ប្រយោគដែលប្រជាជនខ្មែរតែងនិយាយលេងថា “Cute ពីក្មេងដល់ចាស់” គង់ប្រហែលជាប្រយោគមួយដែលអាចប្រើប្រាស់យ៉ាងស័ក្តិសមសម្រាប់តារាចម្រៀងកូរ៉េខាងត្បូង G-Dragon បានដូចគ្នាដែរ។ ជាក់ស្ដែង កាលពីពេលថ្មីៗនេះ ស្ថានីយទូរទស្សន៍ MBC បានចាប់ផ្ដើមជីកកកាយកម្រងវីដេអូរបស់កុមារា G-Dragon នៅក្នុងកម្មវីធីទូរទស្សន៍ចាស់ៗត្រឡប់មកវិញ។
ត្បិតអ្នកគាំទ្ររបស់ G-Dragon ជាច្រើនរូប អាចនឹងទើបតែស្គាល់តារាខេប៉ុបតាមរយៈតួនាទីជាសមាជិកក្រុមចម្រៀងបុរស BIGBANG ក៏ពិតមែន តែតាមពិតទៅ កុមារារូបនេះបានប្រឡូកនៅក្នុងវិស័យសិល្បៈតាំងតែពីវ័យ ៦ឆ្នាំមកម៉្លេះ ក្នុងនាមជាសមាជិកក្រុម Little Roo’Ra និងបានបង្ហាញវត្តមាននៅក្នុងកម្មវិធីទូរទស្សន៍ល្បីៗជាច្រើនដង។
កាលពីថ្ងៃទី៧ ខែវិច្ឆិកា កន្លងទៅ គណនីយូធូប MBC Archive បានបង្ហោះវីដេអូចាស់មួយពីឆ្នាំ ១៩៩៦ របស់ក្រុម Little Roo’Ra ដែលបានរាំបទចម្រៀង Angle Without Wings ក្នុងកម្មវិធី 10 O’Clock! Lim Seonghun។ វីដេអូនេះ បានបង្ហាញសមត្ថភាពរាំរបស់ស្ដេចខេប៉ុបមួយនេះពីកុមារ ដែលអ្នកគាំទ្រកូរ៉េខាងត្បូងជាច្រើនរូបបាននាំគ្នាសរសើរ។
ទន្ទឹមគ្នានេះ នៅថ្ងៃទី១៩ គណនីយូធូបដដែលបានបើកបង្ហាញវីដេអូចាស់របស់ G-Dragon ជាថ្មី ដោយបានដាក់ចំណងជាមួយនឹងឈ្មោះពិតរបស់តារាប្រុសរូបនេះថា “តារាសម្ដែងកុមារ Kwon Jiyong”។ វីដេអូនេះ ជាផ្នែកមួយនៃកម្មវីធី Bbo Bbo Bbo ភាគទី៣៩១៥ កាលពីឆ្នាំ ១៩៩៤ ដោយបានបង្ហាញមុខមាត់ និងភាពគួរឱ្យស្រឡាញ់របស់ម្ចាស់បទ Power ក្នុងវ័យ ៦ឆ្នាំ និងតារាក្មេងៗជាច្រើនរូបទៀត។
ខាងក្រោមនេះជាកម្រងរូបថតខ្លះរបស់កុមារា G-Dragon៖