កម្មវិធីវីដេអូខ្លីៗ Tik Tok ដែលជាកម្មវិធីកំពុងទទួលបានការពេញនិយមពីយុវវ័យ បាននិយាយកាលពីថ្ងៃព្រហស្បតិ៍ថា ខ្លួននឹងបណ្តាក់ទុនរាប់ពាន់លានដុល្លារនៅក្នុងតំបន់អាស៊ីអាគ្នេយ៍ ដើម្បីជំរុញប្រភេទអាជីវកម្មអេឡិចត្រូនិក e-commerce ក្នុងរយៈពេលប៉ុន្មានឆ្នាំខាងមុខទៀត។ ខណៈពេលដែលអ៊ឺរ៉ុប និងអាមេរិក កំពុងដាក់កំហិតលើបញ្ហាសុវត្ថិភាពទិន្នន័យរបស់អ្នកប្រើប្រាស់នៃកម្មវិធីនេះ។
អាស៊ីអាគ្នេយ៍ ជាតំបន់ដែលមានប្រជាជនសរុបចំនួន ៦៣០ លាននាក់ ហើយពាក់កណ្តាលនៃចំនួនប្រជាជននេះមានអាយុក្រោម ៣០ឆ្នាំ។ វាគឺជាទីផ្សារដ៏ធំបំផុតមួយរបស់ TikTok ដោយក្នុងមួយៗខែនៅតំបន់អាស៊ីអាគ្នេយ៍ មានប្រជាជនប្រើប្រាស់កម្មវិធីនេះច្រើនជាង ៣២៥ លាននាក់។

ប៉ុន្តែវេទិកានេះមិនទាន់អាចកែប្រែទៅជាប្រភពចំណូល e-commerce ដ៏សំខាន់នៅក្នុងតំបន់នោះទេ ខណៈ Tik Tok អាចប្រឈមមុខនឹងដៃគូប្រជែងក្នុងតំបន់ដូចជា Shopee, Lazada របស់ Alibaba និង Tokopedia របស់ឥណ្ឌូណេស៊ី។
នាយកប្រតិបត្តិ Tik Tok លោក Shou Zi Chew បាននិយាយនៅក្នុងវេទិកាដែលខ្លួនរៀបចំនៅទីក្រុងហ្សាកាតាថា «យើងនឹងវិនិយោគរាប់ពាន់លានដុល្លារនៅក្នុងប្រទេសឥណ្ឌូនេស៊ី និងអាស៊ីអាគ្នេយ៍ក្នុងរយៈពេលប៉ុន្មានឆ្នាំខាងមុខនេះ»។
TikTok មិនបានផ្តល់នូវព័ត៌មានលម្អិតនៃផែនការចំណាយនោះទេ ប៉ុន្តែបាននិយាយថា ខ្លួននឹងវិនិយោគលើការបណ្តុះបណ្តាល ការផ្សាយពាណិជ្ជកម្ម និងការគាំទ្រដល់អ្នកលក់ដូរតូចៗដែលមានបំណងចូលរួមវេទិកាពាណិជ្ជកម្ម e-Commerce របស់ខ្លួនគឺ TikTok Shop។
លោក Chew បាននិយាយថា មាតិកានៅលើកម្មវិធីរបស់ខ្លួនកាន់តែមានភាពចម្រុះ សម្បូរបែប ដោយសារវាមានអ្នកប្រើប្រាស់កាន់តែច្រើន និងពង្រីកខ្លួនលើសពីគ្រាន់តែផ្សាយពាណិជ្ជកម្មទៅក្នុងពាណិជ្ជកម្មអេឡិចត្រូនិក ដែលអនុញ្ញាតឱ្យអ្នកប្រើប្រាស់ទិញទំនិញតាមរយៈតំណភ្ជាប់នៅលើកម្មវិធីក្នុងអំឡុងពេលផ្សាយផ្ទាល់ (livestreaming)។
អតីតបុគ្គលិកក្រុមហ៊ុន Facebook រូបនោះ បានបន្ថែមថាបច្ចុប្បន្ននេះ TikTok មានបុគ្គលិក ៨ ០០០ នាក់នៅអាស៊ីអាគ្នេយ៍ និងមានអ្នកលក់រាយតូចៗ ២ លាននាក់នៅក្នុងប្រទេសឥណ្ឌូណេស៊ី កំពុងលក់ទំនិញរបស់ពួកគេនៅលើកម្មវិធីរបស់ខ្លួន។
បើយោងតាមទិន្នន័យពីក្រុមហ៊ុនប្រឹក្សា Momentum Works ប្រតិបត្តិការពាណិជ្ជកម្មតាមប្រព័ន្ធអេឡិចត្រូនិកទូទាំងតំបន់អាស៊ីអាគ្នេយ៍ បានកើនឡើងដល់ជិត ១០០ ពាន់លានដុល្លារកាលពីឆ្នាំមុន ដោយប្រទេសឥណ្ឌូណេស៊ីមាន ៥២ ពាន់លានដុល្លារ៕


























Account
Security
Favourite Content