តារាចម្រៀង និងអ្នកនិពន្ធចម្រៀងអាមេរិក Olivia Rodrigo បានបរិច្ចាគប្រាក់ចំណេញពីការលក់សំបុត្រចូលរួមកម្មវិធីប្រគំតន្ត្រី GUTS World Tour ក្នុងប្រទេសហ្វីលីពីន ដើម្បីដោះស្រាយបញ្ហាសុខភាពរបស់ស្ត្រី និងក្មេងស្រី។

កាលពីថ្ងៃទី៥ ខែតុលាដែលទើបតែរំលងទៅនេះ ការប្រគំតន្ត្រីជុំវិញពិភពលោកសម្រាប់អាល់ប៊ុមទី ២ របស់តារាស្រីរូបនេះ បានធ្វើដំណើរមកដល់ប្រទេសហ្វីលីពីន។ នេះជាលើកទីមួយរបស់នាងដែលបានជាន់ទឹកដីមួយនេះ បើទោះបីជាមានឪពុកជាជនជាតិហ្វីលីពីនក៏ពិតមែន។
ដំណើរមកដល់របស់តារាស្រីវ័យ ២១ឆ្នាំរូបនេះ ជាអ្វីដែលអ្នកគាំទ្ររបស់នាងសប្បាយចិត្តណាស់ទៅហើយ តែនៅ១ថ្ងៃបន្ទាប់ពីកម្មវិធី Olivia រឹតតែធ្វើឱ្យអ្នកគាំទ្រលង់ស្រឡាញ់ខ្លួនទ្វេរដង ជាមួយនឹងទឹកចិត្តដ៏សប្បុរសរបស់នាង។

ផ្ដើមដោយនាងបានបង្ហាញពីអារម្មណ៍របស់ខ្លួនចំពោះអ្នគគាំទ្រ ម្ចាស់ពានរង្វាន់ Grammy រូបនេះបានរៀបរាប់នៅលើគណនី Instagram ផ្ទាល់ខ្លួនថា៖ “ខ្ញុំបានសុបិនពីកម្មវិធីនេះមកមួយរយៈពេលហើយ នេះជាលើកទីមួយរបស់ខ្ញុំនៅហ្វីលីពីន ហើយវាក៏ជាការប្រគំតន្ត្រីដ៏ធំបំផុតរបស់ខ្ញុំផងដែរ!!!!! អរគុណដល់ប្រជាជនទីក្រុងម៉ានីលគ្រប់គ្នាដែលស្វាគមន៍ និងធ្វើឱ្យខ្ញុំទទួលបានអារម្មណ៍នៃក្ដីស្រឡាញ់ពីអ្នកជាខ្លាំង”។
ក្នុងសំណេរតែមួយ Olivia Rodrigo ប្រាប់ថា ប្រាក់កម្រៃទាំងប៉ុន្មានដែលបានពីការលក់សំបុត្រ នាងបានផ្ដល់ជាជំនួយដល់អង្គការ Jhpiego តាមរយៈមូលនិធីដែលជាគំនិតផ្ដួចផ្ដើមផ្ទាល់ខ្លួនដែលមានឈ្មោះថា 4 Good។
“ខ្ញុំបានទៅលេងអង្គការនេះ នៅពេលដែលខ្ញុំស្នាក់នៅឯទីក្រុងម៉ានីល ហើយខ្ញុំពិតជាពេញចិត្តចំពោះការងារដែលពួកគេកំពុងធ្វើក្នុងការផ្តល់សេវាថែទាំសុខភាពដល់ស្ត្រី និងក្មេងស្រីនៅក្នុងប្រទេសហ្វីលីពីន” នាងបន្តដូច្នេះ។

គួរបញ្ជាក់ផងដែរថា នេះមិនមែនជាលើកទី ១ទេសម្រាប់ម្ចាស់បទ Deja Vu រូបនេះ ព្រោះកាលពីនាងធ្វើកម្មវិធីប្រគំតន្ត្រីក្នុងប្រទេសកូរ៉េក្នុងខែកញ្ញានេះ Olivia នាងក៏បានបែងចែកប្រាក់ចំណូលមួយផ្នែកដល់មូនិធីកូរ៉េដើម្បីស្រ្តីផងដែរ ដោយមូលនិធីនេះធ្វើការទៅលើ ការលើកកម្ពស់សមភាពយេនឌ័រ ការការពារអំពើហិង្សាលើស្ត្រី និងការលើកកម្ពស់ដល់ក្រុមដែលមានវិបត្តិសេដ្ឋកិច្ច ដូចជាស្ត្រីមេម៉ាយ និងស្ត្រីចំណាកស្រុកជាដើម៕

























Account
Security
Favourite Content