ថ្ងៃទី២១ ខែមីនា នេះកំពូលតារារ៉េប វណ្ណដា នឹងទម្លាក់ផ្នែកទី២ នៃ Album ត្រីវិស័យរបស់ខ្លួន បន្ទាប់ពីផ្នែកទី១នៃអាល់ប៊ុមចេញកាលពី១៤ ខែមីនាកន្លងទៅ ដោយមានបទចម្រៀងរហូតទៅដល់ ៨ បទសុទ្ធតែពីរោះៗ ហើយទទួលបានការគាំទ្រខ្លាំងទាំងក្នុង និងក្រៅប្រទេស។

ក្នុងចំណោម ៨ បទនៃផ្នែកទី១ក្នុង អាល់ប៊ុមត្រីវិស័យ វណ្ណដា មានចម្រៀងមួយដែលសហការជាមួយតារាថៃ Young Ohm គឺបទ «Smoke Up»។ ការសហការជាមួយតារាថៃអាចមិនមែនជារឿងថ្មីឡើយ ដោយកន្លងមកកំពូលតារារ៉េបស្រុកខ្មែររូបនេះ ចេញបទជាមួយ Rapper ជួរមុខនៃប្រទេសថៃជាច្រើននាក់ រួមមាន OG BOBBY, F.HERO, 1MILL និង SPRITE។
ថ្មីៗនេះទៀតសោតកាលពីចុងខែកុម្ភៈ វណ្ណដា ក៏បានទម្លាក់បទរួមគ្នាជាមួយតារា ជប៉ុន ចិន កូរ៉េ ឥណ្ឌា «Asian State Of Mind»។ បើក្រឡេកទៅមើលកាលពីឆ្នាំ ២០២៣ តារាប្រុសវ័យ២៨ ឆ្នាំត្រូវបានអញ្ជើញជាភ្ញៀវកិត្តិយសនៃកម្មវិធី Viêt’s Season 3 វគ្គ Grand Finale ហើយបានជ្រើសបទ «អីតែមិនអី» ទៅ Remix ជាមួយតារារ៉េបស្រីវៀតណាមដ៏ល្បី Suboi។ គ្រានោះបង្ហាញយ៉ាងច្បាស់ថា វណ្ណដា គឺជាតារាលំដាប់កំពូលពិតៗ ព្រោះទាំងបេក្ខភាពក្នុងកម្មវិធី Viêt’s Season 3 រួមទាំង coach ទាំងអស់ពិតជាស្គាល់ច្បាស់ពីបទចម្រៀង វណ្ណដា និងបានច្រៀងតាមទៀតផង។



ងាកមកមើលផ្នែកទី២ នៃAlbum TREYVISAI II របស់ វណ្ណដា បទ « LOVESICK BLUE» បានសហការជាមួយសិល្បៈការិនីរបស់ប្រទេសឡាវ គឺតារាស្រី Thinlamphone។ នាងមានឈ្មោះពេញ Thinlamphone Mahavong ជាតារាចម្រៀងប៉ុបសម័យទំនើប និង Morlum (ចម្រៀងប្រជាប្រិយឡាវ) ផងដែរ។ តារាស្រីឡាវ ក៏បាន share បន្តការបង្ហោះរបស់ វណ្ណដា លើបណ្ដាញសង្គមខ្លួនផងដែរ។
វណ្ណដា មិនត្រឹមមានទេពកោសល្យក្នុងការផលិតបទចម្រៀង ហ៊ីបហប់ ឡើយ តែក៏តារាដែលមានភាពឈ្លាសវៃក្នុងការចាប់យកឱកាស និងពង្រីកកេរ្តិ៍ឈ្មោះខ្លួន ដោយសហការជាមួយតារានៅតាមបណ្ដាប្រទេសជិតខាងជាច្រើនរួចមកហើយ ហើយប្រទេសឡាវ ក៏ទើបតែអាល់ប៊ុមទី៣ នេះ។ នៅប្រទេសឡាវ តារារ៉េប វណ្ណដា ក៏មានអ្នកគាំទ្រច្រើនមិនធម្មតាដែរ ព្រោះបទមួយៗចេញទៅហើយប្រជាជននៅប្រទេសក្បែរខាងមួយនោះតែងតែយកបទ វណ្ណដា ទៅរាំលេងតាម Tik Tok ល្បីកក្រើករហូតមក ជាក់ស្ដែងកាលពីឆ្នាំ ២០២៤ បទ «សង្ក្រាន្តស្គាល់ស្នេហ៍» មានអ្នករាំលេងក្នុង Tik Tok ច្រើនខ្លាំងមែនទែន៕


រូបភាព៖ vannda និង Thinlamphone Mahavong























Account
Security
Favourite Content