នៅថ្ងៃទី១៧ ខែមេសានេះ ស្រីស្អាត Mind Patcharabut បានចូលរួមកម្មវិធី “Hone Krasae” របស់ពិធីករ Noom Kanchai ដើម្បីស្រាយបំភ្លឺជាលើកដំបូងអំពីបញ្ហាទំនាក់ទំនងរបស់នាងជាមួយតារាចម្រៀងប្រុស Tono Phakin ខណៈដែលនាងបានធ្វើការជាជំនួយការអ្នកចាត់ការរបស់តារាប្រុសថៃរូបនេះ។

ក្នុងវគ្គទី១ តារាស្រីដែលមានអាជីពជាម៉ូដែលនិងពិធីការិនីរូបនេះ បាននិយាយពីទំនាក់ទំនងស្នេហារបស់នាងជាមួយមិត្តប្រុសឈ្មោះ Petch ថាពួកគេមានបញ្ហាឈ្លោះគ្នាច្រើន រហូតដល់ខែវិច្ឆិកា ឆ្នាំ២០២៤ ក៏សម្រេចចិត្ត បែកគ្នា ប៉ុន្តែខាងប្រុសនៅតែតាមសុំឱកាស ហើយនាងក៏និយាយថាអាចផ្ដល់ឱកាសឱ្យគេបាន ប៉ុន្តែនាងក៏នឹងផ្តល់ឱកាសឲ្យខ្លួនឯងដែរ។ នាងអាចយល់បានថា Petch នៅតែគិតថានាងជាមិត្តស្រីរបស់ខ្លួន ប៉ុន្តែសម្រាប់នាង គ្រប់យ៉ាងមិនដូចមុននោះទេ។

ចំពោះ Tono Phakin វិញតារាស្រីរូបនេះនិយាយថាពួកគេបានស្គាល់គ្នាកាលពីដើមឆ្នាំមុនក្នុងកម្មវិធីមួយដែលនាងធ្វើជាពិធីករ ហើយបន្ទាប់ពីធ្វើការជាមួយគ្នា នាងក៏បង្ហោះរូបថតពីកម្មវិធីនោះហើយ tag ឱ្យ Tono ហើយក៏បានឆាតនិយាយគ្នាបន្តិចបន្តួច ដោយអះអាងថាមិនបានគិតអ្វីលើសពីការងារទេពេលហ្នឹង។


រហូតដល់ខែមករាឆ្នាំនេះ Tono បានទាក់ទងមកនាង និងបបួលនាងចូលធ្វើការជាលេខាប្រធានក្លឹបបាល់ទាត់មួយ ហើយបន្ទាប់ពីធ្វើការជាមួយគ្នារហូតកាន់តែជិតស្និទ្ធ នាងក៏បានទៅជួយការងារ Tono បន្តទៀតក្នុងមុខតំណែងជាជំនួយការអ្នកចាត់ការទូទៅរបស់ Tono (Phi May)។
រហូតដល់ពេលដែល Phi May ឈឺ ហើយត្រូវវះកាត់ មិនអាចបើកបរបាន នាងក៏ត្រូវមើលថែ Tono បន្ថែមទៀត ដោយត្រូវបើកឡានជូនគេទៅកម្មវិធីនានា ថ្ងៃខ្លះកម្មវិធីចប់ដល់យប់ជ្រៅ នាងក៏ត្រូវត្រឡប់មកផ្ទះជាមួយគេយប់ជ្រៅដែរ។ Mind សារភាពថានាងដឹងថា Tono មានមិត្តស្រីស្រាប់ហើយ គឺ Nychaa ហើយក៏មានឱកាសបានជួប Nychaa ញឹកញាប់ដែរ។
ទំនាក់ទំនងរវាង Mind Patcharabut និង Tono Pakin បានរីកចម្រើនជាបន្តបន្ទាប់ តាមរយៈការនិយាយគ្នាយ៉ាងជិតស្និទ្ធ និងធ្វើការជាមួយគ្នា ហើយកាន់តែច្បាស់ថែមទៀតគឺកំលុងថ្ងៃបុណ្យនៃក្តីស្រឡាញ់ Tono បានសារភាពស្នេហ៍ទៅនាង។ Mind ទទួលស្គាល់ថានាងមិនបានប្រាប់ពីរឿង Petch ទៅកាន់ Tono ព្រោះនាងគិតថានាងនិង Petch លែងជាសង្សារនឹងគ្នាតាំងពីបែកគ្នាកាលពីឆ្នាំមុនម្ល៉េះ។
Mind បន្តថាខ្លួនចាប់ផ្ដើមទន់ចិត្តចំពោះ Tono ដោយសារការមើលថែយ៉ាងយកចិត្តទុកដាក់របស់គេ ហើយនាងក៏ធ្លាប់សួរនាំ Tono ផងដែរអំពី Nychaa ប៉ុន្តែ Tono និយាយថា គេមិនបានស្រលាញ់ Nychaa ទៀតទេ ពោលពេលនេះគេគិតចំពោះ Nychaa ត្រឹមជាប្អូនស្រីប៉ុណ្ណោះ ហើយពួកគេទាំងពីរក៏បានបែកគ្នាមួយរយៈហើយ។ មួយថ្ងៃបន្ទាប់ នាងបានឃើញ Nychaa បង្ហោះសារថា “ដល់ពេលមើលថែខ្លួនឯងហើយ” ធ្វើឱ្យនាងជឿជាក់ថា Tono និង Nychaa បានបែកគ្នាពិតមែន។
យ៉ាងណាក៏ដោយ បន្ទាប់ពីទំនាក់ទំនងរវាងនាងនិង Tono ត្រូវបានលាតត្រដាង នៅពេលនេះតារាចម្រៀង Tono ក៏បានប្រកាសថាលោកកំពុងតាមលួងចិត្ត Nychaa វិញ ដូច្នេះនាងក៏សុំដកខ្លួនវិញដូចគ្នា។ ចុងក្រោយ Mind បានយំនិងលើកដៃសំពះសុំទោស Nychaa ដែលនាងមិនបានពិនិត្យការពិតឱ្យច្បាស់ទើបបណ្ដាលឱ្យរឿងនេះកើតឡើង ៕































Account
Security
Favourite Content