តួឯកប្រុស​ចិនបែរមកលក់បន្លែនៅស្រុកកំណើត ក្រោយ AI ដណ្តើមទីផ្សាររឿងភាគខ្លីសឹងទាំងស្រុង

តារាសម្ដែង Xu Peng បានប្រែប្រួលជីវិតពីការថតកុន ១៥ ម៉ោងក្នុងមួយថ្ងៃ មកជាគ្មានការងារសម្តែងទាល់តែសោះ ហើយបច្ចុប្បន្នបានត្រឡប់ទៅស្រុកកំណើតរបស់លោកនៅតាមជនបទនៃខេត្តសានទុង ដើម្បីធ្វើការនៅផ្សារ។

ការជជែកវែកញែកអំពីបញ្ញាសិប្បនិម្មិត (AI) ដែលមកជំនួសតំណែងការងាររបស់មនុស្ស បាននិងកំពុងកើតមានឡើងយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ ដោយមនុស្សដែលធ្វើការនៅក្នុងវិស័យផ្សេងៗគ្នាជាច្រើន កំពុងប្រឈមមុខនឹងលទ្ធភាពដែលថា ថ្ងៃណាមួយ AI អាចនឹងធ្វើឱ្យការងាររបស់ពួកគេបាត់បង់តម្លៃ។

ក្តីបារម្ភនេះមិនមែនជារឿងដែលគ្មានមូលដ្ឋានទាល់តែសោះនោះទេ។ ជាក់ស្ដែង លោក Xu Peng ដែលជាតារាសម្តែងម្នាក់មកពីវិស័យរឿងភាគខ្លីទម្រង់បញ្ឈរ (Vertical short drama) ដ៏ពេញនិយមរបស់ប្រទេសចិន បានរកឃើញថា សូម្បីតែតារាសម្តែងក៏រងផលប៉ះពាល់ខ្លាំងពីបញ្ហានេះដែរ។

តារាសម្តែងវ័យ ៣០ ឆ្នាំរូបនេះ ជានិស្សិតបញ្ចប់ការសិក្សាពីវិទ្យាស្ថានភូមិន្ទសិល្បៈល្ខោនចិន (Central Academy of Drama) និងបានសាងកេរ្តិ៍ឈ្មោះល្បីល្បាញតាមរយៈការដើរតួជា «ប្រធានក្រុមហ៊ុនម៉ឺងម៉ាត់» ដែលជាតួអង្គទូទៅនៅក្នុងរឿងភាគខ្លី។ ទោះបីជាពីមុនលោកធ្លាប់លេចមុខនៅក្នុងរឿងភាគទូរទស្សន៍វែងៗក៏ដោយ ប៉ុន្តែលោកបានបង្វែរទិសដៅមកផលិតមាតិកាខ្លីៗវិញ ក្នុងអំឡុងពេលដែលរឿងភាគខ្នាតតូច កំពុងផ្ទុះការគាំទ្រខ្លាំងនៅក្នុងប្រទេសកាលពីឆ្នាំ ២០២៥ តាមការណែនាំរបស់អ្នកគាំទ្ររបស់លោក។

ការសម្រេចចិត្តប្តូរទិសដៅនេះទទួលបានផ្លែផ្កាយ៉ាងល្អ ដោយសារសមត្ថភាពសម្តែងដ៏រឹងមាំរបស់លោក បានជួយឱ្យលោកទទួលបានតំណែងជាតួឯកជាបន្តបន្ទាប់។ នៅចំណុចកំពូលនៃប្រជាប្រិយភាពរបស់លោក លោកត្រូវបានគេនិយាយថា ត្រូវថតកុនពី ១៥ ទៅ ១៦ ម៉ោងក្នុងមួយថ្ងៃ ជាមួយនឹងកាលវិភាគការងារដែលណែនណាន់តាន់តាប់។

