កាលពីថ្ងៃទី៨ ខែតុលានេះ Zhao Lusi បានរៀបចំកម្មវិធីប្រគំតន្ត្រីដើម្បីអបអរសាទរដល់ថ្ងៃខួបកំណើតរបស់ខ្លួន ដោយនាងក៏បានឆ្លៀតឱកាសនេះ ប្រកាសសេរីភាពសាជាថ្មី ក្រោយពីមានបញ្ហាចម្រូងចម្រាសជាមួយនឹងទីភ្នាក់ងារ និងបញ្ហាសុខភាព នាំឱ្យអាក់ខានសកម្មភាពសិល្បៈ។



ផ្អែកតាមសារព័ត៌មាន 163 កម្មវិធីប្រគំតន្ត្រីខួបទី ២៧ឆ្នាំនេះ បានធ្វើឡើងនៅក្នុងទីក្រុង Chengdu ប្រទេសចិន ដោយតារាសម្ដែងរូបនេះ ក៏បានបកស្រាយចម្រៀងបទថ្មី Black Veil Bride ជូនអ្នកគាំទ្រផងដែរ។ នេះចាត់ទុកជាការវិលត្រឡប់មកកាន់វិស័យសិល្បៈវិញរបស់ Zhao Lusi ក្រោយពីនាងមានបញ្ហាសុខភាពធ្ងន់ធ្ងររហូតមិនអាចដើរបាន រួមនឹងបញ្ហាអូសបន្លាយជាមួយនឹងទីភ្នាក់ងារចាស់ផង។
ទន្ទឹមគ្នានោះ តួឯកស្រីពីរឿង Love Ambition បានកែប្រែឆាកប្រគំតន្រ្តី ទៅជាវេទិកាប្រកាសឯករាជ្យ ដោយនាងបានពោលទាំងទឹកភ្នែកថា៖ “កាលពី ២ខែមុន ខ្ញុំគិតថា ខ្ញុំប្រហែលជាមិនអាចត្រឡប់មកសម្ដែងវិញទេ។ ប៉ុន្តែឥឡូវនេះ ខ្ញុំសប្បាយចិត្តណាស់។ ទោះបីជាខ្ញុំនៅតែឈឺក៏ដោយ តែខ្ញុំនៅតែអាចធ្វើអ្វីដែលខ្ញុំស្រឡាញ់បាន”។
ឆ្លៀតឱកាសនេះ Zhao Lusi ក៏បានប្រកាសជាផ្លូវការនូវការចាប់ផ្ដើមដំណើរជាថ្មីនៅលើវិថីសិល្បៈជាមួយនឹងទីភ្នាក់ថ្មីផងដែរ ដោយនាងបាននិយាយថា៖ “អរគុណស្ទូឌីយោថ្មី អរគុណក្រុមហ៊ុនថ្មី អរគុណមែនទែន”។
សូមរំឭកថា កន្លងមក Zhao Lusi បានមានបញ្ហាផ្ទៃក្នុងអូសបន្លាយជាមួយនឹង Galaxy Cool Entertainment ខណៈទីភ្នាក់ងារទាមទារឱ្យតារាស្រីបង់ប្រាក់ពិន័យជាង ៤០០លានយ៉ន់ ឬប្រមាណ ៥៦លានដុល្លារអាមេរិក។ លុះមកដល់ដើមខែវិច្ឆិកានេះ ទើបមានព័ត៌មានលេចឮថា តារាស្រីបានបញ្ចប់កិច្ចសន្យាជាមួយអតីតទីភ្នាក់ងារបានដោយជោគជ័យ ថែមទាំងមិនតម្រូវឱ្យបង់ប្រាក់សំណងទៀតផង។
អមជាមួយនឹងការចាប់ផ្ដើមថ្មីនេះ ក៏មានព័ត៌មានរាយការណ៍ដែលថា បច្ចុប្បន្ន Zhao Lusi កំពុងតែរៀបចំថតភាពយន្តភាគថ្មីចំនួន ២ចំណងជើង ដោយភាពយន្តទី១ គឺជាភាពយន្តបែបបុរាណ និងភាពយន្តមួយទៀត គឺជាភាពយន្តបែបស៊ើបអង្កេត៕






























Account
Security
Favourite Content