សេចក្ដីថ្លែងការណ៍ពី JYP នៅថ្ងៃច័ន្ទនេះបាននិយាយថា ការអះអាងរបស់សមាជិក VCHA KG គឺ “មិនពិត និងបំផ្លើស” ដោយបានបដិសេធចំពោះការអះអាងរបស់តារាចម្រៀងរូបនេះដែលថា JYP Entertainment បានបំពាន និងធ្វើបាបសមាជិក VCHA ។
គួររំឭកថា កាលពីថ្ងៃអាទិត្យ សមាជិកក្រុម VCHA ម្នាក់ឈ្មោះ KG ដែលជាតារាចម្រៀងអាយុ ១៧ ឆ្នាំកើតនៅសហរដ្ឋអាមេរិកមានឈ្មោះពិតថា Kiera Grace Madder បានបង្ហោះលើ Instagram ដោយនិយាយថានាងកំពុងចាកចេញពី JYP Entertainment បន្ទាប់ពីមាន “ហេតុការណ៍រំលោភបំពាន និងការធ្វើបាប” ពីបុគ្គលិកមួយចំនួននៅក្នុងទីភ្នាក់ងារនេះ។
នាងបានអះអាងថា នាងបានទទួល “លក្ខខណ្ឌការងារ និងការរស់នៅមិនសមស្រប” ដែលនាំឱ្យសមាជិកម្នាក់ប៉ុនប៉ងធ្វើអត្តឃាត ដោយបានបញ្ជាក់ពីបរិយាកាសដែលលើកទឹកចិត្តឱ្យមានបញ្ហារបបអាហារ និងបានបង្កឱ្យសមាជិកធ្វើបាបខ្លួនឯង។ KG បានដាក់ពាក្យបណ្ដឹងទៅកាន់តុលាការកំពូល Los Angeles កាលពីថ្ងៃសុក្រ ដើម្បីប្ដឹងក្រុមហ៊ុន JYP USA ដែលជាមែកធាងរបស់ផលិតកម្ម JYP Entertainment នៅសហរដ្ឋអាមេរិក ។
នៅថ្ងៃច័ន្ទ ទី៩ ខែធ្នូនេះ JYP USA ក៏បានចេញសេចក្ដីថ្លែងការណ៍ឆ្លើយតបថា៖ “ពួកយើងសោកស្តាយយ៉ាងខ្លាំងចំពោះការសម្រេចចិត្តរបស់ KG ក្នុងការដាក់ពាក្យបណ្តឹង និងធ្វើសេចក្តីថ្លែងការណ៍ឯកតោភាគីដែលមានការអះអាងមិនពិត និងបំផ្លើស” ។
“សកម្មភាពនេះបានបង្កឱ្យមានគ្រោះថ្នាក់យ៉ាងធ្ងន់ធ្ងរដល់សមាជិកដទៃទៀតនៃ VCHA និង JYP USA ដែលបានខិតខំធ្វើការយ៉ាងខ្លាំងលើអាល់ប៊ុម និងគម្រោងនាពេលខាងមុខរបស់ពួកគេសម្រាប់ដើមឆ្នាំ ២០២៥”។
JYP USA បានឱ្យដឹងទៀតថា KG បានចាកចេញពីកន្លែងស្នាក់នៅរបស់ក្រុមកាលពីខែឧសភា ហើយមិនបានឆ្លើយតបអ្វីទាំងអស់មកទីភ្នាក់ងារ បើទោះបីពួកគេព្យាយាមទាក់ទងទៅនាងគ្រប់វិធី រហូតពួកគេត្រូវផ្អាកសកម្មភាពរបស់ VCHA ដើម្បីទៅពិភាក្សាជាមួយ KG ។
ទីភ្នាក់ងារដដែលនេះបាននិយាយថា៖ “JYP USA នឹងចាត់វិធានការចាំបាច់ទាំងអស់ដើម្បីធានាថា ទាំងសមាជិកផ្សេងទៀតនៃ VCHA និង JYP USA នឹងមិនទទួលរងគ្រោះថ្នាក់បន្ថែមទៀតដោយសារបញ្ហានេះ” ។
គួរបញ្ជាក់ថា ក្រុមចម្រៀង VCHA គឺជាលទ្ធផលនៃគម្រោងរួមគ្នារវាង JYP Entertainment និងក្រុមហ៊ុនតន្ត្រីយក្សរបស់សហរដ្ឋអាមេរិក Republic Records ដោយសមាជិកក្រុមគឺជាបេក្ខជនចុងក្រោយចំនួន ៦ នាក់ពីកម្មវិធីប្រឡង “A2K” ឬ America2Korea ដែលដំណើរការដោយភ្នាក់ងារទាំងពីរពីខែកក្កដាដល់ខែកញ្ញាក្នុងឆ្នាំ ២០២៣។ សមាជិកក្រុមផ្សេងទៀតរួមមាន Lexi, Camila, Savanna, Kendall និង Kaylee ៕