នៅថ្ងៃទី២៦ ខែមីនា ឆ្នាំ២០២៤ ជាពេលវេលាដែលតារាចម្រៀងស្រី Lee Hyori ថតវគ្គចុងក្រោយរបស់កម្មវិធី The Seasons – Lee Hyori’s Red Carpet។ សម្រាប់ភ្ញៀវកិត្តិយសនៅក្នុងវគ្គចុងក្រោយនេះមានដូចជាតារាចម្រៀង Jeong Mi Jo អតីតពិធីករ Jay Park, Choi Jung Hoon និង បងប្អូនទាំងពីរនាក់ដែលជាសមាជិក AKMU ផងដែរ។
តាមប្រភពខាងក្នុងបានឱ្យដឹងថាអ្នកគាំទ្រជាច្រើនបានស្លៀកសម្លៀកបំពាក់ពណ៌ក្រហមដើម្បីទៅទស្សនាវគ្គចុងក្រោយនៃកម្មវិធីរបស់តារាស្រីរូបនេះ។ ជាមួយគ្នានេះ អំឡុងពេលថតនាងក៏បានប្រាប់អ្នកគាំទ្រថានេះជាថ្ងៃចុងក្រោយហើយ។ មិនត្រឹមប៉ុណ្ណេះ នាងថែមទាំងបានរំឭកដល់ថ្ងៃថតដំបូងដោយថ្ងៃនោះព្រិលបានធ្លាក់ខ្លាំងណាស់។
Lee Hyori បានបន្ដចែករំលែកអ្វីដែលយើងធ្វើមកយូរហើយដល់ពេលបញ្ចប់តែងតែវាហាក់ដូចជាឆាប់រហ័សខ្លាំងណាស់។ ក្រោយពេលចូលថតក្នុងកម្មវិធី The Seasons – Lee Hyori’s Red Carpet ហើយ នាងមានអារម្មណ៍ថាខ្លួនឯងអាចស្ដាប់រឿងជាច្រើនរបស់តារាកិត្តិយស និងរីករាយជាមួយបទចម្រៀងរបស់ពួកគេបានផងដែរ។ ប៉ុន្តែយ៉ាងណាក្ដី ពេលវេលាដែលត្រូវនិយាយលាគ្នាគឺបានមកដល់ហើយ។ សរុបមកវិញនាងបាននិយាយថាប្រសិនបើមានការផ្ដើម នោះតែងតែការបញ្ចប់ដូចគ្នា។
គួររំឭកផងដែរថា Lee Hyori បានចាប់ផ្ដើមថតកម្មវិធីមួយនេះក្នុងខែមករា ឆ្នាំ២០២៤ និងបញ្ចប់ការងារនៅក្នុងខែមីនា ឆ្នាំ២០២៤។ ដូច្នេះពិធីករដែលគ្រោងនឹងចូលកាន់កម្មវិធីនេះបន្ដអាចជាតារាចម្រៀង Zico ៕