ទោះជាយ៉ាងណាក៏ដោយ អ្វីៗគ្រប់យ៉ាងបានផ្លាស់ប្តូរស្ទើរតែត្រឹមតែមួយប៉ប្រិចភ្នែក។

ការផលិតកុនដោយប្រើប្រាស់ AI បានកែប្រែទម្រង់ឧស្សាហកម្មមួយនេះលឿនជាងអ្វីដែលគ្រប់គ្នាបានរំពឹងទុក។ របាយការណ៍បានបង្ហាញថា គ្រាន់តែនៅក្នុងត្រីមាសទីមួយនៃឆ្នាំ ២០២៦ នេះ ក្នុងចំណោមរឿងភាគខ្លីប្រហែល ១២៨ ០០០ រឿងដែលត្រូវបានចេញផ្សាយ គឺមានរហូតដល់ទៅប្រហែល ១២២ ០០០ រឿងទៅហើយ ដែលត្រូវបានផលិតឡើងដោយបច្ចេកវិទ្យា AI។ នោះមានន័យថា ស្មើនឹងជាង ៩៥ ភាគរយ នៃរឿងភាគចេញថ្មីទាំងអស់។

ទំនោរនេះបានធ្វើឱ្យបច្ចុប្បន្នលោក Xu Peng ពីមនុស្សម្នាក់ដែលមានការងារកក់ទុកពេញៗ និងមមាញឹកខ្លាំង បានធ្លាក់ខ្លួនមកជាគ្មានការងារសម្តែងទាល់តែសោះ។

បន្ទាប់ពីបានថតបញ្ចប់រឿងភាគខ្លីចុងក្រោយរបស់លោកកាលពីដើមឆ្នាំនេះ លោកបានរៀបចំវ៉ាលី និងសម្ភារផ្ទាល់ខ្លួន ចាកចេញពីទីក្រុងហឹងទៀន ក្នុងខេត្តចឺជាំង ដែលជាមជ្ឈមណ្ឌលផលិតភាពយន្ត និងទូរទស្សន៍ដ៏ធំរបស់ប្រទេសចិន ដើម្បីត្រឡប់ទៅកាន់ស្រុកកំណើតរបស់លោកនៅតាមជនបទក្នុងខេត្តសានទុងវិញ។

ថ្មីៗនេះ លោក Xu Peng ត្រូវបានគេរកឃើញថា កំពុងធ្វើការនៅផ្សារក្នុងស្រុកមួយ ដោយជួយលោកតារបស់លោកលក់បន្លែ។ ពីការសម្តែងនៅពីមុខកាមេរ៉ា ពេលនេះលោកត្រូវបើកបររថយន្តអគ្គិសនីរបស់គ្រួសារទៅកាន់ផ្សារ ដោយត្រូវឈរនៅក្រោមពន្លឺថ្ងៃដ៏ក្តៅដើម្បីលក់កសិផលរបស់ពួកគេ។

សាច់ញាតិមួយចំនួនមានការភ្ញាក់ផ្អើលយ៉ាងខ្លាំងដែលបានឃើញលោកត្រឡប់មកផ្ទះលក់បន្លែបែបនេះ ខណៈដែលអ្នកគាំទ្រមួយចំនួនថែមទាំងបានធ្វើដំណើរមកកាន់ផ្សារ ដើម្បីសុំថតរូបជាមួយលោកទៀតផង។

យោងតាមប្រព័ន្ធផ្សព្វផ្សាយចិន លោក Xu Peng នៅតែរក្សាភាពស្ងប់ស្ងាត់ និងមានការតាំងចិត្តខ្ពស់គួរឱ្យកោតសរសើរ ទោះបីជាមានការផ្លាស់ប្តូរអាជីពយ៉ាងគំហុកបែបនេះក៏ដោយ។

