ក្នុងនាមជាតារាសម្ដែងដ៏ល្បីល្បាញ ច្បាស់កាលវិភាគរបស់តារាសម្ដែងស្រីចិនល្បីឈ្មោះ Liu Yifei នឹងមមាញឹកបំផុតដែលតម្រូវឱ្យតុបតែងខ្លួន និងធ្វើម៉ូដសក់ជាញឹកញាប់។ ការធ្វើម៉ូដញឹកញាប់ប្រាកដណាស់សុខភាពសក់នឹងចាប់ផ្ដើមខ្សោយដែលបណ្ដាលឱ្យជ្រុះសក់ សំពោង និងបាត់បង់សំណើមជាដើម។ ប៉ុន្តែនេះមិនមែនជាឧបសគ្គសម្រាប់តារាស្រីដែលមានភាពមមាញឹកដូច Liu Yifei ឡើយដោយសារនាងមាន ៣ គន្លឹះសាមញ្ញខាងក្រោម៖

១. មិនកក់សក់ញឹកញាប់ពេក
Liu Yifei ធ្លាប់បាននិយាយថានាងមានទម្លាប់កក់សក់ ២-៣ ដងក្នុងមួយសប្តាហ៍ដើម្បីរក្សាប្រេងធម្មជាតិនៅលើស្បែកក្បាលរបស់នាងដោយអាចជួយឱ្យសក់របស់នាងមានសភាពទន់រលោង មិនងាយបែកចុង និងកាត់បន្ថយការប៉ះពាល់ពីសារធាតុគីំមីដែលមាននៅក្នុងសាប៊ូកក់សក់ផងដែរ។ យ៉ាងណាមិញ វិធីមួយនេះគឺល្អសម្រាប់តែអ្នកដែលមានប្រភេទសក់ស្ងួតតែប៉ុណ្ណោះ ប៉ុន្តែសម្រាប់អ្នកដែលមានសក់ឆាប់ឡើងប្រេងខ្លាំងគួរតែកក់សក់ឱ្យបានញឹកញាប់។

២. ការពារសក់ពីកាំរស្មីយូវី
ជាធម្មតាបន្ទាប់ពីប្រើប្រាស់ផលិតផលហើយ តារាស្រី Liu Yifei តែងពាក់មួកដែលមានគែមធំទូលាយដើម្បីការពារសក់របស់នាងពីការបំផ្លាញដោយកាំរស្មីព្រះអាទិត្យ។ ការប៉ះពាល់ដោយពន្លឺព្រះអាទិត្យនឹងធ្វើឱ្យសក់របស់នាងបាត់បង់សំណើម ស្ងួត និងឆាប់ផុយស្រួយផងដែរ។
៣. ថែទាំសក់ពីខាងក្នុង
បន្ថែមពីការថែទាំងខាងក្រៅ តារាស្រីវ័យ ៣៦ ឆ្នាំរូបនេះក៏មិនភ្លេចការថែទាំសរសៃសក់ពីខាងក្នុងផងដែរ។ នាងតែងតែបញ្ចូលអាហារដែលសម្បូរទៅដោយវីតាមីន សារធាតុបាយអូទីន និងសារធាតុរ៉ែដូចជាបន្លែបៃតង ផ្លែឈើស្រស់ និងទឹកដោះគោជាដើមដើម្បីជួយកាត់បន្ថយភាពស្ងួត និងកម្រិតនៃការបំផ្លាញផ្សេងៗផងដែរ។ លើសពីនេះ នាងក៏បានទទួលទានអាហារដែលសម្បូរដោយអូមេហ្គា ៣ សារធាតុប្រឆាំងអុកស៊ីតកម្ម និងប្រូតេអ៊ីនដើម្បីរក្សាសុខភាពរាងកាយទាំងមូលទៀតផង៕


























Account
Security
Favourite Content