វើឱ្យអ្នកហាត់ឈឺសន្លាក់នោះទេ។ ការហាត់យូហ្គានេះត្រឹម ៣០នាទីក្នុងមួយថ្ងៃ ក៏អាចជួយធ្វើឱ្យអារម្មណ៍ល្អជាងមុន កាត់បន្ថយខ្លាញ់ក្បាលពោះ ក៏ដូចជាជួយទៅលើការគេងផងដែរ”។


បន្ថែមពីយូហ្គា កន្លងមក Liu Yifei ក៏ធ្លាប់បានចែករំលែកនៅលើគណនីបណ្ដាញទំនាក់ទំនងសង្គមផ្ទាល់ខ្លួនដែរថា ជារៀងរាល់យប់ នាងតែងចំណាយពេលប្រមាណ ៥នាទីដើម្បីធ្វើលំហាត់ប្រាណ Planking ល្មមអាចកម្ដៅសាច់ដុំ និងបង្កើនកម្លាំង។
ជាជាងការដាក់សម្ពាធទៅលើរបបអាហារ និងការហាត់ប្រាណដែលធ្ងន់ពេកសម្រាប់រាងកាយ Liu Yifei បានកសាងទម្លាប់នៃការហាត់ប្រាណឱ្យក្លាយជាផ្នែកមួយនៃជីវិតរស់នៅប្រចាំថ្ងៃ ដែលតារាស្រីជឿជាក់ថា វាល្អសម្រាប់សម្រស់ និងរាងកាយ ក៏ដូចជាសុខភាពផ្លូវចិត្ត៕






























Account
Security
Favourite Content