វីតាមីន C គឺជាវីតាមីនសំខាន់មួយទៀតដែលរាងកាយយើងគួរតែទទួលបានគ្រប់គ្រាន់ ព្រោះក្រៅពីជួយពង្រឹងប្រព័ន្ធភាពស៊ាំ ទប់ទល់នឹងជំងឺផ្តាសាយ និងជួយដល់សរសៃឈាមផ្សេងៗ នៅក្នុងរាងកាយរឹងមាំហើយ វាក៏ជួយស្រូបយក collagen នៅក្នុងខ្លួន ជួយឱ្យស្បែកភ្លឺថ្លាផងដែរ។ វីតាមីន C នេះមិនចាំបាច់ទទួលទានជាអាហារបំប៉ននោះទេ ប៉ុន្តែគ្រាន់តែទទួលទានផ្លែឈើដែលសម្បូរវីតាមីន C ក្នុងបរិមាណត្រឹមត្រូវ ក៏គ្រប់គ្រាន់ហើយ។ ដូច្នេះថ្ងៃនេះ AMS សូមលើកយក ផ្លែឈើ ៧មុខ ដែលមិនត្រឹមតែមានរសជាតិឆ្ងាញ់ប៉ុន្តែក៏មានវីតាមីន C ខ្ពស់ដែរ។ ចង់ដឹងមានអ្វីខ្លះ ទៅមើលទាំងអស់គ្នា!
១. ត្របែក
ត្របែកជាផ្លែឈើដែលគេស្គាល់ថាជាស្តេចនៃវីតាមីន C ដោយផ្លែត្របែកមួយផ្លែអាចផ្តល់វីតាមីន C ដល់ទៅ ២២៨ មីលីក្រាម ពោលគឺច្រើនជាងផ្លែក្រូច ៤ ដង។ វាមានសមត្ថភាពជួយពង្រឹងភាពស៊ាំ ប្រឆាំងជំងឺផ្តាសាយ ចិញ្ចឹមស្បែក និងសម្បូរទៅដោយជាតិសរសៃអាហារដែលល្អសម្រាប់ប្រព័ន្ធរំលាយអាហារ។
២. កន្តួតព្រៃ
បន្តទៅទៀតនេះគឺកន្តួតព្រៃ ផ្លែឈើតូច ប៉ុន្តែខ្លាំង មានផ្ទុកវីតាមីន C ដល់ទៅ ៦០០ មីលីក្រាមក្នុង ១០០ ក្រាម មានសមត្ថភាពជួយប្រឆាំងនឹងជំងឺផ្ដាសាយ ព្យាបាលក្អក រំលាយជាតិខ្លាញ់ ចិញ្ចឹមស្បែក និងមានសារធាតុប្រឆាំងអុកស៊ីតកម្មខ្ពស់ផងដែរ។
៣. គីវី
ជាផ្លែឈើពណ៌បៃតងដ៏ឈ្ងុយឆ្ងាញ់ ផ្លែគីវី ១ ផ្លែ ផ្តល់វីតាមីន C ដល់ទៅ ៩៣មីលីក្រាម ជួយពង្រឹងប្រព័ន្ធការពាររាងកាយ បំប៉នភ្នែក និងការពារជំងឺបេះដូង។ វាក៏មានជាតិសរសៃខ្ពស់ដែលល្អសម្រាប់ប្រព័ន្ធរំលាយអាហារផងដែរ។
៤. ផ្លែស្ត្របឺរី
ស្ត្របឺរី ផ្លែឈើពណ៌ក្រហមភ្លឺចែងចាំងនៅក្នុងចិត្តមនុស្សជាច្រើន ក្នុង ១០០ ក្រាម អាចផ្តល់វីតាមីន C ចំនួន ៥៨ មីលីក្រាម ជួយបង្កើនភាពស៊ាំ ចិញ្ចឹមស្បែក ពន្យាភាពចាស់ ថែមទាំងមានសារធាតុប្រឆាំងអុកស៊ីតកម្មខ្ពស់ផងដែរ។
៥. ផ្លែល្ហុង
ផ្លែល្ហុងមិនត្រឹមតែល្អសម្រាប់ជាតិសរសៃខ្ពស់ប៉ុណ្ណោះទេ ប៉ុន្តែក៏ជាផ្លែឈើមួយប្រភេទដែលសម្បូរវីតាមីន C ផងដែរ។ ផ្លែល្ហុង១០០ក្រាមផ្តល់វីតាមីន C ៦១ មីលីក្រាម ជួយពង្រឹងប្រព័ន្ធភាពស៊ាំ ចិញ្ចឹមស្បែក និងជួយឱ្យប្រព័ន្ធរំលាយអាហារដំណើរការបានល្អ។
៦. គូលែន
ផ្លែឈើសាច់ផ្អែមសម្បកពណ៌ក្រហមនេះ ១០០ ក្រាមអាចផ្តល់វីតាមីន C ៧០មីលីក្រាម ជួយពង្រឹងប្រព័ន្ធភាពស៊ាំ ចិញ្ចឹមស្បែក និងធ្វើឱ្យមានអារម្មណ៍ស្រស់ស្រាយបន្ទាប់ពីទទួលទាន។
៧. ក្រូច
បើនិយាយអំពីវីតាមីន C ក្រូចត្រូវតែជាផ្លែឈើកំពូលដែលមនុស្សភាគច្រើនគិតដល់។ ក្រូចមួយផ្តល់វីតាមីន C ដល់ទៅ ៥៣ មីលីក្រាម ហើយមានជាតិសរសៃដែលជួយពង្រឹងប្រព័ន្ធការពាររាងកាយ ចិញ្ចឹមស្បែក និងបំបាត់ការស្រេកទឹក ៕