លោកបានចែករំលែកថា៖

«ការធ្វើជាតារាសម្តែងគ្រាន់តែជាមុខរបរមួយប៉ុណ្ណោះ។ ប្រសិនបើគ្មានការងារសម្តែងទេ ខ្ញុំនឹងស្វែងរកផ្លូវផ្សេងទៀតដើម្បីចិញ្ចឹមជីវិត។ ដរាបណាខ្ញុំរកចំណូលបានដោយភាពស្មោះត្រង់តាមរយៈការខិតខំប្រឹងប្រែងរបស់ខ្លួនឯង វានឹងគ្មានឧបសគ្គណាដែលខ្ញុំមិនអាចជម្នះបានឡើយ»។

លោកក៏បាននិយាយផងដែរថា សម្រាប់រូបលោក វាមិនមែនជាការចាកចេញពិតប្រាកដពីវិស័យកម្សាន្តនោះទេ ប៉ុន្តែវាគ្រាន់តែជាការផ្លាស់ប្តូរឆាកសម្តែងតែប៉ុណ្ណោះ។ លោកបានបន្ថែមថា៖ «ទោះបីជាមុខរបររបស់ខ្ញុំផ្លាស់ប្តូរ ក៏ខ្ញុំនៅតែជាមនុស្សម្នាក់ដដែល»។

មែនទែនទៅ លោក Xu Peng មិនមែនជាតារាសម្តែងតែម្នាក់ ដែលការងារត្រូវរងការរំខានដោយសារការរីកដុះដាលនៃ AI នៅក្នុងវិស័យរបស់ខ្លួននោះទេ។ យោងតាមរបាយការណ៍ថ្មីៗនេះ រឿងភាគខ្លីដែលបង្កើតឡើងដោយ AI បានជះឥទ្ធិពលដល់ការងារជិតពីរលានកន្លែង នៅទូទាំងឧស្សាហកម្មរឿងភាគខ្លីរបស់ប្រទេសចិន។

តារាសម្តែងរឿងភាគខ្លីលំដាប់កំពូល ធ្លាប់អាចរកចំណូលបានរហូតដល់ ២០ ០០០ យ័ន (ប្រហែល ២៩៤០ ដុល្លារអាមេរិក) ក្នុងមួយថ្ងៃ ប៉ុន្តែបច្ចុប្បន្ន មនុស្សជាច្រើនកំពុងជួបការលំបាកក្នុងការស្វែងរកការងារធ្វើ សូម្បីតែក្នុងតម្លៃ ១២០០ យ័នក្នុងមួយថ្ងៃក៏ដោយ។

បច្ចេកវិទ្យា AI ត្រូវបានបញ្ចូលទៅក្នុងស្ទើរតែគ្រប់ដំណាក់កាលនៃការផលិត ចាប់តាំងពីការបង្កើតស្គ្រីប ការបង្កើតគំរូតួអង្គ រហូតដល់ការកាត់តវីដេអូ។ ជាលទ្ធផល រឿងភាគខ្លីដែលបង្កើតឡើងដោយ AI អាចត្រូវបានបញ្ចប់នៅក្នុងរយៈពេលត្រឹមតែពីរបីថ្ងៃប៉ុណ្ណោះ ជាមួយនឹងការចំណាយត្រឹមតែមួយចំណែកតូច បើប្រៀបធៀបទៅនឹងការផលិតដោយប្រើប្រាស់មនុស្សពិតៗ។

ទោះបីជាមានការផ្លាស់ប្តូរដ៏ខ្លាំងក្លានៅក្នុងឧស្សាហកម្មនេះក៏ដោយ ក៏លោក Xu Peng បានសម្រេចចិត្តថា លោកនឹងមិនដើរចេញពីឆាកសម្តែងក្នុងពេលឆាប់ៗនេះទេ។ លោកមានគម្រោងបើកដំណើរការកម្មវិធីបណ្តុះបណ្តាលការសម្តែង ព្រមទាំងបន្តបង្កើតរឿងភាគខ្លីដែលសម្តែងដោយមនុស្សពិតៗ ដោយសង្ឃឹមថានឹងអាចរក្សាភាពស្មោះត្រង់ចំពោះក្តីស្រមៃក្នុងការសម្តែងរបស់ខ្លួន។

ចំពោះសំណួរថាតើ AI ជាការគំរាមកំហែងនៅក្នុងឧស្សាហកម្មច្នៃប្រឌិតនេះដែរឬទេ? លោកបានឆ្លើយតបថា វាពិតជាជារឿងមួយដែលពិបាកនឹងមើលរំលងណាស់ ៕



របាយការណ៍ថ្មីៗ

មើលទាំងអស់ ➧

អត្ថបទកម្សាន្ត

មើលទាំងអស់ ➧

បុរសសិង្ហបុរីវ័យ ៦០ ឆ្នាំប្រើកន្ត្រៃកាត់ក្រចកប៉ុនប៉ងប្លន់ស្ត្រីម្នាក់ជំរិតទារប្រាក់ ១៥០០ ដុល្លារ

បុរសវ័យ ៦០ ឆ្នាំម្នាក់ត្រូវបានចោទប្រកាន់ថាបានប៉ុនប៉ងប្លន់ស្ត្រីវ័យ ២៩ ឆ្នាំម្នាក់នៅតំបន់ Woodlands ប្រទេសសិង្ហបុរីដោយប្រើឧបករណ៍ចាក់ស្បែកជុំវិញក្រចក

វចនានុក្រម Cambridge ជ្រើសរើសពាក្យ “Human” ជាពាក្យប្រចាំឆ្នាំ ២០២៦ ដើម្បីកុំឱ្យយើងភ្លេចពី “ភាពជាមនុស្ស” នៅក្នុងយុគសម័យ AI

នៅពេលដែលស្នាដៃបង្កើតដោយ AI ទទួលបានជ័យលាភី ចម្រៀង AI ត្រូវបានប្រើប្រាស់យ៉ាងទូលំទូលាយ វីដេអូ AI បានក្លាយជាវីដេអូស្នូលសម្រាប់ផ្សព្វផ្សាយរបស់ស្ថាប័នផ្សេងៗ

គំនូរមួយផ្ទាំងរបស់វិចិត្រករល្បីហូរឡង់ត្រូវបានលក់ក្នុងតម្លៃខ្ពស់បំបែកកំណត់ត្រា ១៩០​ លានដុល្លារ

ក្រុមហ៊ុនដេញថ្លៃ Sotheby's បានឱ្យដឹងថា ស្នាដៃដ៏អស្ចារ្យមួយរបស់វិចិត្រករ Vincent van Gogh ត្រូវបានលក់ក្នុងតម្លៃកំណត់ត្រា ១៩០,៤ លានដុល្លារអាមេរិក កាលពីថ្ងៃពុធ

គ្រឿងអលង្ការមាស ដែលធ្លាប់ស្ថិតក្រោមកម្មសិទ្ធិខុសច្បាប់របស់ Douglas Latchford មានតាំងបង្ហាញ នៅសារមន្ទីរជាតិដល់ថ្ងៃទី ២២ វិច្ឆិកា

នៅពេលចូលទៅដល់ពិព័រណ៍មិនអចិន្ត្រៃយ៍ស្ដីពីគ្រឿងអលង្ការ នាសារមន្ទីរជាតិ អ្នកនឹងឃើញនូវរូបចម្លាក់នៃទេពបុរសមួយអង្គតុបតែងដោយគ្រឿងអលង្ការមាសដ៏ប្រណិតមុនគេបង្អស់

តារាចម្រៀងចង្វាក់ Country Lainey Wilson ជ្រើសឈុតពី ALmée  សម្ដែងបទចម្រៀងថ្មី​  “Just A Woman” នៅ CMAs

តារាចម្រៀងចង្វាក់ខោនទ្រី Lainey Wilson បាន​ជ្រើសរើស​ឈុត ALmée Couture ដើម្បី​ឡើង​សម្ដែង​នៅ​ក្នុង​កម្មវិធី​ប្រគល់​ពាន​រង្វាន់ CMA ។ រ៉ូប​ពណ៌​ទឹក​ក្រូច​ចាស់​នោះ

លោកស្រី សុភា បុត្រឈរ ចូលរួមថវិកា ១ ម៉ឺនដុល្លារ សម្រាប់ Vote ឲ្យ Miss Universe Cambodia 2026 ថាន រតនា

Miss Universe Cambodia 2026 កញ្ញា ថាន រតនា កំពុង​បំពេញ​បេសកកម្ម​តំណាង​ឲ្យ​កម្ពុជា​នៅ​លើ​ឆាក​បវរកញ្ញា​ដ៏​ធំ​នៅ​ប្រទេស Puerto Rico ហើយ​កម្មវិធី Miss Universe ក៏បា

លោកសាស្ត្រាចារ្យ អ៊ីស៊ីហ្សាវ៉ា យ៉ូស៊ីអាគី ជនជាតិជប៉ុនដែលបានរួមចំណែកអភិរក្ស និងជួសជុលប្រាសាទបុរាណខ្មែរ ទទួលមរណភាព

លោកសាស្ត្រាចារ្យ អ៊ីស៊ីហ្សាវ៉ា យ៉ូស៊ីអាគី នាយកនៃមជ្ឈមណ្ឌលស្រាវជ្រាវ និងបណ្តុះបណ្តាលធនធានមនុស្សអាស៊ីដែលបានបណ្ដុះបណ្ដាលអ្នកជំនាញក្នុងស្រុក ក្នុងកិច្ចការអភិរក្ស

ប្រញាប់ទៅមើល! សារមន្ទីជាតិកម្ពុជាបន្តការពិព័រណ៍គ្រឿងអលង្ការខ្មែរអាយុកាល ២ ពាន់ឆ្នាំ ត្រឹមថ្ងៃអាទិត្យនេះ

ដោយមានការគាំទ្រយ៉ាងច្រើនពីភ្ញៀវជាតិ និងអន្តរជាតិ ពិព័រណ៍មិនអចិន្ត្រៃយ៍ស្តីពី គ្រឿងអលង្ការ នឹងបន្តបើកជូនសាធារណជនចូលទស្សនាត្រឹមថ្ងៃអាទិត្យ ចុងសប្តាហ៍នេះ

អ៊ែនជេលីណា និងអគ្គនាយក UNESCO លោក Khaled El-Eneny ទៅទស្សនកិច្ច ការត្បាញសូត្រខ្មែរ នៅកោះឧកញ៉ាតី

កាលពី​ពេល​ថ្មី​ៗ​នេះ​លោក Khaled El-Eneny និង​កំពូល​តារា​ហូលីវូដ អ៊ែនជេលីណា ជូលី បាន​ធ្វើ​ដំណើរ​ទៅ​កោះ​ឧកញ៉ា​តី ដើម្បី​ទៅ​មើល​ការ​ត្បាញ​សូត្រ ដែល​ជា​ជំនាញ​តាំងពី

លោកយាយវ័យ ៨៤ ឆ្នាំ សម្រេចក្តីស្រមៃរៀនចប់ថ្នាក់បណ្ឌិត ក្រោយតស៊ូនឹងជំងឺមហារីក

ក្នុងវ័យ ៨៤ ឆ្នាំ លោកស្រីបណ្ឌិត Prasanna Mukundan បានសម្រេចក្តីសុបិន ដោយទទួលបានសញ្ញាបត្របណ្ឌិត ទាំងដែលលោកស្រីធ្លាប់គិតថា វាជាក្តីស្រមៃមួយដែលមិនអាចឈោងដល់។



Leave a Reply

Your email address will not be published.Required fields are marked *